26
İsrailluğoy p'ə̌mci kərəm siyəyinə haq'esun
1 İsrailluğoynak' yaq'abi k'as'esun çurpit'uxun oşa Q'ončuğon Moiseya q'a Aaroni ğar běyinš Eleazara pine:
2 «Bito israillu işq'arxo içoğoy əsilə q'a ailinə görə siyəyinə haq'anan. Siyəyinə q'a saal q'a yəşəxun ala bakala, davina tayes bakala işq'arxo haq'eğale».
3 Moavi düzənluğa, İordan oqe t'ǒğǒl bakala Yerixon şəhəri běš Moiseyen q'a běyinš Eleazaren amdarxoxun əyitp'i pit'un:
4 «Q'ončuğon Moiseya əmirbi k'inək', q'a saal q'a yəşəxun ala bakala bito işq'arxo siyəyinə haq'anan!»
Misirəxun c'eri israilluyox isə moroxey:
5 İsraili süft'in ğar Ruvenaxun bakiyorox:
Xanok' q'a şot'oxun baki nəsil;
P'allun q'a şot'oxun baki nəsil;
6 Xesron q'a şot'oxun baki nəsil
saal K'armi q'a şot'oxun baki nəsil.
7 Metərluğen, Ruvenaxun baki tayfin boş 43 730 tane buy.
8-9 İz ğarmoğoy s'i Nemuel, Dat'an saal Aviram bakala Eliav hame P'alluni ğarey. Dat'an q'a Aviram israilluğoy boş s'ila amdarxoney. Şoroxey Goraxi tərəf c'ovaki Moiseyaxun q'a Aaronaxun t'ot'opsunen Q'ončuğoy əleyinə ěqeśiyorox.
10 Şot'oğoy turin oq'ane oç̌al qı̌bakey, şot'oğone oç̌alen Goraxaxun sagala q'uc'p'ey. İçoğo gərbaki 250 tan isə bok'i bart'undi. Moval israilluğoynak' sa dərse baki.
11 Ama Goraxi ğarmoğo Q'ončuğon tene galdi.
12 Simeonaxun bakiyorox:
Nemuel q'a şot'oxun baki nəsil;
Yamin q'a şot'oxun baki nəsil, Yak'in q'a şot'oxun baki nəsil.
13 Śerax q'a şot'oxun baki nəsil
saal Şaul q'a şot'oxun baki nəsil.
14 Metərluğen, Simeonaxun baki tayfin boş 22 200 tane buy.
15 Gadaxun bakiyorox:
Śefon q'a şot'oxun baki nəsil;
Xagi q'a şot'oxun baki nəsil;
Şunin q'a şot'oxun baki nəsil;
16 Ozni q'a şot'oxun baki nəsil;
Eri q'a şot'oxun baki nəsil;
17 Arod q'a şot'oxun baki nəsil
saal Areli q'a şot'oxun baki nəsil.
18 Metərluğen, Gadaxun baki tayfin boş 40 500 tane buy.
19 İuday ğarmoğoy p'ǒğǒ Er q'a Onan Misirə tağalt'uxun běš, hələ Kənan oç̌ala bakat'an p'uret'uniy.
20 Metərluğen, İudaxun bakala tayfa mot'oğoxune eysa:
Şela q'a şot'oxun baki nəsil;
P'ereś q'a şot'oxun baki nəsil
saal Śerax q'a şot'oxun baki nəsil.
21 P'ereśaxun isə moroxe bakey:
Xeśron q'a şot'oxun baki nəsil
saal Xamul q'a şot'oxun baki nəsil.
22 İuday tayfin boş 76 500 tane buy.
23 İssak'araxun bakiyorox:
T'olay q'a şot'oxun baki nəsil;
P'uvay q'a şot'oxun baki nəsil;
24 Yaşuv q'a şot'oxun baki nəsil
saal Şimron q'a şot'oxun baki nəsil.
25 Metərluğen, İssak'araxun baki tayfin boş 64 300 tane buy.
26 Zevulunaxun bakiyorox:
Sered q'a şot'oxun baki nəsil;
Elon q'a şot'oxun baki nəsil
saal Yaxleel q'a şot'oxun baki nəsil.
27 Metərluğen, Zevulunaxun baki tayfin boş 60 500 tane buy.
28 İosifaxun iz ğarmux Menaşşe q'a Efraimaxun baki tayfooxe eysa.
29 Menaşşenaxun bakiyorox:
Maxir q'a şot'oxun baki nəsil. Maxiraxun Gileade bakey.
30 Gileadaxun isə moroxe bakey:
İezer q'a şot'oxun baki nəsil;
Xeleq' q'a şot'oxun baki nəsil;
31 Asriel q'a şot'oxun baki nəsil;
Şexem q'a şot'oxun baki nəsil;
32 Şemida q'a şot'oxun baki nəsil
saal Xefer q'a şot'oxun baki nəsil.
