ǏVEL AP'OST'OLXOY ƏŞURXO
Běšin əyit
«Ǐvel Ap'ost'olxoy Əşurxo» girken «Luk'an śampi Mǔq Xavar» girke boş exləteśit'oğoxun oşa bakit'oğone ak'est'a. Luk'ay «Mǔq Xavar» girke boş İsusi me dünyəne bakat'an biq'i əşurxoxune exlətesa, axırdal İsusi göynul ěqesunen çareksa. Luk'ay me girk isə İsusi göynul ěqesunaxun, yəni «Mǔq Xavar» girk çark'i ganuxune burqesa.
Girke boş İsusi şagirdxo Ǐvel Uruf tadeśit'uxun oşa şot'oğoy biq'i əşurxoxun, yəni Mǔq Xavara İsusen içoğo tapşurbi k'inək' dirist' dünyəne car saksunaxune exlətesa. Piyes ak'eğalo isə şone ki, İsusen İz Bavay t'ǒğǒl ěqeśit'uxun oşa yaq'abi me Ǐvel Urufen bes bakalt'oğo ak'i gele vədə şagirdxo içanal məət't'əlt'un manst'ay. Moval şo upsune ki, Buxačuğon Ǐvel Uruf tadeśit'u mani yaq'en taşt'una, İzi uk'alt'oğo mani yönen bex p'ap'esp'est'una avabakala şey tene.
Luk'an me girke boş ən gele P'yot'ri q'a P'aveli biq'i əşurxoxune exlətpsa. Şot'oğon Mǔq Xavara karoozbat'an İsusi Çark'est'al baksuna q'abulbi hazarxon amdarxoy boş saycə iudeyxo təə, ama q'erəz millətxoy baksunal ayanksa. İsusi laxi Buxačuğoy Padçağluği binoral memiine ěqesa burqsa. P'aveli bito ganxo tarapi Mǔq Xavara car saksun, mot'o görə gele əzyətxo zapsun, me Xavara həysət'in T'urśiya, Siriya, Greśiinaxun burqi taşeri dünyəni özəy bakala Rimal śirik' p'ap'espsunal bito hamot'o görəney.
Ğeyin ğineyal, İsusa Çark'est'al k'inək' q'abulbit'oğoynak' me girkə k'alpi dərs ext'ala gele şeye bu: gireśi sagala afırıpsun, suna kul biq'sun, suna "viçi" q'a "xunçi" pi k'alpsun, camaati piyexun bist'unaxun nu q'ı̌bi İsusi laxi yaq'axun nu c'eysun... Morox bito me girken yax upsun çureğaloroxe.
Girke boş bakalorox
1:1-2:47 İsusen əyit tadi Ǐvel Urufi tadesun
1:1-11 Girke burqesun q'a İsusi axırınci tapşuruğa tadi göynul ěqesun
1:12-26 Mat't'iyay İuday gala c'ək'esun
2:1-13 Ǐvel Urufi tadesun
2:14-47 P'yot'ri c'eri camaati běš əyitpsun q'a İsusi yaq'en tağalt'oğoy sunaxun ser baksun
3:1-12:25 P'yot'ri biyorox q'a Mǔq Xavari Yerusalima, İudeyina saal Samariina yəymişaksun
3:1-4:37 P'yot'ri tarapes nu bakala paygirbala q'olaybsun q'a mot'oxun oşa bakiyorox
5:1-11 Ananiyay q'a Sap'firay bel hariyorox
5:12-42 Ap'ost'olxoy amdarxo q'olaybsun q'a mot'o görə p'ə̌mci kərəm Kala Şurin běš c'eysun
6:1-7 Vǔğ tana c'ək'p'i əş tapşurbsun
6:8-7:60 St'efan
8:1-40 İsusa Çark'est'al k'inək' q'abulbit'oğoy śaresun q'a Filip'i Mǔq Xavara karoozbsun
9:1-31 Şaulen İsusa Çark'est'al k'inək' q'abulbit'uxun oşa iz bel hariyorox
9:32-43 Eneyay q'olaybaksun q'a T'abit'ay běyinbaksun
10:1-48 P'yot'r q'a K'ornelius
