APOKALIPESE LI DZÃ
APOKALIPESE LI DZÃ
OSOMO
Mukaana wu, Dzã, ntumu a Yiisu-Kriste áasono nde. Nde li mu okalyele ti, mandagha mwohono ma ásono nde, nde ámono mo ya ágyughu mo mu limono. Nde li mu okalyele ti mu li leene li Mufulu a Nzaami nde áamono mandagha mwohono mamõ.
Básyimi Dzã ya báyitwulu nde ku elyi kii nkwumu Patamose, mu etsulu e nsie kii Adzi. Oko nde ásono mukaana wu mu ogwa bakeretyẽ babake mpama, mu kuulu bákamwehẽ bo kimini. Mu obo nde ályele bo mu osa mukama tee mu etsughu kii masini, ya mu osa emiini, mu kuulu Yiisu ályele ti: «Kundaa mbwuru wu akala aalughulu, me sa ngwa nde nzili mu odza bimburu bi muti wu aakagwa bumweẽ wu li ku yulu, mu edzwa kii Nzaami.» (2.7). Ya edzi-dzighi Yiisu ndeme sa agya, mu olughulu ŋa yulu a bubi.
Oli a mandagha ma manene ma bafaana obaghala mu mukaana wu: yi a nsomo me yiili ti, mifulu mi mibi mili mu okasala ŋa yulu a nsie yi, ya bakriste sa bamono kimini, tee mu matala ma baadzwa babake ŋa kara li bo. Yi a ywolo me yiili ti Yiisu li Mfumu, ya nde sa alughulu ŋa nkulu a baara bwohono ba baabihi Nzaami, ya baanama ndarango ya banyama. Ndagha yi matere me yiili ti, Nzaami ábunu embwaŋa mu baara ba baasi kana mu nde, bvulu-bvulu ba baadzwi mu nkooro a nde.
Ndagha yi yili a mpini ya yili mu okagwa emiini kundaa baara ba báamono makimini ma malagha. Ndagha oyo yísuo boho si ti, ngu okala ti basi Rome bámwehẽ bo kimini, Mwana a endoomo e Nzaami sa amaha makimini mamo, mu kuulu nde sa alughulu ŋa nkulu a bo. Me ndagha oyo akala aagwa bo mpama yi bvulu.
Básuo kundaa Dzã bunu masini ma yulu ya mama nsie maakala, nsie yi nyaghara yi akala oogyighili Nzaami, ya bunu-abo nde aabvwuhu babo ba baasi bintamana mu nde. Yiisu sa abwihi ya atsili Satana ya bangye-yulu ba nde, ya baara bwohono ba baakasalala nde munsa mbie yi nda ya nsihi. Mayulu ma manyaghara sa makala, bumõ ya nsie yi nyaghara, ya bvulu li linyaghara. Nzaami a Mfumu Yiisu-Kriste sa bayakala omõ ya baara ba baakasalala bo.
Bu me bu baakakaba mukaana wu:
1) Mamboro (1.1-8).
2) Yiisu moŋono kundaa Dzã (1.9-20).
3) Mikaana kundaa banga-a-kana baba mabvulu nsaama (2.1-3,22).
4) Likubu li Nzaami ya osamana kuu mayulu (4.1-11).
5) Mukaana wu básuŋunu mu makumu nsaama (5.1–6.17).
6) Baara ba bási elyimi e Nzaami (7.1-17).
7) Nkumu lili nsaama (8.1–11.19)
8) Mukaha, ndarango ya banyama buolo (12.1–13.18)
9) Mwana e endoomo ya ba bákwulu (14.1–15.8)
10) Mandoŋo nsaama (16.1-21)
11) Mumfwunu a Babilone li linene (17.1–20.10)
12) Mufwunu yu masini (20.11-15)
13) Mayulu li linyaghara ya nsie yinyaghara (21.1-8)
14) Yerusaleme li linyaghara (21.9–22.5)
15) Edzi-dzighi Kriste sa ayabvughuru (22.6-21).
1
Ebaana ki mandagha
1 Mukaana wu li mu usuo mandagha mama ensweghe ma ógwi Nzaami Yiisu-Kriste, mu kuulu nde asuo kundaa basala ba nde mandagha ma mafaana ogya edzi-dzighi. Ya nde ágweghe ngye-yulu a nde mu osuo mo kundaa musala a nde Dzã.
2 Me Dzã aasuo bumpughulu mu mandagha mwohono ma aamono nde: Ndagha a Nzaami ya bumpughulu bu Yiisu-Kriste.
3 Esee kundaa munde wu li mu okataã mukaana wu libighi wu! Esee kundaa babo ba baagyughu ya ba baakebe mandagha ma básono mu nde, mu kuulu matala maabehene.
