24
Buxačuğoy q'a israilluğoy irəziluğ ğaç̌esun
1 Oşa Q'ončuğon Moiseya pine: «Hun, Aaron, şot'ay ğarmux Nadav q'a Avihu saal israilluğoy ağsaq'q'alxoxun yetmiş tan Bez t'ǒǒx buruğo lakinan. Və̌n Za ə̌xil çurpi bul k'os'banan.
2 Oşa isə saycə hun bez t'ǒğǒl ı̌šalayinşakalnu, ama azuk' memiya sal laśimaq'an».
3 Moiseyen hari Q'ončuğoy pit'oğo saal k'anunxo azuk'a p'ap'esebi. Bütüm azuk'enal sa səsen coğab tadi pine: «Q'ončuğon pit'oğo bitova əməlbalyan!».
4 Moiseyenal Q'ončuğoy pi bütüm əyitmoğo śamepi.
Əyc'indəri şot'in savaxt'an üşenen hayzeri buruğoy tume q'urban eçala gane düzbi saal İsraili tayfoğoy saya görə p'as's'e ǰěne sütüne laxi.
5 Oşa Moiseyen İsraili cəyilxo yaq'abi Q'ončuğoynak' bok'ospsuni q'urbanxo saal serluği q'urbaneynak' arak'xo eçest'i šampesedi.
6 Moiseyen heyvanxoy p'iyaxun qǐt'u ext'i ləənxone bapi, qǐt'u isə q'urban eçala gane loxole çəçədi.
7 Şot'in śameśi irəziluği şərturxo ext'i azuk'eynak' k'alepi, azuk'enal pine: «Q'ončuğon pi bütüm əyitmoğo běği şot'oğo əməlbalyan!»
8 Oşa Moiseyen p'iya ext'i azuk'i loxol çəçədi pine: «Mo Q'ončuğon bütüm me şərturxon və̌xun ğaç̌eśi irəziluği p'ine».
9 Mot'oğo bit'uxun oşa Moiseyen, Aaronen, Nadaven, Avihunen saal israilluğoxun bakala yetmiş ağsaq'q'alen buruğo samalal laśi
10 israilluğoy Buxačuğo at'unk'i. Şot'ay turin oq'a sapfiraxun bakala göy k'inək' qay irəngen sa şeye buy.
11 Ama Buxačuğon israilluğoy kalaluğbalxo bestenebi. Şot'oğon Buxačuğo at'unk'i, ama hələl ham ut'unksay, ham ǔt'ǔnğsay.
12 Q'ončuğon Moiseya pine: «Bezi t'ǒǒx buruğo laki memiya çurpa. Zuval va me azuk'en əməlbseynak' Bezi śampi, izi loxol k'anunxo q'a əmirxo bakala t'ə̌p'ə̌k' ǰěyurxo tadoz».
13 Metərluğen, Moisey q'a iz köməyçi Yeşua Buxačuğoy buruğo layseynak't'un həzirləyinşəki, Moiseyal buruğone laśi.
14 Şot'in ağsaq'q'alxo pine: «Yan qoş qaybakamin memiya yaq'běğanan. Mone, Aaron q'a Xur ef t'ǒğǒlt'un - şii divanluğ əş bakayin, şot'oğoy t'ǒǒx tayes banekon».
15 Moisey buruğo lağat'an asoyen buruğo bəc'ürepi.
16 Mo Q'ončuğoy tamtarağe Sinay buruğo śirey. Buruğ ǔq ği asoyi boşe baki. Vǔğǔmci ğine isə Q'ončuğon Moiseya asoyi boşt'an k'alepi.
17 Q'ončuğoytamtarağ israilluğoy piin běš buruğoy bel bok'osp'i śik'ala arux k'inək'e ak'esay.
18 Moisey asoyi boş baśi samalal alane laśi. Şo q'ırx ği-q'ırx şü buruğone mandi.