12
12-ci Ǐvel mə̌ğ
Fark'alxoy dəst'in kalat'aynak'. Şeminit'en farpi mə̌ğěğala Davidi Ǐvel mə̌ğ.
1 Ay Q'ončux, yax köməyba, ene düzgün amdar tene mande,
Amdarxoy boş Va ğaç̌ bakalo tene mande!
2 Bitot'in suna əfçineduğsa,
Ç̌oye muč'at'un əyite, ama içoğoy ük' pisluğen buye.
3 Barta Q'ončuğon şot'oğoy əfçi əyitk'ala ǰomo but'k'eq'an,
Lovğalayinşakala muza bot'eq'an!
4 Barta maq'at'un fikirbi ki, "beş muzen yax beş çureğala gala eçale,
Me muz ki yast'a bune, şine yax efes bakon?"
5 «Fağırxoy zülüməz ak'i,
Kəsibxoyal şivanaz ibaki;
İsə şot'oğo köməyboz, içoğoy haraya p'ap'oz» nexe Q'ončuğon.
6 Q'ončuğoy pit'oğo əyit butene,
Şo gam buxarin boş c'emaxun vǔğ kərəm xebi təmizbi gümüş k'inək'e.
7 Ay Q'ončux, Hunen yax efsa!
Pist'oğoy kiyexun Hunen yax çark'est'i həmişə q'orişbsa.
8 Heq'ədər ki amdarxon pisluğbsuna şaat' piin běğalt'un,
Pist'oğoy say avuzbakale.