132
132-ci Ǐvel mə̌ğ
Sion buruğoy bel bakala Yerusalima lağat'an mə̌ğěğala Ǐvel mə̌ğ
1 Ay Q'ončux, Davida q'a şot'ay zapi koruğxo
Vi eyex bada.
2 Şot'in Q'ončuğo əyite tadi,
İak'ovi zorba Buxačuğo elasp'i metəre pi:
3-5 «Q'ončuğoynak', İak'ovi zorba Buxačuğoynak', ga həzirbamin
Bez k'oya tez bağal zu,
Bez bula bernu tez laxal.
Piyel nep' tene eğal bezi,
Bez pula tez q'ic'k'al zu».
6 Yevfrata bakat'anyan ibaki yan irəziluği sanduği maya baksuna,
Yaari q'oruğxoyan bə̌ğə̌bi şot'o.
7 İsə ekinan Buxačuğon İçeynak' məsk'ən bi t'e ganu tağen,
Şot'ay arśi gane běš bul k'os'ben.
8 Hayza, ay Q'ončux,
Hayza Vi irəətluğ bə̌ğə̌bala gala taki!
Hunal, Vi kalaluğa ak'est'ala sanduğal!
9 Barta Va q'ulluğbala běyinšxon düzgünluğa içoğoy loxolq'at'un taradi,
Barta Vi laxi yaq'en tağalt'oğoxun mǔqluği səsq'an c'eri.
10 Vi k'ul bakala Davida tadi əyiti loxol çurpa, ay Buxačux,
Şot'ay taxt'a arśi, Vi c'ək'p'i padçağaxun ç̌o ma tarada.
11 Axıri elasp'i əyite tadi Q'ončuğon Davida,
İzi tadi me əyiti loxolal çurk'ale Şo:
"Vi nəsiləxun bakalt'oğo arśest'oz vi həysə arśi taxt'.
12 Əgər vaxun bakalt'oğon Bezi vaxun ğaç̌eśi irəziluğa q'a
Zu şot'oğo tadala əmirxo əməlbayt'un,
Vi həysə arśi taxt' həmişəluğ vi nəsiləxun bakalt'oğo mandale".
13 Sionane c'ək'p'i Q'ončuğon,
Şot'one İçeynak' k'oj bsun çureśi pi:
14 "Mone Bezi irəətluğ bə̌ğə̌bala ga,
Memiya mandoz, şot'aynak' ki, bez ük'ele bask'i me ga.
15 Bolluği məsk'ən booz me ganu,
Miya bakala kəsibxo šumen boşevk'oz.
16 Çark'esuna içoğoy loxol taradalt'un miyani běyinšxon,
Za çalxala azuk'axun mǔqluği səs c'eğale.
17 Memiin c'eğale Davidi nəsiləxun bakala zorba padçağ,
Bezi c'ək'p'it'ay k'ojin işiğ həmişə bok'ale.
18 Ç̌omə̌yin booz Zu şot'ay düşmənxo,
İçu isə ěqevk'i taxt'e loxol arśevk'oz".