Əbraniğoynak' namak'
Běšin əyit
Me namak' İsusi nanaxun baksunaxun, yəni beşi erin təxminən 60-70-ci usenxone śameśe. Me namak'i maya śamesuna q'a şot'o şin śamsuna avateyan. Ama namak'a k'alk'at'an ak'esa ki, śampiyo İsusi yaq'en taysa burqi əbraniğoy boş çalxeğala, s'ila amdare bake. Şot'in izi əyitə qay, bəzi ganxo lap töhmətbsune p'ap'espsa. Namak' İsusa Buxačuğoy Ğar, Şot'ay yaq'abi Çark'est'al k'inək' nu q'abulbi düzgün yaq'axun c'eğala əbraniğoynak'e śameśe.
Namak'a śampit'in İsusi yaynak' bit'u, İçu q'urban tadi beşi günaxxo os'k'i taşt'una nu q'abulbalt'aynak' çarkesun nu baksunane ak'est'a. Ǐvel śame boş bakalt'oğo Buxačuğoxun ə̌xil baki günaxaç tağala əbraniğoy piyelxun p'urum c'ovakest'i İsusi bito xavareçalxoxun, bito samci běyinšxoxun, lap angelxoxunal üst'ün baksunane ç̌oyel c'evksa. Süft'in irəziluğa görə leviğoxun c'ək'eğala samci běyinšxon Q'ončuğoy běš šampi bito q'urbanluğ heyvanxoy p'iyen nu bes bakalt'u, İsusen İz bədənə q'urban tadat'an śipi p'iyene bi! Me q'urbana q'abulbit'oğoy günaxxo Şot'ay bari p'iyene tumexun os'k'i taşeri! Buxačuğon Şot'ay eçeri q'urbana q'abulebi, Şot'o p'uri ganuxun běyinbi beşi günaxxo bağışlayinşest'ala Həmişəluğ Samci Běyinşe bi! Metərluğen, İsus Buxačuğoy yaxun ğaç̌eśi təzə irəziluğa bex p'ap'esp'iyone baki!
Namak'i axırınci bulurxost'a İsusa q'abulbi, Şot'ay śipi p'iye loxolxun nu ç̌axp'i c'ovakalt'oğoynak' həzirbaki neymətxoxune əyitesa. Buxačuğoy padçağluğa, həmişəluğ yəşəyinşə tağala yaq' saycə İsusaxune c'ovak'sa! Mot'aynak'al namak'a śampit'in yax beşi věluğa nu malbsuna, beşi věluğast'a ost'aar çurpsunane k'ale. İçoğost'a metər věluğ baksuna görə Buxačuğoy piyes şaat' ak'eśit'oğoy s'iya duği yax ük'e tast'a.
Namak' ögüd-nəsyət q'a xeyir-bərəkət tast'unen saal dirist'uğ yaq'absunene çark'sa.
Girke boş bakalorox:
1:1-3 Ğara ak'alt'in Bava ak'ine baksa
1:4-2:18 İsus Xrist'osi angelxoxun üst'ün baksun
3:1-4:13 İsus Xrist'osi Moiseyaxunal, Yeşuaxunal üst'ün baksun
3:1-6 İsus Xrist'os Moiseyaxun üst'üne
3:7-4:13 Buxačuğon əyit tadi irəətluğa Yeşuan təə, İsusene tast'a
4:14-7:28 İsus Xrist'osi bito samci běyinšxoxun üst'ün baksun
4:14-5:10 İsus Xrist'os Melk'isedek'allarik həmişəluğ bakala sa Samci Běyinše
5:11-6:12 Věluğast'a ost'aar çurpsuna q'a düz yaq'axun nu c'eysuna k'alpsun
6:13-7:28 Buxačuğoy İzi tadi əyitin loxol çurpsun q'a İsusi bito běyinšxoxun, lap Melk'isedek'axunal üst'ün baksun
8:1-10:39 İsusi bex p'ap'esp'i təzə irəziluği süft'in irəziluğaxun üst'ün baksun
8:1-13 Ğaç̌eśi təzə irəziluği Samci Běyinš İsus
9:1-10:18 İsus Xrist'osaxun oşa günaxxo os'k'seynak' q'erəz sal sa q'urbana ehtiyəc nu baksun
10:19-39 Věluğa nu malbi günax əşpest'unaxun ə̌xil baksuna k'alpsun
11:1-40 Věluği loxol ost'aar çurpi Buxačuğoy piyes şaat' ak'eśiyorox
12:1-29 Buxačuğoy yaynak' bala bavaluğ
13:1-25 Ögüd-nəsyətxo saal namak'a yaq'abalt'oğoynak' tadala xeyir-bərəkət q'a dirist'uğxo.