11:1-30 İsusa Çark'est'al k'inək' q'abulbit'oğoy gelebaksun
12:1-23 Angeli P'yot'ra zindanaxun c'evksun q'a padçağ İrodi bisun
12:24-28:31 P'aveli bito ganxo tarapi Mǔq Xavara karoozbsun
13:1-14:28 P'aveli K'ip'ra q'a Aziya bölginə tarapi Mǔq Xavara karoozbsun
15:1-35 Yerusalima gireśi q'erəz millətxoxun bakalt'oğoy əşlə běğsun
15:36-18:22 P'aveli p'ə̌mci kərəm Aziya bölginə, Mak'edoniina saal Axayina tarapi Mǔq Xavara karoozbsun
18:23-21:16 P'aveli xibimci kərəm Aziya bölginə, Mak'edoniina saal Axayina tarapi Mǔq Xavara karoozbsun
21:17-36 P'aveli Yerusalima biq'esun
21:37-26:32 P'aveli əşlə běğsun q'a şot'ay izi əşlə běğalt'oğoy běš c'eri əyitp'iyorox
21:37-22:30 P'aveli Yerusalima camaati běš c'eri əyitpsun
23:1-11 P'aveli Kala Şurin běš c'eysun
23:12-35 İudeyxoy əyitə sabi P'avela bespsun çuresun q'a P'avela K'eysariina yaq'absun
24:1-27 P'avel Feliksi běš
25:1-12 P'avel Fest'i běš
25:13-22 Fest'en Agrip'p'aynak' P'aveli barada exlətpsun
25:23-26:32 P'avel padçağ Agrip'p'ay běš
27:1-28-31 P'aveli imp'erat'ori běš c'eyseynak' Rima taysun
27:1-26 P'aveli gəminen Rima taysun q'a gəmin tufana bafst'un
27:27-28:10 P'aveli taśi Malt'ina c'eysun q'a t'iya bakiyorox
28:11-31 P'aveli Rima p'ə̌ usen çurpi Mǔq Xavara karoozbsun
1
Girke burqesun
1 T'eofil, bezi mot'oxun běš śampi girke boş zu İsusen İzi me dünyəne eysuni s'iya ak'est'a burqi ğinaxun bit'oğo q'a zombit'oğo bitova belxun ošel śampezuy,
2 İzi c'ək'p'i ap'ost'olxo Ǐvel Urufen tapşuruğxo tadi Buxačuğon İçu göynul ěqevk'i ğinal śirik' bakit'oğo bitova.
İsusi axırınci tapşuruğa tadi göynul ěqesun
3 İzi koruği boş bisunaxun oşa Şo hələ q'ırx ği vədə-vədə t'e amdarxo ak'esay. Şot'oğo İzi p'uri ganuxun běyinbaksuna gele əşurxon subutbi şot'oğoynak' Buxačuğoy padçağluğaxune exlətpsay.
4 Sa ği arśi šum ukala gala, İsusen şot'oğo "Yerusalimaxun ma c'ekinan" pi, me tapşuruğane tadi: «Bavan və̌x əyit tadi, Bezi və̌x pi t'e neyməti yaq'a běğanan.
5 İoanen xenene k'unuk'bsay, və̌n isə sa hema ğinaxun oşa Ǐvel Urufen k'unuk'bakalnan».
6 Mone, ap'ost'olxon İsusi bel gireśi xavar haq'sat'un burqi: «Ay Q'ončux, isə hevaxt' arśalnu me əyit tadeśi padçağluği taxt'a, hevaxt' kalaluğbale me israilluğon p'urum içoğoy k'ulnu?»
7 İsusen coğabe tadi: «Bavay İz ext'iyəren laxeśi t'e vədinə q'a t'e vaxt'a avabaksun və̌x tene mandiyo!
8 Ama mone, və̌x Ǐvel Uruf tadeğale! Və̌nal t'etər sa zore q'ončux bakalnan ki, Yerusalima, dirist' İudeyina, Samariina, lap dünyəni t'e belal Bezi barada şahidluğbi Bezi şu baksuna ak'est'es bakalnan!»
