İak'ovi namak'
Běšin əyit
Me namak'a śampi İak'ov İsusi Çark'est'al baksuna q'abulbit'oğoy cəmiyətə gele hörmətlu, śila sa amdarey. Şo İsusaxun sagala kalabaki, ama Çark'est'al baksuna Şot'ay dirist' vədine təə, p'uri běyinbakit'uxun oşa q'abulbit'oğoxuney. Alimxoy fikirə görə İak'ovi me namak' İsus běyinbakit'uxun oşa śameśi girkurxoy boş ən süft'ə śameśit'oğoxun soğone. Maya śamesuna dəgig nuval avabakayan, namak'i tarix hari 45-50-ci usenxone c'eysa.
İak'ovi iudeyxoynak' śampi me namak' pes banekon ögüd-nəsyət tadala sa namak'e. Miya çark'esuna q'azayinşbsun çureğalt'oğo tadeśi nəsyətxoy boş müdrik baki axıral śirik' portpsun, tamaxa nu bafst'un, Mǔq Xavara ibaki şot'o əməlbsun, çureğalt'oğo Buxačuğoxun afırıpi çuresun, varlu-kəsib nu c'ək'psun, muza girbsun, hər şeyi Buxačuğoy kiyel baksuna q'amişaksun saal me dünyəne dəyərlu bakalt'oğo təə, ama Buxačuğo bitot'uxun üst'ün laxsune bu.
İak'ovi döörəst'a İsusi Çark'est'al baksuna q'abulbit'oğoy gelo hələ ki saycə iudeyxoney, mo İak'oven izi müdrik nəsyətxo tadat'an lap Solomon k'inək' əyitpsunaxunal ak'esa.
Girke boş bakalorox:
1:1 Namak'i iudeyxoynak' baksuna ak'est'ala burqesun
1:2-12 İzi var-dövlətə güvəyinşakalt'u təə, müdrik baki axıral śirik' portp'alt'u tadeğale
1:13-18 Sinəyinşalo təə, yəşəyinş tadalone Buxačux
1:19-27 İbakit'oğo əməlbanan
2:1-13 Bitot'ay loxol sa piin běğanan
2:14-26 Vi věluğa vi biq'ala əşurxon ten ak'est'asa, şot'ay sa xeyir tene bu
3:1-12 Əyitmoğon bes bakalt'oğoy barada
3:13-18 Həgigi müdrikluğ
4:1-12 Və̌x Buxačuğoy běš oq'a biq'anan
4:13-17 Hər şey Buxačuğoy kiyele
5:1-6 Ef ğina ǒnepanan, ay dövlətluyorox
5:7-11 Axıral śirik' portp'alt'u tadeğale
5:12 Elaspsunaxun ə̌xil bakanan
5:13-18 Afırıpsunen bes bakalorox
5:19-20 Axırınci nəsyət
1
1 İsraili p'as's'e tayfinaxun bakit'oğoynak', İsus Xrist'osi Çark'est'al baksuna q'abulbi, me dünyəne śareśi bito iudeyxoynak' xeyirq'an baki. Buxačuğoy q'a Q'ončux İsus Xrist'osi nökər bakala İak'ovene śame və̌ynak'.
İzi var-dövlətə güvəyinşakalt'u təə, müdrik baki axıral śirik' portp'alt'u tadeğale
2 Bez viçimux, ef běš və̌x düz yaq'axun c'evk'es bakala hetər çətinluğ c'eğale c'ereq'an, şot'o kala sa mǔqluğen q'abulbanan.
3 Efi hər çətinluğa baft'i věluğa nu aç̌espsunen və̌st'a oşin çətinluğa bakala portpsunane avuzbsa.
4 Çətinluğxo portpsunenal və̌x ap'i, noxsansuz sa amdare bsa.
5 Əgər şunesa mot'aynak' müdrikluğe lazımsa, barta t'e müdrikluğa Buxačuğoxunq'an çureśi, şot'oval tadeğale. Şot'o görə ki, taxsıra ç̌oyel duğinut, me müdrikluğaxun bol-bol bitova paybala Buxačuxe Şo.
6 Ama çureğat'an věbakiq'an çureśi barta, izi çureğalt'u haq'sunaxun maq'an şüpələyinşaki. Şot'o görə ki, şüpələyinşakalo muşen fupi taşala dənizi ləpə k'inək'e, taśi q'ayana laft'i śaresune şot'ay axır.