Mamboro kundaa Mabwunu ma Nzaami nsaama
4 Me Dzã nsono mukaana wu kundaa Mabwunu ma Nzaami nsaama ma mali ku etsulu e nsie kii Adzi. Nyaã bwehe ya edzuunu bi bifi kundaa munde wu li, Wu áali ya wu li mu ogya, bi bifi kundaa mifulu nsaama mi mili ŋa nkulu a likubu li nde,
5 ya bi bifi kundaa Yiisu-Kriste, mpughulu wu aakakebe mukihi wu álaba nde, wu áasighili nsomo mu ba bápki, ya mfumu a mikogho mi nsie.
Kundaa munde wu dzyi bihi, wu áakwulu bihi mu masumu ma bihi mu makili ma nde
6 ya wu ási bihi baara ba empu, bangaa ba Nzaami mu osalala Nzaami, Taara a nde. Nyaã nsia ya lileene bikala kundaa nde mu mibvu ya mibvu! «Aamene!»
7 «Limono, nde li mu ogya ŋa kara li bidzi:
Ya nswe mbwuru sa amono nde,
ngu okala babo ba baatobolo nde libee,
ya madzumu mwohono mama nsie,
sa masomo pfiili mu nkooro a nde.
Eẽ! Aamene!»
8 Me ndi Alafa ya Omenga, obo bu olyele Mfumu Nzaami, munde wu li, wu áakakala ya wu li mu ogya, Nga-a-Mpwũ.
Dzã mono Kriste mu mufulu
9 Me Dzã, ndughu a be mu kana wu lili emõ ya be mu kimini, mu emfumu ya mu mukama mu Yiisu. Me áandi ku elyi kii Patamose mu nkooro a Ndagha a Nzaami ya mu nkooro a bumpughulu ba ánsuo me mu Yiisu.
10 Mu matala ma óbagha me Mufulu mu etsughu e Mfumu, me áangyughu likyi lili mpini ti anga likyi li mvulu-a-mvulu ku mbihi a me,
11 li líkalyele ti: Mandagha ma li mu okamono we, sono mo munsa mukaana, ya gweghe nde kundaa Mabwunu ma Nzaami nsaama ma mali: Ku Efese, ku Simirine, ku Perengame, ku Tyatire, ku Saradese, ku Filadelefi, ya ku Lawodise.
12 Me áankaghala mu omono munde wu áakabili ya me, ya bu nkaghala, me áamono bilogho nsaama bi baakatwulu miindi bi bili mu oore.
13 Ya ŋa kara-a-kara li bilogho nsaama bi baakatwulu miindi bibye me áamono wu áafaana ya mwana a mbwuru. Nde álaha enkuru ki ela tee ku myili, ya álaha likee lili mu oore mu etulu.
14 Mutswi ya mfu a nde bíli ti anga mfu a bindoomo bi bipeŋeme, ti anga buŋu, ya mihi mi nde míli ti anga mile mi mbaa.
15 Myili mi nde mífaana ya boronze lili ntala, li bátsehebe ŋa yiri-a-mbaa, ya likyi li nde áli lifaana ya nkele a mimpagha mi madza ma manene.
16 Mu kwogho-a-kwogho e nde, nde ákwara baŋomaŋomo nsaama, ya mu muŋma a nde ókapala lipee lili mampele muolo li lito. Edzili e nde ékasehene ti anga bu ookasehene tala mu mpini a lo lwohono.
17 Mu matala ma ámono me nde, me áambwi ŋa myili mi nde ti anga mbwuru wu aapki. Lo nde átwulu kwogho-a-kwogho e nde ŋa yulu a me ya ályele ti: «Ka kala a nzalamweẽ o! Me ndi wu a Nsomo ya wu Masini,
18 ya Wu a Mweẽ. Me áli aankpi, ya mu matala ma, me ndi mweẽ mu mibvu ya mibvu, ya me ndi a mankogholo ma lipfu ya mama nsie a ba bákpi.
19 Mu obo, sono mandagha ma aamono we, ma mali ya ma mafaana ogya ŋa mbihi.
20 Mbaala a mpaana a baŋomaŋomo nsaama ba aamono we mu kwogho-a-kwogho e me ya bilogho bi baakatwulu miindi nsaama bi bili mu oore ngu yi: Baŋomaŋomo nsaama bali bangye-yulu baba Mabwunu ma Nzaami nsaama, ya bilogho bi baakatwulu miindi nsaama bili Mabwunu ma Nzaami nsaama.»