49
İak'oven iz ğarmoğo tadi xeyir-bərəkət
1 İak'oven ğarmoğo izi t'ǒğǒl eçest'i pine: «Ekinan çurpanan miya bezi hərrəmine, həysə exlətp'oz və̌ynak' efi bel k'ə eğalesa bitova.
2 Ekinan gireynan bezi bel, ay İak'ovi ğarmux, efi ǔmǔxxo qaypanan ibakanan efi bava İsrailen k'ə nex:
3 Ruven, kalo hunnu bezi əyloğoy boş,
Bezi hetər sa zore q'ončux baksunan ç̌oyel c'evk'i hun,
Bavaluği t'adaz avabaki zu hun nanaxun bakat'an.
Bǐhine vi ga, şuk'k'alenal va sakes batenekon.
4 Ama efes ten baki hun va, posp'i tağala xena efes nu bakala k'inək',
Vi bavaynak' çuuxluğbalt'uxunen bask'i,
Bezi ganun murdarlayinşi hun.
Şot'o görəl meyin oşa k'ojin kala ğar uk'at'an vi s'i tene t'ap'eğal.
5 Simeon q'a Levi - p'ə̌ viçit'un şorox,
Q'əddarluğbseynak't'un əşp'est'i şot'oğon içoğoy q'ılıncxo.
6 Sa tene bakal bezi əyit şot'oğoxun,
Gərtezbakal zu şot'oğo.
Əcuğon biq'i amdar besp'alorox,
Arak'xoy tura kütp'i, oşal içoğoy biq'i əşlin loxol axšumk'aloroxe şorox.
7 Q'arğişi q'ončuxe bi və̌x efi me əcuğon q'a hirsen,
Śarpi śik'ala əcuğ, duği besp'ala hirse şo!
Aç̌i batk'alnan və̌n İak'ovaxun törəyinşakit'oğoy boş,
İsraili ğarmoğoy t'ǒğǒl arśala bakalnan.
8 İuda, vi s'iya duğalt'un viçimoğon alxışp'at'an,
Ozana c'urumpi bosalnu hun vi düşmənxoy,
Vi bavaxun sa viçimoğonal hari va bač'an k'os'p'alt'un.
9 Ǒxə̌ləxun qaybakala sa cəyil aslan k'inək'nu hun, İuda,
Busq'una çurpi şirəst'a bakala zore bu vast'a,
Şuva ı̌ša bites bakon me aslana?
10 Padçağluğbale İudaxun bakit'oğon həmişə,
Taxt'e loxol arśi əmirbalt'un şot'oxun törəyinşakit'oğon.
Eğale t'e taxt'e q'ončux,
Hariyal bul k'os'p'alt'un Şot'o oç̌ali ç̌oyel bakala millətxoy bitot'in.
11 C'ap'axun ğaç̌k'ale şot'in izi elema,
Zorapalayinşi taymoğoy ən şaat't'uxun örügbale izi elemi balina.
Finen os'k'ale şot'in izi paltara,
Təzə s'orobi noč'e boş badi c'evk'ale izi loxolxun lak'alt'oğo.
12 İzi t'ulluğen tadala fi t'eq'ədər bakale ki, p'i k'at'k'ale şot'ay ç̌oyexun,
Uluxxo mas'ibakale şot'ay muč'anaq' ǔğsunaxun.
13 Zevulun isə dənizi börine,
Gəmiğoy hari çurk'ala gala yəşəyinşale.
Sidonal śirik' tağale şot'ay oç̌alxo.
14 İssak'ar - izi bač'ane yük xork'ala sa elem k'inək'e şo,
Zorbane, izi kiyelxun nu ayeğala əş tene bu şot'ay.
15 Dincluğe qə̌vesa şot'in,
Bezi əşp'ala oç̌alq'an şaat' baki nexe.
İrəzine şo bač'an k'os'psuna,
Q'ert'ay loxol əşp'i yük xorpsuna.
16 Divanbal bakale Dan izi nəsileynak',
İsrailaxun əmələ hari azuk'xoy cörginə bakale şot'oxun törəyinşakiyorox.
17 Yaq'e boş bask'i dizik',
Cığıren tağat'an běš c'eğala gürzə k'inək' bakale Dan.