1
Ğarene Buxačuğo amdarxo çalxest'a
1 Buxačuğon beşi bavoğo İzi əyitə upsun çureğat'an həmişə xavareçalxone əyitp'est'e, hər dəfəl cürbəcür yönene mot'o ak'est'e.
2 Həysə isə, me dünyəni axıreynak' mal mandi sa vədine, Şot'o yax İzi Ğarene çalxest'a, İzi me dünyəne hər şeye loxol kalo laxi Ğaren, hər şeya İçuxun sagala yaratmişi Ğaren.
3 Ğarast'ayan aksa Bavay kalaluğa, perin sa ç̌oyel śameśit'oğo t'e soğo ç̌oyel ak'ala k'inək', Ğara ak'alt'inal Bava ak'ine baksa. Şot'ine İzi hər şeya bacarbala əyiten me dünyənə efsa. Şone beşi günaxxo os'k'i taşeri Ala Arśit'ay yön tərəf, ən hörmətlu gala Arśiyo.
Ğar angelxoxun üst'üne
4 İsus Q'ončux k'inək'e çalxeśi. Me s'i angelxo tadeśi s'iyaxun üst'üne, hetər ki, İçal şot'oğoxun üst'üne.
5 Axıri Buxačuğon mani angela hevaxt'esa
"Hun Bezi Ğarnu,
Zu ğeyinaxun Vi Bava k'aleğoz" pe?
Nəəl ki
"Zu Şot'ay Bava k'aleğoz,
Şoval Bezi Ğar"?
6 İzi süft'in Ğara dünyəne yaq'abat'an isə, Buxačuğon nexe:
"Barta Buxačuğoy bütüm angelxon Şot'o bulq'at'un k'os'bi".
7 Angelxoy barada metəre śameśe:
"Angelxo Şot'ay əyiten muş İzi əyiten tağala k'inək'e taysa,
Q'ulluğçiğo Şot'in bok'ala aruxe bsa".
8 Ğara isə nexe:
"Ay Buxačux, Vi taxt' həmişəluğe,
Düzgünluğen efale Vi padçağluğa.
9 Hun düzgünluğan c'ək'p'i, pisluğa isə nifrətenbi.
Kot'aynak'al, Buxačuğon, Vi bakala Buxačuğon, Va kala mǔqluğen c'ək'p'i
T'iyə̌mint'oğoxun bitot'uxun üst'üne bi".
10 Ğare barada metərəl śame:
"Ay Q'ončux, Hunnu oç̌alin binorina laxiyo,
Göyurxoval Vi kiyexun c'eri əşe.
11 Şorox əfçibaki tağalt'un, ama Hun həmişəluğ mandalnu.
Şorox paltar k'inək' bisibakalt'un,
12 Hunal şot'oğo bəc'ürpi ext'alnu,
Şot'oğo sa paltar k'inək' badalbalnu.
Ama Hun haşonu,
Vi usenxoyal axır butene!"
13 Buxačuğon mani angela hevaxt'esa
"Zu Vi düşmənxo Vi turin oq'a sakamin
Bez yön tərəf arśa" pe?
14 Axıri angelxo şuva? Çark'esuna sa miras k'inək' haq'i amdarxo q'ulluğbseynak' yaq'abaki q'ulluğçi urufxo tene ki?