18
Obwa o bvulu lili Babilone
1 Ŋa mbihi oŋo, me áamono ngye-yulu mukimi, wu áafi ku yulu mu okayasughuru ŋa nsie. Nde áli a litumu li linene ya nsie yíli kunsa otsyeme kuu nsia a nde.
2 Nde ákehe engubu mu likyi lili mpini ti: «Bvulu li Babilone li Linene liibwi, liibwi! Lo ayi bvulu li mifulu mi mibi, ebini ki nswe mufulu wu a suŋumu, ebini ki nswe ŋmini wu a suŋumu, ebini ki nswe nyama wu a suŋumu wu bábele.
3 Mu kuulu, bikaana byehene biiŋmi bviini lili esighi e nde ki ebvulu. Mikogho mi nsie miibvughu mbughu mu esighi ya nde, ya minta-nkaala mi nsie miibagha busini mu lileene li bilogho bi nde bi bibvulu bubwe ya ntala.»
4 Ya me áangyughu likyi likimi ku yulu li líkalyele ti: «Baara ba me! Lipala mu bvulu li, mpaala banyaã obvughu be emõ ya masumu ma lo, ya be linyaã obagha kaba mu biwa bi biibwa mu lo.
5 Mu kuulu, masumu ma lo maasi mudzu tee ku yulu, ya Nzaami ka aadzimini bubi bu lo o.
6 Libvurulu lo etere ti bwunu a bu liisi lo babake! Libvurulu lo makaba muolo ma bigyighili bi lo! Mu ebaha ki aataba nde mala, litaba nde makaba muolo ma mala ma nde.
7 Bwunu a bu áakamono nde esee mu nsia a nde ya mu busini bu nde bu bubvulu, bwunu obo si be liibvurulu nde kimini ya pfiili. Mu kuulu, nde aakalyele kunsa mukolo a nde ti: “Me aambwi-nsini ti anga ngasa, ya me ka ndi mupfiili o. Si okala ka bunu, me akala ka nsomo pfiili o.”
8 Mu nkooro a bitsimi bibye, biwa bi sa bigya mu nde mu etsughu emõ: lipfu, pfiili ya munzyala. Nde wohono sa asadzighi ku mbaa, mu kuulu, Mfumu Nzaami wu àalamana nde li a mpini.»
9 Mikogho mi nsie myehene mi míkabvughu mbughu yi esighi ya Babilone nga-a-esighi, ya mi míkamono esee mu busini bu bubvulu emõ ya lo, mye sa milili. Mye sa minyoõ mu nkooro a lo, ŋa akala miimono mye lwuu li mbaa li liidzihi lo.
10 Mye sa mikala mana la ya bvulu, mu nkooro a nzalamweẽ a kimini li lo li bali mu okataala bo. Mye sa milyele ti:
Nyiĩ! Nyiĩ! Kundaa bvulu li Linene,
Babilone bvulu lili mpini,
mu tala li mõ, masyeme ma we maagyi!
11 Bumõ si minta-nkaala mimi ŋa nsie mi mili mu okalili ya miisomo pfiili mu nde, mu kuulu ka ofirisyili a mbwuru wu aaswumu bilogho bibo o.
12 Bo sa banya ofiritankaala yi a: oore, ngele, mameẽ mama ntala, nsia, biko bibi lino lili tse-tse ya ntala, biko bibi mungala, biko bibi mu swa, biko bi bibie, miti mimi mpihi yi mbwe, bilogho byehene bi bágyighili mu myini mi nzogho, mu miti mimi ntala, mu boronze, mu bisyeẽ bwunu we mu mameẽ ma mabwe.
13 Bo sa banya si ofiritankaala yi a: bibu bi miti ya bilogho bibi mpihi yi mbwe, mananaase, miire, malyimi ma baakatsughu, bviini, maala, farine lili tse-tse, bele, bangoomo, bindoomo, basyevale, basyare, manyuru bwunu we miwumunu mi baara. Minta-nkaala sa milyele ti:
14 Bimburu bi bíyele bi ákadzyi we,
biigyene la ya we!
Busini bu bubvulu bubwe ya ntala,
bye byehene biidzimini,
ya si okala ka bunu ka bafirimono bye o!
15 Minta-nkaala mi miibagha busini mu bvulu li, sa mikala mana la ya lo mu nkooro a nzalamweẽ a kimini li lo li bali mu okataala bo, sa milili ya sa misomo pfiili.
16 Mye sa milyele ti:
«Nyiĩ! Nyiĩ! Kundaa bvulu li Linene,
li liilaha biko bibi mu lino lili tse-tse, bibi mungala ya bibi bie,
li liilaha milwuu mimi mu oore, mimi mameẽ mama ntala, ya nsia yi a ntala.
17 Mu tala li mõ, busini bwohono bubo buupfighili!»
Mimbiri mabwara myehene ya ba baakagye mu mabwara, ba baakasala mu mabwara ya babo bwohono ba baakasala mu mubu, sa bakala mana la ya lo.
18 Bo bu bamono lwuu li ókadzighi bvulu mu mbaa, bákakehe bingubu ya bákalyele ti: «Nki bvulu líifaana ya bvulu li linene li?»
19 Baara bákagyiri lifufunu ku yulu a mitswi mi bomo, bo bákalili, bo básomo pfiili ya bákakehe bingubu ti:
Nyiĩ! Nyiĩ! Kundaa bvulu li linene!
Me lo liigwi busini kundaa babo bwohono ba bali a mabwara mu mubu.
Mu tala li mõ, lo liikighiri syehe.
20 Nyaã Yulu likala mu esee mu lo!
Nyaã behe si ba bangili, bantumu ya mibighili, likala mu esee.
Mu kuulu, Nzaami aasuo bunsumu bu nde kundaa be bu aalamana lo.
21 Oŋo ngye-yulu nga-a-lileene ágwolo limeẽ li linene ti anga li baakasighi mburu, átsili lo mu mubu ya ályele ti:
«Ya mu nzuŋu gyini oyo akala baatsili Babilone, bvulu li linene,
ya akala ka bafirimono lo o.
22 Kundaa we, akala ka baafirigyughu o,
binkulu manguomo, bagyimi bikwumu,
bimfulu biwebe-a-webe bwunu we mamvulu-a-mvulu.
Kundaa we ka baafirimono,
banga-a-bisala bibi myaã o,
ka bafirigyughu nkele a limeẽ li baakasighi mburu o.
23 Si okala ka bunu,
otsyeme o mwindi ka ofirisehene mu nzo a we o.
Si okala ka bunu, ka baafirigyughu o,
likyi li baghala wu aakye ya lili mukala wu aakye kundaa we.
Mu kuulu, minta-nkaala mi we míli baara ba babvulu mupfunu mu baara ba nsie.
Mu emfiri e we, bikaana byehene biigwuŋumu.
24 Kundaa we baamono makili ma mibighili, mama ba bangili,
ya mama ndaa babo bwohono ba bádzwi ŋa yulu a nsie.»