15
1 Cügü coğaben hirsə bask'esedon,
Sərt əyiten isə əcuğane bəc'ük'ton.
2 Müdrikt'oğoy muzen avabaksunane tərifbon,
Axmağxoy muzexun isə səfeyluğe baron.
3 Q'ončuğoy piin hər şeya aneksa,
İz pul pist'oğoyal, şaat't'oğoyal loxole baksa.
4 Muč'a əyitmoğon amdara yəşəyinşesedon,
Əfçi əyitmoğon isə ük'e xə̌xə̌k'on.
5 Səfeyen bavay tadala tərbiyinə lağane haq'on,
Töhmətə ǔmǔxlaxalo isə ə̌xilak'ale bakon.
6 Düzgünt'ay k'oya kala dövləto,
Şər amdari isə q'azancenal içu əzabe tadon.
7 Müdrikt'ay muzen avabaksune yəymişon,
Axmaği isə mot'o haq'ıl tene p'oyeğon.
8 Q'ončuğon şər amdari eçala q'urbanaxunal irit'ene,
Ük'təmizt'oğoy isə afırınaxun irəzine manst'a.
9 Q'ončuğon şər amdari tağala yaq'axun irit'ene,
Düzgünluği bač'anexun tağalt'u isə çuresa.
10 Düz yaq'axun c'eğalt'u bı̌hi cazane tadeğon,
Töhmətə nifrətbalt'aynak'al bisune eğon.
11 Bisuni q'a p'urit'oğoy məsk'ənəl Q'ončuğoy piin běše,
Mandene ki, amdari ük'.
12 Amdarxo lağa haq'alt'in töhmətə tene q'abulbon,
Müdrik amdarxoxunal maslaat tene haq'on.
13 Ük' mǔqbakat'an amdari ç̌oyenal axšumek'on,
Dərden isə amdara xə̌xə̌nek'on.
14 Ə̌xilak'alxon avabaksune qə̌věğon,
Axmağxo isə içoğoy səfeyluğ bəse bakon.
15 Fağıri hər ği mə̌yine,
İzi hər ğina müq bakala amdareynak' isə həmişə q'onaxluğ.
16 Q'ončuğo çalxsunen q'azayinşi mal şey
Narahatluği boş gireśi kala xəzininəxun şaat'e.
17 Çuresun bakala gala göyin uksun
Nifrət bakala gala c'əyinəx arak'i yeq' uksunaxun şaat'e.
18 İçuxun usum c'eğalt'in davina yaratmişebsa,
Portbalt'in isə davina bask'esest'a.
19 Tənbəli yaq'a śaśene haq'on,
Ük'təmizt'oğoy yaq' isə genge.
20 Müdrik ğaren iz bava mǔqedon,
Axmağen isə iz nana biyaburebon.
21 Q'ammaz səfeyluğaxune mǔqbakon,
Q'amişakala amdar isə düz yaq'ene tağon.
22 Maslaat nu bakala gala amdari çureğalo bex tene p'ap'on,
Düz nəsyət tadal gele bakala gala isə, oore eğon.
23 Amdari coğab tast'eynak' əyit bakat'an mǔqe bakon,
Əyitə iz gala upsun he şaat'e!
24 Müdrikt'ay yaq'en içu ala,
Gərəmzoğoxun ə̌xil bakala yaq'ene taşt'a.
25 Q'ončuğon içuxun irəzi amdari k'ojane śark'on,
Süpür çuğoy oç̌ala isə q'orişebon.
26 Pis fikirxoxun Q'ončuğon irit'ene,
Şaat' əyitmoğoxun isə Şo irəzine.
27 Tamaxkəren iz külfətə koruğane badon,
Rüşfətə nifrətbalt'ay ömür isə boxoye bakon.
28 Düzgün amdaren coğaba fikirbine tadon,
Şər amdari isə muzexun pisluğe baron.
29 Q'ončux şər amdarxoxun ə̌xile çurk'on,
Düzgün amdarxoy isə afırına inebakon.
30 Axšumk'ala pulmoğon ük'əne mǔqt'on,
Şaat' xavarenal amdara parvazlayinşebon.
31 Xeyir tadala töhmətə ǔmǔxlaxalt'ay ga
Müdrik amdarxoy aranene bakon.
32 Tərbiyinə iradbalt'in içune zərəl tadon,
Töhmətə ǔmǔxlaxalt'in isə avabaksune q'azayinşon.
33 Q'ončuğo çalxsunen müdrikluğane zombon,
Əyitə běğsunenal hörməte eçon.