Ams'i oç̌ala
Běšin əyit
«Ams'i oç̌ala» girken Q'ončuğoy israilluğoxun Sinay buruğoy tume ğaç̌eśi irəziluğaxun oşa baki hadisoğoxune exlətpsa. İsrailluyox me ğaç̌eśi irəziluğaxun oşa hələ 39 usen ams'i oç̌alat'un baki, me vədineyal içoğoy bel gele əşurxone hari.
Q'ončuğon israilluğo misirluğoy kiyelxun çark'est'i, şot'oğoynak' k'anunxo laxi İzi c'ək'p'i azuk' biyal bakayin, şorox p'urumal Şot'ay laxi yaq'axun c'et'unsay. Şot'ay piyes düzgün nu bakala əşurxo biq'sunen Q'ončuğoxun ə̌xil baki günaxt'un əşpest'ay. Mot'o görəl Q'ončuğoy əcuğon biq'i Misirəxun c'eri me günax əşpesti israilluğoy nəvoox hari p'ap'amin şot'oğo ams'i oç̌alane efi. Metərluğen, israilluğon ams'i oç̌ala p'ə̌ nəsilt'un badalbi. Hər nəsil badalbakat'anal şorox siyəyinəne haq'eśi.
Q'ončuğon israilluğo zorba sa q'oşune bsa. Şorox Sinay buruğoxun c'eğat'an ene Misirəxun kap t'it'eri amdarxo k'inək' təə, ama iz běš c'eğalt'oğo əfçibes bakala sa q'oşun k'inək'e c'eysa. Q'ončuğon şot'oğo İz kiine Kənan oç̌ala bakala azuk'xoy loxol taşt'ay. Ama hari t'e oç̌ala bağala zahmana p'ap'at'an, azuk'en p'urum Q'ončuğoxun ç̌o taradi Şot'ay əcuğo biq'esest'a. Me əcuğal tək azuk'i təə, lap İzi c'ək'p'i Moiseyi, Aaroni saal Maryami belal barest'a.
Ama Buxačux İz tadi əyitin loxol çurene. Şot'in İz c'ək'p'i azuk'axun ğaç̌eśi irəziluğa eyexun tene c'evksa, günax əşp'est'i nəsil badalbakit'uxun oşal təzə nəsilə Kənan oç̌alane eşt'a.
Girke axırast'a Q'ončuğon lənətbseynak' k'aleśi Bileama israilluğo ük' tadala əyitmux pest'unen Şot'ay İz c'ək'p'i azuk'a bakala çuresun həmişəluğ baksunane ak'est'a. Şot'in İzi həmişə israilluğoxun baksuna, gələcəyeyal Çark'est'al yaq'absunane əyit tast'a.
Girke boş bakalorox:
1:1-9:23 Q'ončuğoy israilluğo İzi əyit tadi oç̌ala taşt'eynak' həzirbsun
1:1-4:49 Samci kərəm siyəyinə haq'esun
5:1-8:26 Cürbəcür k'anunxo q'a q'aydoox
9:1-23 C'ovaksuni axsibayi q'aydoox
10:1-21:35 Sinay buruğoxun c'eri Moava p'ap'amin baki hadisoox
10:1-11:35 İsrailluğoy yaq'a baft'it'uxun oşa Q'ončuğoxun t'ot'opsun q'a Q'ončuğoy şot'oğo caza tast'un
12:1-16 Aaroni q'a Maryami Moiseyaxun t'ot'opsun, Q'ončuğoy şot'oğo caza tast'un
13:1-14:45 Əyit tadeśi oç̌ala běğsun q'a t'iya yaq'abaki amdarxoy hari azuk'a q'ı̌dest'un; Q'ončuğon azuk'a ams'i oç̌ala hələ q'ırx usen efalane baksa
15:1-41 Q'erəzəl sa hema k'anun
16:1-18:32 Goraxi, Dat'ani saal Avirami Q'ončuğoy əleyinə c'eysun q'a Q'ončuğon şot'oğo leviğoy İzi c'ək'p'iyorox baksuna ak'est'un
19:1-22 Č'oč'a arak' q'a pakbseynak' bakala xe
