İOANİ
SAMCİ NAMAK'
Běšin əyit
Me namak'a śampi İoan İsusi c'ək'p'i p'as's'e şagirdxoxun soğone bake. Mo hat'e "İoanen śampi Mǔq Xavar" saal Bibliina ən axırınci girk bakala "İoana qayeśi əyit" girkurxo śampi İoane.
Alimxoy fikiren İoanen me namak'a həysət'in T'urśiya bakala Efesa, təxminən İsusi nanaxun bakit'uxun 90 usen oşane śampe. Namak' Efesa śameśiyal bakayin, şo saycə efesluğoynak' nəəl maninesa věbakalxoy cəmiyəteynak' təə, Mǔq Xavara věbaki İsusa q'abulbit'oğoynak' bit'ot'aynak'e śameśe.
İoan memiya ene yəşlu sa amdare. Şot'in iz namak'i boş sa ağsaq'q'al k'inək' věbakalxo ük'e tast'a, şot'oğo İsusi yaq'en taysunast'a běš c'eğala çətinluğxo hetər portbsuni barada maslaatxone tast'a. T'e vədə bakala cəmiyətxost'a İsusa nu q'abulbala, Şot'ay me dünyəne ham Buxačux, hamal sa amdar k'inək' eysuna nu věbakala gele zombalxone buy. İoanen şot'oğoy əfçi zombsunxo nu feret'baksuni yaq'moğone ak'est'a.
Girke boş əsəs p'ə̌ fikire bu: věbakalxoy suna ük'in çuresuna ak'est'un saal həmişə bakala Q'ončux İsusi me dünyəne sa amdar k'inək' eysuna q'abulbsun. İsusa q'abulbi çark'esun q'azayinşi amdarxoy bitot'in me p'ə̌ fikirə əsəs biq'alat'un. Şot'oğon me günaxkər dünyəne bakala sal sa şeya nu tamaxbalat'un, axıri morox həmişəluğ tene. Ama İsusi şot'oğoy günaxxoy gala p'uri şot'oğo İz p'iyen os'k'i taşt'un me dünyəne bakala hər şeyaxun üst'üne!
İoanen me namak'i boşal İoanen śampi Mǔq Xavar girke boş bakalt'ullarik' İsusa "yəşəyinş tadala Əyit" k'inək'e ak'est'a. Me Əyitə q'abulbalt'inal həmişəluğ yəşəyinşəne haq'i baksa, şo hevaxt'sa lamandi biyaltayin hayzale, şot'o görə ki, Q'ončux içuxune! İsusa içuxun qoşbalt'in Buxačuğone içuxun qoşbi baksa, İsusa çalxi q'abulbalt'in isə Buxačuğo ı̌šalayinşaki, Şot'ay yax tadi çark'esuna q'azayinşine baksa!
Girke boş bakalorox:
1:1-4 Yəşəyinş tadala Əyit
1:5-2:2 İşiğ q'a bayinq'luğ, günax q'a bağışlayinşaksun
2:3-14 Buxačuğo çalxsun Şot'ay çureğalt'oğo əməlbsun upsune
2:15-17 Dünyənə ma çurekinan
2:18-27 Xrist'osi əleyinə bakalt'oğoy barada xavardarluğ
2:28-3:24 Buxačuğoy əylux hesabbakalorox
4:1-6 İsus Xrist'osa nu çalxalo Buxačuğoxun tene
4:7-21 Buxačux - çuresune
5:1-5 Me dünyənə q'alib hariyo
5:6-12 Buxačuğoy Ğara çalxest'ala xib şahid
5:13-21 Həmişəluğ yəşəyinş
1
Yəşəyinş tadala Əyit
1 Yan həysə hələ burqesunaxun baki, şot'o beş piin ak'i, ibaki q'a fikir tadi, şot'o beş kiin hisp'i Əyiti baradayan və̌x p'ap'espsun çuresa, manu ki yəşəyinş tadala Əyite.
2 Şo beşi aranene hari. Şo Bavaxun sagala baki, oşaal İçu yaynak' ak'est'i Yəşəyinşe. İsəəl me barada şahidluğbi və̌xyan p'ap'espsa.
3 Yan beşi ak'it'oğoy q'a ibakit'oğoy barada və̌x p'ap'esyanpsa ki, və̌nal yaxun soğo bakanan, hetər ki Yan Bavaxun q'a İz Ğar İsus Xrist'osaxun sayan.
4 Yan mot'o şot'aynak'yan śame ki, və̌nal beş mǔqluğa şərik baki şot'o bol banan.
İşiğ q'a bayinq'luğ, günax q'a bağışlayinşaksun
5 Xrist'osaxun beşi ibaki isəəl yan və̌x p'ap'esp'ala xavar mone: Buxačux işiğe, Şot'ost'a sal sa bayinq'luğ butene.
6 Əgər yan "Buxačuğoy yaq'enyan taysa" upsun bayinq'luğayan taranesa, t'e vədə əfçiyan əyitp'i baksa, serinaxunal ə̌xilyan baksa.
7 Ama Buxačux işiğa bakala k'inək' yanal işiğayan taranesa, t'e vədə beşi - me işiği boş tarak'alt'oğoy ük' sane baksa, Şot'ay Ğar İsusi p'iyenal beşi hər günaxa os'k'i taneşt'a.
8 Əgər uk'ayan ki, günaxsuzyan, yan yax əfçi duğiyan baksa, yast'al seri uk'ala şey tene baksa.
9 Ama beşi günaxxo ozane ext'ayan, Buxačuğonal şot'oğo bağışlayinşi yax düzgün nu bakala hər şeyaxun təmizbale.
10 Beşi "günax teyan əşp'est'e" upsunen isə Şot'o əfçiduğalyan c'evksa, Şot'ay piyorox yast'anu bakine baksa.