17
1 Q'ari sa k'ot'or šum bakala ser k'oj
Kəyi-ǔğsunen buy höcət bakala k'ojaxun şaat'e.
2 Müdrik nökər s'ibiyaburbal ğare ağane bakon,
Şot'ay viçimoğoxun barabar mirasi paye haq'on.
3 Q'ızıl-gümüşi təmizluğ gam buxarin boşe ç̌oyel c'eğon,
Ük'e boş bakalt'u isə Q'ončuğone yoxlayinşon.
4 Pis amdaren şər bakalt'ay exlətxone fikir tadon,
Əfçiduğalen əşgaldali əyitmoğone ǔmǔxlaxon.
5 Kəsibə masq'arabalt'in şot'o Yarat'mişalt'une t'ǒǒxbon,
Q'ert'ay dərdə mǔq bakalo cazasuz tene mandon.
6 Q'ojat'oğoy biin tac içoğoy nəvooxe,
Ğarmoğoyal şərəf içoğoy bavoox.
7 Q'ammaza haq'ullu exlət nu yarayinşala k'inək'
Kalaluğbalal əfçi exlət sal tene yarayinşbsa.
8 Rüşvət tadalt'ay piyes iz rüşvət sa piin çile,
Şot'aynak' ki, mani tərəf tağayin, q'azance eşt'a.
9 Günaxi looxun butk'alt'in serluğe qə̌věğon,
Şot'o həmişə ç̌oyel duğalt'in isə iz ı̌ša dost'urxone aç̌esp'on.
10 Q'amiş amdara sa töhməten,
Axmağa duğeğala sabaç̌ q'apazaxun gelene təsirbsa.
11 Pis amdaren insanxo saycə davinane k'ale,
Q'əddar elçinal şot'aynak' yaq'abalt'un.
12 Baloğo aç̌esp'i sa šuyena irəst'eysun
Q'ammaza iz səfeyluği boş irəst'eysunaxun şaat'e.
13 Şin şaat'luği gala pisluğ bayin,
İz k'oyaxun pisluğ tene cöybakal.
14 Höcəti burqesun xene bande qayesunane oşq'ar,
Dava q'ızışakamin şot'ay běšinə̌mə haq'a.
15 Ham taxsırkərt'u haq'lu c'evk'alo,
Ham düzgünt'u taxsırkər c'evk'alo -
Mot'oğoy p'rannat'uxunal Q'ončuğon irit'ene.
16 Q'ammazi təngə baksuni k'ə xeyirəbu?
Haq'ıl nu bakala gala müdrikluğa hetər haq'ale?
17 Dost'en həmişəne çureğon,
Viçiyal t'ar ğinene vi dərdə şərik bakon.
18 Saycə haq'ılsuzene t'iyə̌mint'ay gala əyit tadi
Şot'ay gala zamin çurk'on.
19 Dava çureğalt'in günaxe çuresa,
İçu ala biq'alt'in bist'une qə̌věsa.
20 İçust'a əfçi bakalt'in xeyir tene bə̌ğə̌bon,
Bic'luğ əşp'est'i əyitk'aloval bəlinəne baft'on.
21 Axmaği bavan dərde bə̌ğə̌bon,
Sarsaği bavay mǔqluğ aneç̌on.
22 Ük'e mǔqluğ elmoğoynak' ən şaat' dərməne,
Ük' xə̌xə̌yesunen isə amdari elmoğone haq'on.
23 Şər amdaren c'əp'k'in rüşvəte ext'on ki,
Düzgünluğa pozmişane.
24 Q'amiş amdari fikir müdrikluği loxole bakon,
Axmaği isə t'iya-miya.
25 Axmağ ğar iz bavaynak' bələne,
İz nanaynak'al q'ubar.
26 Nə düzgün amdara cəriməbsun,
Nə s'ila amdara iz düzgünluğa görə t'ap'sun şaat' əş tene.
27 Gele avabakalt'in male əyite,
Müdrik amdaren iz əyiti q'ədirəne ava.
28 Şip' çurk'ayin, səfeyal müdrike hesab bakon,
J̌omo but'k'ayin, şoval haq'ullune ak'eğon.