20:1-29 Q'ončuğon Moiseyi q'a Aaroni Kənan oç̌ala nu baysuna q'ərare tast'a; Maryami q'a Aaroni bisun
21:1-35 Moava ı̌šalayinşaksun, israilluğoy azuk'xoxun davabi şot'oğo taşt'un
22:1-32:42 Moava baki hadisoox
22:1-24:25 İsrailluğo q'arğişbseynak' k'aleśi Bileami xeyir bərəkət tast'un
25:1-17 Azuk'i Q'ončuğoxun ç̌o taradi binik' buxačuğo bul k'os'bsun q'a iz caza
26:1-30:16 İsrailluğoy p'ə̌mci kərəm siyəyinə haq'esun q'a q'erəzəl sa hema q'aydoox
31:1-32:42 Midyanluğoxun həyif haq'sun q'a İordan oq'e běğ c'eğalaç tərəf bakala oç̌alxo cöybsun
33:1-49 İsrailluğoy ams'i oç̌ala çurpi ganxoy siyəyi
33:50-36:13 Q'ončuğoy israilluğo içoğo miras k'inək' koft'i oç̌ala c'öybsuna, t'e oç̌aliyal içoğoy kiyelxun nu tərbsuna tapşurbsun
1
İsrailluğoy samci kərəm siyəyinə haq'esun
1 İsrailluğoy Misirəxun c'eysuni p'ə̌mci useni p'ə̌mci xaşe samci ğiney. Sinay ams'i oç̌ala, Q'ončuğon ı̌vel çadıra Moiseya pine:
2 «Bütüm israilluğoy işq'arxo siyəyinə haq'anan. Bǒq'ə̌leğala bütüm işq'arxoy s'iyurxo içoğoy əsilə q'a ailinə görə soğo-soğo śampanan.
3 Hun q'a Aaronen israilluğoy boş q'a saal q'a yəşəxun ala bakala, davina tayes bakala bito işq'arxo bǒq'ə̌lpi dəst'oğo cöybalnan.
4 Barta və̌x hər tayfinaxun iz ailin kalo bakala sa işq'aren köməybeq'an.
5 Mone, və̌x köməybalorox morox bakale:
Ruveni tayfinaxun - Şedeuri ğar Elisur;
6 Simeoni tayfinaxun - Śurişaddayi ğar Şelumiel;
7 İuday tayfinaxun - Amminadavi ğar Naxşon;
8 İssak'ari tayfinaxun - Śuari ğar Net'anel;
9 Zevuluni tayfinaxun - Xeloni ğar Eliav;
10 İosifi nəsiləxun bakala:
Efraimi tayfinaxun Ammihudi ğar Elişama saal Menaşşeni tayfinaxun P'edaśuri ğar Gamliel;
11 Binyamini tayfinaxun - Gidoni ğar Avidan;
12 Dane tayfinaxun - Ammişaddayi ğar Axiezer;
13 Aşeri tayfinaxun - Ok'rani ğar P'agiel;
14 Gade tayfinaxun - Deueli ğar Elyasaf;
15 Naft'alin tayfinaxun - Enani ğar Axira».
16 Morox israilluğoxun təyinbaki, içoğoy tayfin q'a əsili boş kalo hesabbakala amdarxot'uniy.
17 Moiseyen q'a Aaronenal me s'iyurxo duğeśi amdarxoxun sagala
18 p'ə̌mci xaşe samci ğine bütüm israilluğo topt'unbi. Şot'oğon q'a yəşt'ə saal q'a yəşəxun ala bakala bütüm işq'arxo içoğoy əsilə q'a ailinə görə soğo-soğo siyəyinət'un haq'i.
19 Hametər, şot'oğon Sinay ams'i oç̌ala Q'ončuğon Moiseya əmirbi k'inək' azuk'a siyəyinət'un haq'i.
20 İsraili samci ğar Ruveni nəsiləxun q'a saal q'a yəşəxun ala bakala, davina tayes bakalt'oğoy bitot'ay s'iyurxo içoğoy əsilə saal ailinə görə soğo-soğo siyəyinəne haq'eśi.
