4
Müdrikluği hər şeyaxun běš baksun
1 Ay ğarmux, ef bavan tadi nəsyətxo ef ǔmǔğo sırğa banan,
Fikir tadanan ki, q'amişaksun topbanan.
2 Şot'aynak' ki, zu və̌x şaat' dərsez tast'a,
Bezi zombsuna ma bosanan.
3 Zuval bezi bavay t'ǒğǒl bakat'an,
Bezi nanay tək sa bala bakat'an
4 Bezi bavan za zombat'an pine:
«Bezi əyitmoğo vi eyexun ma c'evk'a,
Bezi əmirxo əməlba ki, vi ömür boxoyq'an baki.
5 Müdrikluğ q'a q'amişaksun q'azayinşa,
Bezi əyitmoğo eyexun ma c'evk'a, ak'est'i yaq'axunal ma c'eki.
6 Müdrikluğaxun ma cöybaka, şot'in va q'orişale,
Şot'o çureki - va efale.
7 Müdrikluğ hər şeyaxun vacibe, şot'o q'azayinşa,
K'ə topbayin, q'amişaksunal topba.
8 Şot'o üst'ün laxayin, va alabale,
Əgər şot'o ğaç̌eğayin, va hörmətə p'ap'esp'ale.
9 Şo vi bel gözəl bəzəy,
S'aldala tac bakale».
10 Bez ğar, za ǔmǔxlaxa,
Bezi əyitmoğo q'abulba ki,
Vi ömür boxoy bakane.
11 Va müdrikluği yaq'a ak'est'oz,
Va düz cığırxon taşoz.
12 Lə̌ngbat'an vi tur tene lamandal,
T'it'at'an vi tur tene fırs'eğal.
13 Va tadala tərbiyinə ğaç̌eki, vaxun ə̌xil maba,
Şot'o efa, şot'aynak' ki, şo vi yəşəyinşe.
14 Pis amdarxoy yaq'a vi tura ma ç̌axp'a,
Şər amdari yaq'en ma taki.
15 Qoş baka, me yaq'a ı̌šaal ma bita,
Şot'oxun t'it'a, q'erəz sa yaq'en c'ovaka.
16 Şot'aynak' ki, şər amdarxon pisluğ nu bayt'un,
Bask'es tet'un bakon.
Şunesa nu sakayt'un,
İçoğoy nep' t'inet'on.
17 Şot'oğon şərə šum k'inək't'un ukon,
Q'əddarluğa fi k'inək't'un ǔğon.
18 Düzgün amdari yaq' savaxt'an c'eğala işiğ k'inək'e,
Ği boxoybaksunen samalal gelene s'alst'a.
19 Pis amdarxoy yaq' isə bayinq'luğ k'inək'e,
Şot'oğon tet'un ava het'u lamandalt'un.
20 Bez ğar, bezi əyitmoğo fikir tada,
Bezi uk'alt'oğo ǔmǔxlaxa.
21 Şot'oğo vi piin běšt'an ma ə̌xilba,
Şot'oğo vi ük'e boş efa.
22 Şot'aynak' ki, şot'oğo bə̌ğə̌balt'aynak',
Yəşəyinş q'a elmoğoy dirist'uğ bakale.
23 Hər şeyaxun běš vi fikirxo təmiz efa,
Şot'aynak' ki, şoroxe vi yəşəyinşi orayin.
24 Əfçi əyitpsuna bosa,
Vi ǰomo böht'anen ma qaypa.
25 Vi pulmoğon běšq'an běği,
Düz vi tağala yaq'a běğa.
26 Vi cığıra düzba ki,
Lə̌ngbat'an ük'lü lə̌ngbavax.
27 Nə yön, nə tərs ma fırıpa,
Vi turmoğo pisluğaxun zapa.