12
Maryami q'a Aaroni Moiseyaxun t'ot'opsun
Moiseyen K'uş bölginəxun çuuxe haq'ey, Maryamen q'a Aaronenal mot'o görə t'ot'opsat'un burqi. Şot'oğon pit'un: «Saycə Moiseyene Q'ončuğoy əyitmoğo azuk'a p'ap'esp'e ki? Axıri yanal Q'ončuğoy əyitmoğo azuk'a peyan». Q'ončuğonal mot'o inebaki. Moiseyen isə me dünyəne şuk'k'ali loxol alaxun oq'a běteneğoy.
T'e vədə Q'ončuğon Moiseya, Aarona saal Maryama pine: «Və̌n xiboval ı̌vel çadıra ekinan!» Şoroxal tat'unśi. Q'ončux ı̌vel çadıri bağala gala sa sütün k'inək' asoyi boş śiri Aarona q'a Maryama k'alepi. Şorox ı̌šalayinşakat'an Q'ončuğon pine:
«İsə Bez əyitmoğo ibakanan!
Ef çalxala xavareçalxoxun Zu şot'oğoynak' ak'eśi,
İçoğoy nep'e boş baśiz Za çalxest'on.
Ama Moisey şot'oğoxun soğo tene!
Şot'o dirist' Bez azuk'az tapşurbe! *
Şot'oxun sa dost' k'inək', hər şeya qayez əyite,
Şot'inal Bez xojina aneksa.
P'oy Bez c'ək'p'i k'ul bakala me Moiseyaxun t'ot'opsuna hetərnan ük' bi?»
Q'ončuğoy şot'oğoy loxol gele əcuğone biq'i, Şo t'et'iin ə̌xilebaki. 10 Asoy çadıri loxolxun ěqeśit'uxun oşa Maryami bədənə dirist' map'mas'i yaroğone haq'i. Aaronenal fırıpi běneği ki, Maryami bədənen qǒle tast'a.
11 T'e vədə Aaronen Moiseya pine: «Xoyinšezbsa, bez ağa, beşi axmağluğaxun əşp'est'i me günaxa görə yax caza zapesmada. 12 Ma barta ki, Maryami bədən p'uri nanaxun baki əylin bədən k'inək' bakane. Ma barta ki, nanay tapanexun p'uri, izi qı̌yo bašaybaki c'eri əylə oşq'ardane».
13 Moiseyenal Q'ončuğo k'alpi xoyinšebi: «Ay Buxačux, şot'o q'olayba!» 14 Q'ončuğon isə Moiseya pine: «İz bavan şot'ay ç̌oyel ç̌upiniy, şo vǔğ ği amdarxoy piyexun biti qavuna c'eyes tene bakaliy, isəəl haketər banan! Kot'o ef çurk'ala ganuxun şəpekinan, barta vǔğ ği və̌xun ə̌xilq'an baki, vuğ ğinaxun oşa isə qaybakes banekon».
15 Hametər, israilluğon Maryami tura içoğoy çurk'ala ganuxun vǔğ ğiluğ bot'unt'i, şo içoğoy arane qaybakes bakala ğinal śirik'əl azuk' yaq'a tene baft'i.
16 Maryam qaybakit'uxun oşa israilluğon Xaserot'axun c'eri P'aran ams'i oç̌alat'un hari içoğoynak' çurk'ala ga düzbi.
* 12:7 Əbr. 3:2,5 12:14 Ams'i oç̌. 5:2-3