21 Ruveni tayfinaxun siyəyinə haq'eśit'oğoy say 46 500 taney.
22 Simeoni nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
23 Simeoni tayfinaxun siyəyinə haq'eśit'oğoy say 59 300 taney.
24 Gade nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə siyəyinəne haq'eśi.
25 Gade tayfinaxun siyəyinə haq'eśit'oğoy say 45 650 taney.
26 İuday nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
27 İuday tayfinaxun siyəyinə haq'eśit'oğoy say 74 600 taney.
28 İssak'ari nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
29 İssak'ari tayfinaxun siyəyinə haq'eśit'oğoy say 54 400 taney.
30 Zevuluni nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
31 Zevuluni tayfinaxun siyəyinə haq'eśit'oğoy say 57 400 taney.
32 İosifi ğarmoğoy nəsiləl bǒq'ə̌leśi. Efraimi nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy nəsilə saal ailinə görə soğo-soğo siyəyinəne haq'eśi.
33 Efraimi tayfinaxun siyəyinə haq'eśit'oğoy say 40 500 taney.
34 Menaşşeni nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinə haq'eśi.
35 Menaşşeni tayfinaxun siyəyinə haq'eśit'oğoy say 32 200 taney.
36 Binyamini nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
37 Binyamini nəsiləxun siyəyinə haq'eśit'oğoy say 35 400 taney.
38 Dane nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
39 Dane tayfinaxun siyəyinə haq'eśit'oğoy say 62 700 taney.
40 Aşeri nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
41 Aşeri tayfinaxun siyəyinə haq'eśit'oğoy say 41 500 taney.
42 Naft'alin nəsiləxun q'a saal q'a yəşəxun ala bakala, davina tayes bakala bito işq'arxoy s'iyurxo içoğoy əsilə saal ailinə görə soğo-soğo siyəyinəne haq'eśi.
43 Naft'alin tayfinaxun siyəyinə haq'eśit'oğoy say 53 400 taney.
44 Metərluğen, Moiseyen, Aaronen saal israilluğoy boşt'an c'ək'eśi, içoğoy ailoğoy kalo bakala p'as's'e işq'aren me amdarxone siyəyinə haq'i.
45 İsrailluğoxun içoğoy ailoğo görə davina tayes bakala, q'a saal q'a yəşəxun ala siyəyinə haq'eśi
46 bito işq'arxoy say 603 550 taney.
47 Ama Levin tayfinaxun bakalorox siyəyinə tet'un haq'eśi,
48 şot'aynak' ki, Q'ončuğon Moiseya peney:
49 «Levin tayfinaxun bakalt'oğo israilluğoxun sagala me siyəyinə hamaq'a.
50 Şot'oğo irəziluği çadıra saal şot'ay boş q'ulluğbseynak' lazım bakala bütüm ət't'əcxo běğsuna tapşurba. Barta və̌n ef ganu badalbat'an irəziluği çadıra saal şot'ay bütüm şeyurxo şot'oğonq'at'un taşeri. Çadıra şot'oğon běğalat'un, içoğoy çurk'ala ganuval çadıri hərrəmineq'at'un düzbi.
51 Çadıra sa ganuxun t'iyə̌mi ganu taşat'an barta leviğonq'an şot'o t'at'api, çadıra girbsunal şot'oğo tapşurba. Kot'oğoxun başq'a çadıra ı̌šalayinşakala amdar biyalane.
52 Barta israilluğon dəst'oğo cöybakiq'at'un içoğoy çurk'ala ganu düzbi, içoğoy mani tayfinaxun baksuna ak'est'ala nišana laxsunal eyexun maq'at'un c'evk'i. Hər işq'ar iz dəst'inəq'an baki.
53 Leviğon isə içoğoy çurk'ala ganu irəziluği çadıri hərrəmineq'at'un düzbi, şot'o görə ki, çadıra şot'oğon běğalat'un. Tene İzi əyitəxun c'eysuna görə Q'ončuğoy əcuğ israilluğoy loxol barale».
54 İsrailluğonal mot'oğo bitova Q'ončuğon Moiseya pi k'inək' bit'un.