33 Xeferi ğar Śelofexadaxun ğar tene bakey, şot'ay Maxla, Noa, Xok'la, Milk'a saal T'irśa s'iyen xuyərmuxe buy.
34 Metərluğen, Menaşşenaxun baki tayfin boş 52 700 tane buy.
35 Efraimaxun bakiyorox:
Şut'elax q'a şot'oxun baki nəsil;
Bexer q'a şot'oxun baki nəsil
saal T'axan q'a şot'oxun baki nəsil;
36 Şut'elaxi nəsil isə şot'oxun baki ğar Eranaxune eysa.
37 Metərluğen, Efraimaxun baki tayfin boş 32 500 tane buy. Morox bito İosifaxun bakiyoroxe.
38 Binyaminaxun bakiyorox:
Bela q'a şot'oxun baki nəsil;
Aşbel q'a şot'oxun baki nəsil;
Axiram q'a şot'oxun baki nəsil;
39 Şefuf q'a şot'oxun baki nəsil
saal Xufam q'a şot'oxun baki nəsil.
40 Belay nəsil isə şot'oxun baki ğarmux Ard q'a Naamanaxune eysa:
Ard q'a şot'oxun baki nəsil;
Naaman q'a şot'oxun baki nəsil.
41 Metərluğen, Binyaminaxun baki tayfin boş 45 600 tane buy.
42 Danaxun baki tayfa iz ğar Şuxamaxune eysa.
43 Metərluğen, Şuxamaxun bakit'oğoy say 64 400 taney.
44 Aşeraxun bakiyorox:
İmna q'a şot'oxun baki nəsil;
İşvin q'a şot'oxun baki nəsil
saal Beria q'a şot'oxun baki nəsil.
45 Beriay nəsil şot'oxun baki ğarmux Xever q'a Malk'ielaxune eysa:
Xever q'a şot'oxun baki nəsil;
Malk'iel q'a şot'oxun baki nəsil.
46 Aşeri Serax s'iyen sa xuyərəl buney.
47 Metərluğen, Aşeraxun baki tayfin boş 53 400 tane buy.
48 Naft'alinaxun bakiyorox:
Yaxśeel q'a şot'oxun baki nəsil;
Guni q'a şot'oxun baki nəsil;
49 Yeśer q'a şot'oxun baki nəsil
saal Şillem q'a şot'oxun baki nəsil.
50 Metərluğen, Naft'alinaxun baki tayfin boş 45 400 tane buy.
51 İsrailluğoxun siyəyinə haq'eśi bito işq'arxoy say 601 730 taney.
52 Q'ončuğon Moiseya metəre pi:
53 «Oç̌ala me tayfoğoy arane içoğoy saya görə cöybalanan.
54 İz say gele bakala tayfina gele, iz say mal bakala tayfina mal tadanan. Hər tayfina siyəyinə haq'eśi izi saya görə oç̌al tadeğale.
55 Mat'u mani oç̌al kofst'una isə çöp bost'unen avabakalnan. Hər tayfinen iz saya görə oç̌al haq'ale.
56 Çuresa kala, çuresa mis'ik' - hər tayfina koft'ala paya çöp bost'unen avabakalanan».
57 Levinaxun bakiyorox moroxe:
Gerşon q'a şot'oxun baki nəsil;
K'ohat' q'a şot'oxun baki nəsil;
Merari q'a şot'oxun baki nəsil.
58 Levinaxun baki tayfin boş me nəsilxoval buney:
Livnin nəsil,
Xevroni nəsil,
Maxlin nəsil,
Muşin nəsil,
Goraxi nəsil.
K'ohat' Amrami bavaney.
59 Amrami çuğoy s'i Yok'evedey. Şo leviğoxuney, şorox Misirə bakat'an t'iyane nanaxun bakey. Şot'in Amrameynak' Aarona, Moiseya saal şot'oğoy xunçi Maryamane eçerey.
60 Aaronaxun Nadav, Avihu, Eleazar saal İt'amare bakey.
61 Nadav q'a Avihu isə Q'ončuğoynak' q'urban eçat'an aruğo Şot'ay laxi q'aydinen tet'un bey, şot'aynak'al p'uret'uniy.
62 Levin tayfina sa xaşin saal kot'oxun ala bakala bito ğar əyloğoy q'a işq'arxoy say 23 000 taney. Şorox cöyt'un siyəyinə haq'eśey, şot'o görə ki, şot'oğo oç̌ali pay tene kofst'ay.
63 Metərluğen, Moiseyen q'a běyinš Aaronen Moavi düzənluğa, Yerixon şəhərəxun ç̌obaç̌o, İordan oqe t'ǒğǒl siyəyinə haq'i israilluyox moroxey.
64 Me siyəyin boş Moiseyen q'a běyinš Aaronen Sinay ams'i oç̌ala bǒq'ə̌lpi israilluğoxun sayco tene mandey.
65 Axıri Q'ončuğon peney ki, süft'in siyəyinə haq'eśiyorox bito ams'i oç̌ala biyalt'un. Şot'oğoxun Yefunneyi ğar K'alevaxun q'a Nune ğar Yeşuaxun başq'a şuk'k'al dirist' tene mandi.