20
1 Finen amdari loxol axšumpesedon, içk'inen davabesedon,
Şot'oğo feretbakalo müdrik tene k'aleğon.
2 Padçaği əcuğ aslani ğırılti k'inək'e,
Şot'o içuxun c'evk'alt'in iz elmoğone aç̌esp'on.
3 Davinaxun t'ist'unen amdareynak' şərəfe eçon,
Səfey isə davineynak' muşt'aǧe.
4 İz vədine nu ezbala tənbəl əkinçinen
Exe vədine hik'k'al tene bə̌ğə̌bon.
5 Ük'e fikirxo bə̌ğə̌loya bakala xe k'inək'e,
Q'amişakala amdaren şot'o zapi c'evek'on.
6 Amdarxoy gelet'ine izi ext'ibərlu baksunaxun dəm duğsa,
Ama həgigi metər bakala amdara mayina bə̌ğə̌bes bakon?
7 Düzgün amdar təmiz ük'ene yəşəyinşbsa,
İçuxun oşa eğala nəsiləl bəxt'əvəre bakon.
8 Padçağ divanbseynak' iz taxt'a arśat'an,
İz piin şaat'a pisəxun c'ək'ek'on.
9 Şina pes bakon ki, bezi ük' təmize,
Bezi günax butene?
10 Əfçi usk'unal, əfçi ayzapsunal -
Mot'oğoy p'rannaxunal Q'ončuğon irit'ene.
11 Lap əyləl iz əməlxone çalxest'a,
Şot'oğoy təmiz, düzgün nəəl k'ori baksunene ak'est'a.
12 İbakala ǔmǔxxoval, ak'ala pulmoğoval -
Mot'oğoy p'rannal Yaratmişiyo Q'ončuxe.
13 Basksuna ma çureki, tene kəsib bakalnu,
Ayığ baka ki, bolluğa p'ap'avax.
14 Müştərinen "Pise, pis male", unek'on,
Haq'i taśit'uxun oşa isə tərifebon.
15 Q'ızıle, toyexlu ǰěne, morox bütüm bune,
Müdrik əyit isə hər şeyaxun dəyərlune.
16 Q'ert'ay gala zamin çurk'alt'in iz paltaral girove tadon,
Haketərəl q'ərib amdari gala zamin çurk'alt'ine bon.
17 Feretst'unen q'azayinşala šum süft'ə muč'ane bakon,
Axırda isə ǰomo q'umene buybakon.
18 Şaat' q'ərar c'evkseynak' nəsyətxo ǔmǔxlaxa,
Davina bat'anal maslaaten ba.
19 Əyittaradalen sirurxo qaypi yəymişebon,
Şot'aynak'al metər amdaraxun ə̌xil baka.
20 Bava, nana q'arğişbalo
Zülmətəq'an baśi, iz çirağ aç̌eq'an.
21 Puldeşiluǧen haq'eğala mirasen
Axırda xeyir tene eçon.
22 "Me pisluği əvəzə c'eğoz" ma upa,
Q'ončuğo ext'ibərba, Şot'inal va q'orişale.
23 Düz nu ayzap'k'ala ǰěnaxun Q'ončuğon irit'ene,
Şot'in feret't'ala tərəzik'əl pise běğsa.
24 Amdari lə̌nge tüşəl ak'est'alo Q'ončuxe.
P'oy şina iz tağala yaq'a q'amişakon?
25 Amdara təlinə badalo şone ki,
Buxačuǧo niyətp'i, oşane şot'ay barada fikirbsa.
26 Müdrik padçağen pist'oğo c'ək'p'i,
Şot'oǧo dingen arum t'ap'k'alt'ullarik' t'ap'ek'on.
27 Q'ončuğon amdari vijdanen
Ük'e boş bakalt'oğone işiğbi ç̌oyel c'evk'on.
28 Padçağa xeyirxaxluğen q'a iz azuk'a ğaç̌ baksunene q'orişon,
İz taxt'a xeyirxaxluğene möhk'əm efon.
29 Zor cəyilxoy şərəfe,
Mas'i pop q'ojoğoy.
30 Yaroğon q'a t'ap'en amdara pisluğaxun təmizebon,
T'ap'esunen ük'əl düzebon.