19
Buxačuğoy Sinay buruğoy bel śiysun
1-2 İsrailluyox Refidimaxun c'eri Sinay ams'i oç̌alat'un hari p'ap'i. İçoğoy Misirəxun c'eysun düz p'ə̌ xaşey. Memiya israilluğon buruğoy tumel çurk'ala gat'un düzbi.
Moisey isə buruğo - Buxačuğoy t'ǒğǒle laśi. Q'ončuğon şot'o buruğoxun k'alpi pine: «İak'ovi nəsilə, israilluğo metər upa: "Zu misirluğo k'ə bsuna, və̌x Bez t'ǒğǒl q'ızılq'uşi q'ənədi loxol k'inək' eşt'una anank'i. Əgər və̌n Bezi əyitə běğaynan, Bezi və̌xun ğaç̌eśi irəziluğa əməlbaynan, və̌n bütüm azuk'xoy boşt'an Bezi c'ək'p'i, Zaynak' gele əziz azuk' bakalnan. Bütüm dünyə Bezine, * və̌n isə Za q'ulluğbala běyinšxoy padçağluğ, ı̌vel millət bakalnan." Me əyitmoğo israilluğo upa».
Moiseyenal hari azuk'i ağsaq'q'alxo k'alepi, Q'ončuğon əmirbi k'inək', içu pi hər əyitə şot'oğo p'ap'esebi. Bütüm azuk'en sa tan k'inək' metəre coğab tadi: «Q'ončuğon pit'oğo bütümə əməlbalyan». Moiseyen azuk'i coğaba Q'ončuğo p'ap'esebi.
Q'ončuğon Moiseya pine: «Mone, Zu boç̌u asoyi boş vi t'ǒğǒl eğoz ki, azuk'en Zu vaxun exlətpsuna ibaki va həmişə věbakeq'an». Moiseyenal azuk'i əyitmoğo Q'ončuğo p'ap'esebi.
10 Oşa Q'ončuğon Moiseya pine: «Azuk'i t'ǒǒx taki. Ğe saal əyc'ə şot'oğo ı̌velba. Barta içoğoy paltarxoval os'k'i 11 samaane həzirq'at'un baki, şot'aynak' ki, hat'e ği bütüm azuk'i piin běš Zu Sinay buruğoy bel śiğoz. 12 Azuk'eynak' buruğoy hərrəmine zahman laxi upa: "Və̌x buruğo laysunaxun, şot'ay tuma lafst'unaxun běğanan. Buruğo laft'alo biyalane. 13 T'etərt'u kul nu laft'alane, şot'o ǰělayinşi nəəl oxen duği besp'anan. Çuresa heyvanq'an baki, çuresa amdar - buruğo laft'alo nu mandalane. Saycə şeyp'uri boxoy səs c'eğat'an şorox buruğo layes bat'unkon"». §
14 Oşa Moisey buruğoxun azuk'i t'ǒǒxe śiri. Şot'in azuk'a ı̌velebi. Şot'oğon içoğoy paltarxo os't'unk'i. 15 T'e vədə Moiseyen azuk'a pine: «Samanineynak' həzir bakanan, ef çupuxxoxun ı̌šaluğmabanan».
16 Xib ği oşa savaxt'an üşenen göyen gürunepi, s'ə̌q'en duneği. Ost'aar şeyp'uri səse c'eri, buruğo isə boç̌u asoyene bəc'ürpi. Amdarxo içoğoy çurpi gala q'ǐyen haneq'i. * 17 T'e vədə Moiseyen azuk'a içoğoy çurpi ganuxun Buxačuğoy běše taşeri, şoroxal buruğoy tume çurt'unpi.
18 Sinay burux dirist' k'üüni boşey, şot'aynak' ki, Q'ončux şot'ay loxol aruğoy boşe śirey. Buruğon buxarinen k'üünbala k'inək' k'üünbi ost'aar ǰı̌k'esay. 19 Şeyp'uri səs taysun ost'aare baksay. Moiseyen isə Buxačuğoxun əyiteney, Şot'inal ost'aar səsen coğabe tast'ay.
20 Q'ončux Sinay buruğoy bel śiri Moiseya iz t'ǒğǒle k'alpi. Moiseyal t'iya laneśi. 21 Q'ončuğon Moiseya pine: «Śiki, azuk'a tapşurba ki, Za akseynak' laxeśi zahmana maq'an c'ovaki, tenesa gelo k'as'eğale. 22 Lap Za ı̌šalayinşakala běyinšxonal içoğo ı̌velbeq'at'un ki, Zu şot'oğo nu əfçibaz». 23 Moiseyen Q'ončuğo pine: «Azuk' Sinay buruğo lateneğon, şot'aynak' ki, Hun "buruğoy hərrəmine zahman laxi şot'o ı̌vel ba" pi yax avabakesendi». 24 Q'ončuğon şot'o pine: «Śiki, Aaronal ext'i miya laki. Ama běyinšxo q'a azuk' Bez t'ǒǒx layseynak' zahmana maq'at'un c'ovaki, tenesa şot'oğo əfçiboz».
25 Moisey azuk'i t'ǒǒx śiri mot'o şot'oğo exlətebi.
* 19:5 K'an. 4:20; 7:6; 14:2; 26:18; T'it'. 2:14 19:6 - yəni "Buxačuğo q'ulluğbi, Şot'ay ı̌vel azuk' baki dünyəni bütüm millətxo Şot'ay zor q'a Şot'ay çuresun k'ə baksuna ak'est'un" 19:6 1 P'y. 2:9; Qay. əyit 1:4-6; 5:9-10 § 19:13 Əbr. 12:20 * 19:16 Qay. əyit 4:5 19:18 K'an. 4:11-12; Əbr. 12:18-19