8
Ğaç̌eśi təzə irəziluği Samci Běyinš İsus
1 Mone, bito me əyitmoğon şot'oyan upsun çuresa ki, beşi Ala Arśit'ay, göyurxo İçeynak' ı̌vel çadır Bit'ay yön tərəf arśi sa Samci Běyinšyaxbu.
2 Amdarxoy kiin biq'eśi ı̌vel çadıra q'ulluğbala samci běyinš təə, Q'ončuğon İçin laxi, əsil ı̌vel çadıra q'ulluğbala Samci Běyinš!
3 Avayan ki, samci běyinšxoy əş payurxo q'a q'urbanxo eşt'une, şot'o görə beşi Samci Běyinšiyal q'urban eşt'eynak' hik'ənesa bakalaney.
4 Əgər Şo me dünyəne bakiyniy, Şo sal adi běyinš tene bakoy, şot'o görə ki, miya Moiseyen śampi k'anunen q'urban eçala běyinšxo ene bune.
5 Me běyinšxoy q'ulluğbala ı̌vel çadır göynul laxeśi ı̌vel çadıra oşq'arst'axun q'erəz hik'k'al tene - iç təə, şot'ay sakala xoji k'inək'e. Şot'o görəne Moiseyen ı̌vel çadıra laxalt'uxun běš Buxačuğon şot'o pi: "Běğa, bitova dəgig Zu va me buruğo ak'est'it'ullarik' düzba".
6 Ama həysə İsusa bex p'ap'espseynak' tadeśi q'ulluğ me běyinšxoy bala q'ulluğaxun üst'üne. Şot'o görə ki, Buxačuğoy yaxun ğaç̌eśi me təzə irəziluğal, Şot'ay yax tadala umudal süft'int'uxun üst'üne.
7 Əgər samci ğaç̌eśi irəziluğast'a kamluğ nu bakiyniy, t'e vədə p'ə̌mcit'u k'ə eht'iyəce bakoy?
8 Buxačuǧonal me irəziluğaxun oşa amdarxoy hələl günaxi boş baksuna aneksay, şot'o görəne pi:
"Q'ončuğon metəre bayanbsa:
Mone, vaxt' ı̌šalayinşebaksa!
İsraili azuk'axun, İuday tayfinaxun təzə sa irəziluğ ğaç̌eğoz.
9 Me irəziluğ Zu içoğoy bavoğo kiyexun biq'i Misirəxun c'evk'at'an
Şot'oğoxun ğaç̌eśi irəziluğ k'inək' tene bakal.
Şorox t'e irəziluğa ğaç̌eğat'an tadi əyiti loxol tet'un çurpi,
Zuval Bezi ç̌oya şot'oğoxun tarazdi.
Q'ončuğon metəre nex:
10 Bezi israilluğoxun ğaç̌eğala irəziluğ metər bakale:
Bezi k'anunxo şot'oğoy beyne,
İçoğoy ük'e loxol śamk'oz.
Zu şot'oğoy Buxačux,
İçanal Zaynak' əziz bakala sa azuk' bakalt'un!
11 T'e vədə viçey viçə, amdarxoy suna
<Q'ončuğo çalxa> upsuna eht'iyəc tene bakal,
Şot'o görə ki, kala-mis'ik' bitot'in Za çalxale.
12 T'e vədə Zuval şot'oğo Bez əyitəxun c'eysuni cazina tez zapest'al,
Şot'oğoy əşp'est'i günaxxoy loxolxun tez duğal".
13 Buxačuğon me irəziluğa "təzə" upsunen, bisit'ay ene nu əşesunane ak'est'i. Axıri bisi baki, nu əşeğala hər şey əfçibaki tanesa.