24
1 Bileamen isə Q'ončuğoy israilluğoxun İz xeyir-bərəkətə nu kambsuna q'amişakeney. Şot'in ene me azuk'i loxol q'arğiş śipseynak' Buxačuğoy içu sa nišan ak'est'una tene yaqběği, ama fırıpi t'e xam oç̌alxone běği.
2 T'iyal içoğoy tayfoğo görə dəst'ə-dəst'ə çurpi israilluğo ak'at'an, Buxačuğoy uruf şot'ay loxole śiri,
3 şot'o me əyitmoğone pest'i:
«Mone, Beori ğar Bileamene əyite!
Mone, efi nu ak'alt'oğo ak'alt'in,
4 Efi nu ibakalt'oğo ibakalt'in,
Ala Arśit'ay xoji iz piin běš eğalt'in,
Şot'ay əyitmux iz ǔmǔğo laft'at'an oç̌ala past'eğalt'ine əyite!
5 Ay İak'ovi nəsiləxun bakalorox, efi çadırxo,
Ay israilluyox, efi mandala ganxoy gözəlluğa əyit butene!
6 Xene t'ǒğǒl bakala o k'inək'nan,
Oqe börine bakala bağça,
Q'ončuğon yaratmişi gözəl xodurxo,
Arxe bel bakala şame xod k'inək'nan!
7 Efi xazalxoxun xene k'at'e,
Və̌xun bitala hər śil göyünebaksa!
Ef padçağ Agak' padçağaxunal üst'ün bakale,
T'e padçağluğen bitova çökt'est'ale!
8 Buxačuğon şot'oğo Misirəxune c'evk'i,
Şot'oğo çölnə öküzi zore tadi!
Düşmənxoy pula haq'alt'un,
Ǔq'ěnxo xoxp'i oxurxo şot'oğoy tapane basakalt'un!
9 Mone, cupsuna həzir sa şir k'inək't'un arst'a,
Bask'i aslani gözəlluğe bu şot'oğost'a!
Şuva t'e aslana ı̌ša bitalo?
Və̌x xeyir-bərəkət tadalt'aynak' xeyir-bərəkət,
Və̌x q'arğişbalt'aynak' isə bələne eysa!»
10 T'e vədə Balagi əcuğon Bileami loxol t'etəre biq'i ki, iz kulmoğo yumburuğ biq'i pine: «Va bez düşmənxo q'arğişbseynak'ez k'alpe, yoxsa şot'oğo xeyir-bərəkət tast'eynak'? Mo xibimcine ki, şot'oğoynak' xeyir-bərəkəten k'ale.
11 Aç̌a bez piin běšt'an! C'eki taki vi k'oya! Va şaat' hörmətbi vi çureğala k'inək' yaq'abadala fikirzax buy! Ama Q'ončuğon mot'o vaynak' gelene ak'i».
12 Bileamen isə Balaga pine: «Bez bač'anexun yaq'abit'oğo tez pey ki,
13 Balagen za iz q'ızılen q'a gümüşen buy k'ojal tadayin, zu Q'ončuğoy əyitəxun c'eri hik'k'al bes tez bakon? Zu saycə Q'ončuğon za uk'alt'oğo uk'oz.
14 Baneki, zu bez ölkinə qayezbaksa! Ama barta hələ ki miyazu, va sa şeyal p'ap'esp'az. Gələcəye me azuk'en vi azuk'i bel eçalt'oğo ibaka!»
Bileami gələcəyə aksun
15 Metər piyal Bileamen gələcəyə ak'ala əyitmoğone iz ǰomoxun c'evk'i:
«Mone, Beori ğar Bileamene əyite!
Mone, efi nu ak'alt'oğo ak'alt'in,
16 Efi nu ibakalt'oğo ibakalt'in,
Bitova Bacarbalt'uxun içeynak' sa alaxun ak'esun bakalt'in,
Şot'ay əyitmux iz ǔmǒğo laft'at'an
Oç̌ala past'eğalt'ine əyite!
17 Şot'o azaksa, ama ı̌ša tene!
İz loxolez běğsa, ama hələ ə̌xile!
Mone, muč'uli c'eğalt'ullarik' İak'ovi nəsiləxunal sa padçağe c'eysa,
İsrailluğoy boşt'an zorba sa kule ěqesa!
Moavluğoy bula č'ak'k'ale,
Şet'luğoy mə̌yə duği śark'ale!
18 Edoma iz kiyel badale, Seyra ext'i iz düşmənə turin oq'a sakale!
İsrailluyox isə ěqeğalt'un!
19 İak'ovi nəsiləxun c'erit'in şot'oğo iz zora ak'est'ale,
Şəhəre mandit'oğo bitova k'as'p'i śik'ale!»
Bileami israilluyox nu bakalt'oğoy gələcəyəl ak'i əyitpsun
20 Oşa Bileamen amalegluğoy gələcəyəne ak'i pi:
«Millətxoy boş bitot'uxun üst'üne amalegluyox,
Ama içoğoy axır butene - bito əfçibakalt'un!»
21 Bileamen K'ayini nəsiləxun bakalt'oğoy gələcəyəl anek'i:
«Mone, həysə efi k'ojurxoynak' q'ı̌ butene,
Efi mes q'ayani loxol k'inək'e.
22 Ama, ay K'ayinaxun bakiyorox, aşurluyox eğat'an xarabina mandalnan!
Bito şot'oğoy kiyel baft'alnan».
23 Bileamen gələcəyə ak'i saal pine:
«Vay, Buxačuğon mot'oğo bit'uxun oşa şuva dirist' mandon?
24 K'it't'imluyox gəmiğon eğalt'un,
Şot'oğon Aşura q'a Evera ext'alt'un,
Ama axırda içanal əfçibakalt'un».
25 Mot'oxun oşa Bileam c'eri iz k'oya, Balagal iz k'oyane qaybaki.