Ěke tura duği,
Şot'ay loxol arśit'u bač'ani loxol sakalo bakale.
18 Vi za çark'est'unane bezi umud, ay Q'ončux!
19 Gade loxol lavabaki şot'o fǔq'psun çureğalt'un,
Ama t'etər bakale ki, içan sunay dabana ç̌axç̌uxpsun t'it'ala bakalt'un.
20 Nu bit'i becərişala şey tene bakal Aşeren izi oç̌alxo,
Padçağxoy běš eçeri laxalt'un şot'in toydala neymətxo.
21 Biq'i efes nu bakala marali gözəlluğe bu Naft'alinast'a,
İzi eçala baloğoy loxole bitot'ay pul.
22 C'epi ğumoğoy kiyexun bask'ala c'ap' k'inək'e İosif,
Orayini t'ǒğǒl bit'eśi şaat' c'ek'ala sa c'ap' k'inək',
İzi taymux barinen tik alane laysa şot'ay.
23 Elmux haq'ala düşmənxone şot'ay loxol hari,
Ən şaat' oxbosalxone içuxun davina c'eri.
24 Ama sakes tet'un baki şot'oğon İosifa,
Şot'o görə ki, Zorba Bakalt'ine şot'o İzi zoraxun tast'ay,
İak'oven bul k'os'p'ala Buxačuğone şot'ay ə̌mə zorba efsay.
Bač'ane baki şot'aynak' İsraileynak' Bač'an bakiyo,
Enefi şot'o çobanen izi sürünə efala k'inək'.
25 Vi bavay bul k'os'p'ala Buxačuxe va kul biq'i Buxačux, Bitova Başarbalone Şo!
Şone göynuxun ağala yaq'abi va xeyir-bərəkət tadalo,
Şone oç̌ali oq'a bakala xeyurxo duği ç̌oyel c'evk'alo.
Vi saya avuzbaloval,
Vi sürünə bakala heyvanxo balalayinşest'aloval Şone,
Şot'oxune eysa xeyir-bərəkət.
26 Vi bavay xeyir-bərəkətə p'ap'ala xeyir-bərəkət butene,
Ən alloy buruxmoğoxun üst'üne şo,
Burqesunast'a laxeśi təpoğon tades bakalorox hik'k'ale şot'ay t'ǒğǒl!
Barta İosifi belq'an bari me xeyir-bərəkət,
Barta izi viçimoğoxun üst'ün bakalt'ay k'odoğoq'an śameśi me bezi piyorox.
27 Busa canavar k'inək'e Binyamin:
Savaxt'an izi kiyexun haq'es ten bakon ǒxə̌lbi eçerit'u,
Biyəsin isə efi taneğon izi běšt'an mandit'oğo».
28 Moval İsrailen içuxun əmələ eğala p'as's'e tayfin barada saturběš piyorox, me əyitmoğo pine xeyir-bərəkət tadey şot'oğo. Hər ğarenal içu görəne izi xeyir-bərəkətə haq'ey.
İak'ovi bisun
29 Oşa İak'oven izi ğarmoğo me əyitmoğo pi vəsyənebi: «Mone, bezi pula q'ic'p'i tazsa zu t'e dünyəne. Za taşeri bezi bavoğoy t'ǒğǒl, xet'lu Efroni q'oruğa bakala mağarinanan oç̌alaxpsa.
30 Kənan oç̌alane t'e mağara: Mamreni mə̌xluğa ı̌ša, Maxp'ela uk'ala q'oruği boş. Avrahamen t'e mağarina q'oruğaxun sagala təngə tadi haneq'ey xet'lu Efronaxun. İzi p'uriğo oç̌alaxpseynak'e haq'ey şot'in t'e mağarina.
31 Avrahama içuval t'iyat'un oç̌alaxp'ey, izi çuux Saral, İsaak'a q'a Rebek'al. Leal t'iyaz oç̌alaxp'e zu.
32 T'e q'oruğal, izi boş bakala mağarinal Avrahamen xet'luğoxune haq'ey».
33 Hametər, İak'oven izi axırınci əyitə pi izi bula lanexi, izi elmuxal hat'iya c'ere. Şot'in izi pula q'ic'p'i t'e dünyəne, izi bavoğoy t'ǒğǒle taśi.