7 Metər amdaren Buxačuğoxun k'ənesa haq'es baksuni fikirə iz eyexun c'evk'eq'an.
8 İzi mani yaq'en taysuna q'ərar nu tadiyone şo, burqi əşlə bex nu p'ap'esp'alone.
9 Ay viçimux, barta ef boş bakala kəsibeynak' izi bitot'uxun oq'a baksun içeynak' sa var-dövlətq'an baki, şot'aynak' ki, şo Buxačuğoy piyes bitot'uxun üst'üne.
10 Varlu bakalt'u isə Buxačuğon şot'in içu oq'a biq'at'ane ěqevk'on, şot'o görə ki, şot'ost'a bakala var-dövlət c'ovaki tağala sa şeye, q'oruğa əfçibaki tağala sa vard k'inək'e.
11 Běğen c'eri şerebit'uxun oşa çukeśi bitala t'e varde gözəlluğaxun sal irizal tene mandon. Varlu amdaral haketər: izi əşp'i girbala vədine əfçibaki taneğon şo.
Sinəyinşalo təə, yəşəyinş tadalone Buxačux
12 Bəxt'əvəre çətinluğxo portp'i şot'oğoxun ç̌omas'i c'eğalorox, şot'o görə ki, Buxačuğon İçu çureğalt'oğo əyit tadi həmişəluğ yəşəyinşə pay k'inək' haq'alorox bakale şorox.
13 Efi biq'ala əşlin günax baksuna avabaksun şot'ay běš aciz mandat'an, umapanan "mo za Buxačuğone sinəyinşbsa". Buxačux nə İç tamaxa baft'ala Buxačux tene, nəəl şunesa tamaxa bast'unen sinəyinşala Buxačux tene.
14 Amdara günaxi běš aciz efi sinəyinşalo izi tamaxxone. Günax bakala şeymoğo tamaxp'i çuresunene amdara düz nu bakala yaq'a zapi günax best'on.
15 Me tamaxen amdari boş tum sakat'an günaxe əmələ eysa. Əmələ hari günaxi eçala baral bisune baksa.
16 Ay zaynak' əziz bakala viçimux, běğanan feret'mabakanan.
17 Buxačuğon, göynul bakala muč'uliğo yaratmişi Bavan, yax şaat' şeymuxe tadon. Şot'ay yax tadala payurxo noxsansuz payurxone. Nu badalbakalone Şo, xoji k'inək' nu c'ovaki tağalone.
18 Axıri Şot'in İçine me nu badalbakala, yəşəyinş tades bakala, əyitə beş boş tum sakest'i. Bar eçeriyal nübəryan baki yan Şot'aynak' İzi yarat'mişit'oğoy boş.
İbakit'oğo əməlbanan
19 Ay bez əziz viçimux, běğanan və̌x k'əz nex: gele əyitp'i usum bəc'ük'esunaxun ə̌xil bakanan, bartanan və̌ynak' ǔmǔxlaxsunq'an běš baki.
20 Əcuğon biq'i amdareynak' Buxačuğoy piyes şaat' ak'eğala əşur biq'sun mümkün tene.
21 Şot'o görəl, pisluğa q'a posp'i və̌x murdarlayinşes bakala əcuğo t'ǒǒxbanan, bartanan və̌x çark'est'es bakala Əyiten ef boş tum sakesq'an baki. Mot'o mǔqluğen q'abulbanan!
22 Q'abulpsun isə saycə ǔmǔxlaxsun təə, efi ibakit'oğo əməlbsun upsune, tene və̌n və̌x əfçiduğinan baksa.
23 Şot'o görə ki, Əyitə ibaki, ama Şot'o nu əməlbala amdar güzginə běğat'an içu ak'ala amdar k'inək'e.
24 Güzgin běšt'an tağay tağala k'inək' iz ç̌o iz eyexun c'eneğon şot'ay.
25 Ama yax çark'est'es bakala Buxačuğoy noxsansuz k'anuna ibaki şot'o əməlbala amdar bəxt'əvəre! Xeyir-bərəkət haq'ale şot'in iz biq'ala əşurxost'a!
26 İçu Buxačuğo vě sa amdar hesabbi, ama izi ǰomoy q'aroola zapes nu bakalt'ay věluğaxun sa xeyir tene bu, ams'i exləte hat'etər.
27 Buxačuğo həgigiyal vě bakala amdaren yetimxo q'a süpür mandi çupuxxo kule boxodon, me dünyəne bakala pisluği xojinal izi loxol bist'a tene bark'on t'e amdaren. Metərt'ay věluğe Buxačuğoy, beşi göynul bakala Bavay piyes təmiz hamal noxsansuz ak'eğon.