9 İsusen mot'oğo pit'uxun oşa Buxačuğon Şot'o göynule ěqevk'i. Şo ap'ost'olxoy piin běš asoyxoy boş ěqeśi piyexun aneç̌i.
10 Ama şot'oğon hələl içoğoy pula göynuxun tet'un zap'ey. Hame vədine, bürdən içoğoy t'ǒğǒl mas'i paltar lapi p'ə̌ amdart'un ak'i.
11 Şot'oğon pit'un: «Ay galileyaluyox, k'ənan göynul běğsun çurpe? Me İsus ef piin běšt'an ěqeśi k'inək'əl qaybakale».
Mat't'iyay İuday gala c'ək'esun
12 Mot'oxun oşa ap'ost'olxo Zeytuni burux uk'ala ganuxun Yerusalimat'un qaybaki. Me burux Yerusalima ı̌ša, sa Şamat' ğine yaq'e hamane.
13 Şorox şəhəre hari içoğoy mandala k'ojin alin otağat'un laśi. Miya mandalorox moroxey: P'yot'r, İoan, İak'ov, Andrey, Filip', T'omas, Varfolomey, Mat'fey, Halfay ğar İak'ov, Kənançi Simon saal İak'ovi ğar İuda.
14 Şorox miya usum-usum gireśi afırıt'unney. İsusi Nana Mariya q'a İz viçimux, saal q'erəz sa hema çuuxal miya gireśi ap'ost'olxoxun sagala afırıt'unney.
15 Hametər ğimxoy sunt'ust'a, sabaç̌ q'a tan gireśi sa ğine, P'yot'ren hayzeri pine:
16 «Ay viçimux, Ǐvel Śamurxoy boş bakalorox bex p'ap'ine buq'oy. Axıri Ǐvel Urufen padçağ Davidi muzin əyitk'at'an İsusa biq'sa tağalt'oğo yaq' ak'est'i İuda k'inək't'oğoy axırane saturběš ak'est'i.
17 Düze, İuda yaxun sagalaney, şot'inal yaxun barabar İsusen yax tapşurbi q'ulluğane bsay.
18 Ama me amdaren günaxe əşp'est'i, izi biq'i t'e pis əşlə görə haq'i tənginenal taśi q'oruğt'un haq'i. Hat'e q'oruğane şo biin loxol biti śareśi, izi gödənxoval c'irap'eśi baredi.
19 Dirist' Yerusalimene me barada ibaki, amdarxonal me gane s'iya "Ak'eldama"t'un laxi. Mo içoğoy muzin "P'iye q'oruğ" upsune.
20 "Ǐvel mə̌ğurxo" girke boş śameśi k'inək':
K'ojin işiğq'an aç̌i şot'ay,
İzi çadırq'an xarabina mandi,
saal
Barta iz əşlə q'ert'inq'an taşeri.
21 Kot'o görəl yan həysə q'erəz sa amdar c'ək'k'alayan. Q'ončux İsus me dünyəne bakat'an yaxun barabar Şot'ay bač'anexun tağalt'oğoxun sunt'u,
22 İoanen Şot'o k'unuk'bi ğinaxun burqi Buxačuğoy Şot'o göynul ěqevk'i ğinal śirik' yaxun sagala baki, oşal Şot'ay běyinbaksuna ak'i amdarxo me barada exlətp'i car sakalt'oğoxun sunt'u».
23 Metərluğen, p'ə̌ tani s'iyat'un duği - Yust' s'i tadeśi İosifa, şot'o hələ Barsabbal next'uniy, saal Mat't'iya.
24 Oşal me əyitmoğon afırıt'unpi: «Ay Q'ončux, Hun bitot'ay ük'ə avanu! Ak'est'a yax Vi c'ək'p'it'u, barta me p'ə̌ tani boşt'an
25 İuday gala hari Vi yax tapşurbi əşlə bex p'ap'espseynak' c'ək'eśit'u ak'es baken. Axıri p'uri taneśi İuda, isəəl günaxkər maya bakalanesa t'iyane».
26 Eçeriyal çöpt'un boseri, çöpəl hari Mat't'iyane koft'i. Sas's'e ap'ost'ola gərbaki p'as's'emci bakiyoval şone baki.