İOANİ
P'Ə̌MCİ NAMAK'
Běšin əyit
İoanen me namak'a iz süft'in namak'i bač'anexun, həysət'in T'urśiya bakala Efesa, İsusi nanaxun bakit'uxun təxminən 90 usen oşane śampe. Şot'in iz süft'in namak'a bütüm věbakalxoynak'e śampey, me namak'a isə izi "c'ək'eśi xanım" s'i tadi věbakalxoy cəmiyəteynak'e śame.
Me namak'i boş İoanen İsusa q'abulbit'oğoy gelet'ay düz yaq'a baksuna, Şot'ay sakala işiği boş yəşəyinşbsuna ibaki, izi mot'o görə hetər mǔq baksunane ak'est'a. Ama şot'in hələl ayığ baki əfçi zombalxo nu feret'baksuna, sun-suna çuresuna, hamal Q'ončux İsusi me dünyəne amdarxoy çark'eseynak' hari sa Seri Bakalo k'inək' q'abulbsunane k'ale. Seri Bakalo isə Buxačux baksun me dünyəne amdar k'inək' hariyone!
1
1 Və̌ynak' me namak'a śamk'ala, efi Seri Bakalt'u çalxi "c'ək'eśiyorox" baksuna görə və̌x ük'en çureğala ağsaq'q'alaxun xeyirq'an baki! Ama və̌x saycə zu təə, Şot'o çalxalt'oğoy bitot'in çuresa.
2 Axıri Seri Bakalo yast'ane, həmişəəl yaxun bakale.
3 Barta Buxačuğoxun q'a İz Ğar bakala İsus Xrist'osaxun eğala ük' bok'ospsun, xeyirxaxluğ saal serluğ yaxunq'an baki. Mot'oğo serina çalxsunen q'a suna çuresunen yəşəyinşbsunenyan haq'es bakon.
Sun-suna çurekinan
4 Ef arane seri bakala yaq'en taśi Buxačuğoy əmirxo əməlbalxoy baksuna ibaki heq'ədər mǔqezbaki!
5 Ay bezi c'ək'eśiyorox, həysə zu və̌ynak' śamk'alo təzə sa əmir tene. Mo İsusi yaq'en taśi ğinaxun yaynak' laxeśi k'anune - suna çureğalayan.
6 Çuresun isə Buxačuğoy yaq'en taśi, Şot'in yast'a aksun çureğalt'oğo beş əməlxon ak'est'une. Ef ömüri hər ğinal me yaq'en tağala ğinaxun ibaki əmiren c'ovakest'anan.
7 Mot'o gele əfçiduğalxo meydane c'eysuna görəz və̌ynak' śame. Şot'oğon İsus Xrist'osi sa amdar k'inək' me dünyəne eysuna tet'un q'abulbsa, şorox bito əfçiduğalxo q'a Xrist'osi düşmən bakaloroxe.
8 Běğanan ki, efi memaçağ biyorox maq'an batk'i, layiğ bakala mükəfətəl tam haq'es bakanan.
9 İsus Xrist'osi zombsunaxun c'eri q'erəz yaq'en tağalo Buxačuğoxun tene. Ama Xrist'osi laxi yaq'axun nu c'eri Şot'ay pit'oğo əməlbalo ham Buxačuğo ı̌šane, ham Ğara.
10 Ef t'ǒğǒl hari me düzgün zombsunaxun ə̌xil bakala sa zombsun eçalt'u nə ef k'ojurxo ma bartanan, nə iz běš ma c'ekinan.
11 Şot'aynak' ki, metər amdara iz k'oya q'abulbalo şot'ay şər əməlxo şərik bakine baksa.
Dirist'oğonbsun
12 Və̌ynak' gele şeyez śamk'oy, ama mot'oğo namak'en upsun tez çureśi, Buxačuğon bark'ayin və̌xun ef t'ǒğǒl hari exlətp'oz, beş mǔqluğal gərbaki lap bol bakale.
13 Və̌ynak' miya bakala efi c'ək'eśi xunçey əyloğon dirist'uğt'un yaq'absa.