27
1 Əyc'in ğinaxun lovğalayinş ma baka,
Axıri şot'in vaynak' k'ə eşt'una ten ava.
2 Barta va t'iyə̌mint'inq'an tərifləyinşi, hun təə,
Q'ert'ay muzexunq'an tərif c'eri, vi təə.
3 J̌ě bı̌hine, q'umal suuk' tene,
Ama q'ammazi əş galst'un mot'oğoy p'rannaxunal bı̌hine.
4 Əcuğ amansuze, hirseyal běšinə̌mə haq'sun çətine,
P'oy şot'oğoxun betər bakala paxılluğa hetəre portp'es bakon?
5 Əyitə ç̌oyel upsun şip' çurk'ala dost'e çuresunaxun şaat'e.
6 Dost'e köfel laft'ala əyitəl iz çuresunaxune,
Düşməni isə muçbsunal əfçidəne.
7 Boş tapana şamla uč'enal ağuluğebon,
Ama busa bakalt'aynak' ağu şeyural muč'ane ak'eğon.
8 İz yurdaxun ə̌xil baft'i amdar
İz mesaxun cöybaki sa q'uş k'inək'e.
9 Hetər ki varde q'a duxin ade amdari xoşel eysa,
Dost'e şaat' nəsyətəl hametəre.
10 Ham vi dost'a, hamal bavay dost'a ma bosa,
T'ara baft'at'an viçey k'oya ma taki,
Ə̌xil bakala q'oomaxunsa ı̌ša q'onşi şaat'e.
11 Bez ğar, müdrik baka ki, bez ük'ə mǔq't'an,
T'e vədə za ot'p'est'alt'uval coğab tades bazkon.
12 Ə̌xilak'alen saturběš şərə ak'i şot'oxun t'inet'on,
Q'ammaz isə běš taśi ziyane bə̌ğə̌bon.
13 Q'ərib amdari gala zamin çurk'alt'in iz paltaral girove tadon,
Haketərəl q'ert'ay çuğoy gala zamin çurk'alt'ine bon.
14 İz q'onşina savaxt'an üşenen ost'aar xeyir-bərəkət tadalo
J̌ame q'ončuxe bakon.
15 T'ot'ok'ala çuux asoyla ğine nu bot'bakala ağalinane oşq'ar.
16 Şot'o şipbsun muşa nu efes baksun,
Nəəl ki mə̌xin boş c'əyinə nu efes baksun k'inək'e.
17 Dəmirə dəmiren ğayinbalt'ullarik',
Amdarxoval sun-sunaxunt'un zombaksa.
18 İncilnə xoda becərişalt'in şot'ay baraxun ukala k'inək',
İz ağay q'ayğina mandalt'inal şərəfe bə̌ğə̌bon.
19 Xenen ç̌oye surata ak'est'ala k'inək',
Amdari ük'enal şot'ay şu baksunane ak'est'a.
20 Bisun q'a gərəmzoğ nu boşala k'inək'
Amdari pulal tene boşon.
21 Q'ızıl-gümüşi təmizluğ gam buxarin boşe ç̌oyel c'eğon,
Amdara isə q'ert'ay tərifene çalxest'on.
22 Aruma dingen t'ap'k'ayin, pə̌pě c'eğon,
Ama səfeya heq'ədər t'ap'alk'ayin, iz səfeyluğ tene c'eğon.
23 Sürünə şaat' běğa,
Vi naxıra fikir tada,
24 Şot'aynak' ki, nə var-dövlət həmişəluğ tene,
Nə tac nəsiləxun nəsilə tene c'ovaksa.
25 Kološa girbit'uxun oşa təzə o c'eğat'an,
Buruğo o śapeğala vədine
26 Q'uziğone va lapest'on,
Keçiğo toydin q'oruğ haq'es bakon.
27 Keçiğone va t'eq'ədər muč'anaq' tadon ki,
Mo vi külfətəl, nökərxoval bəse bakon.