Nsia yi Mbwe yi ósono
MATYE
OSOMO
Me Matye, muntolo-mpagha wu mu-Dzwife, mumõ mu binduono kwumu ya byele (12), áasono mukaana a Nsia yi Mbwe wu. Nde ásono mukaana wu kundaa ba-Dzwife ba baakasa kana mu Yiisu-Kriste. Ba-Dzwife bagyighili osoolo mikaana mi mili mu Ogwihini ku Okulu, ya Matye li mu osuo kundaa bo ti Yiisu li munde wu aagyi mu osa kuulu ti mi básono mu mikaana mimye mikeele. Mu kuulu, nde aakataŋana mye matala mwohono. Mukaana wu, Matye ásono nde mu matala ma bábyi ba-Dzwife ba baakasa kana mu Yiisu mu manzo ma bo mama lisamana. Bo bási bimvuŋunu bi bíkagyagha baara baala ka báli ba-Dzwife o. Matye li mu osuo ti Yiisu li Mfumu wu aakaluo ya litumu mu mi ookaluomo Nzaami kundaa babo ba bali a kana. Nde li mu osuo nzili yi nyaghara yi obaghala mikyene mi mili mu Ogwihini ku Okulu. Matye li mu osuo si ti Yiisu li si Mesi, Mubvwuhu wu ookakebe ba-Dzwife.
Nsia yi Mbwe yi ósono Matye yili mu onama ngughu a nzili oyo yi óbaala mukaana wu ósono Mareke. Munsa mukaana a nde, Matye bvughu mandagha ma Yiisu mu bangughu ba mikwughu mitaana: Mu bikaba kii bitaana tee kii nsaama (5–7): Mukwughu ku yulu a munguo, li mukyene wu bumweẽ kundaa binduono bi Yiisu. Nde li mu otala minama ŋa kara li baara bo-a-bo ya ŋa kara li baara ya Nzaami. Mukwughu wu ekaba kii kwumu (10): Mukwughu wu li mu osuo litumu ya maluo kundaa babo ba bali mu okayitsala Nsia yi Mbwe. Mukwughu wu ekaba kii kwumu ya bitere (13): Mukwughu wu bvughu maluo ma Emfumu ki Mayulu mu mankumu nsaama. Emfumu ki Mayulu eli ki esweme, lo kye eli mu okamoŋono epankala ŋa mihi mi baara bwohono mu matala ma ótsyiri Nzaami. Mukwughu wu ekaba kii kwumu ya mpuomo (18): Mukwughu wu li mu osuo bumweẽ bu baara ba bafaana osomo mu Emfumu ki Mayulu. Mukwughu wu bikaba makwumu-mwolo ya bina ya makwumu-mwolo ya bitaana (24–25): Mukwughu wu bikaba makwumu-mwolo ya bina ya makwumu-mwolo ya bitaana li mu osuo bunu binduono bifaana okebe museene a Nzaami wu masini.
Bu me bu baakakaba mukaana wu:
- Bankagha-kwuru ba Yiisu: 1.1-17.
- Oburu ya bumwana bu Yiisu: 1.18–2.23.
-Maluo ma Dzã Muboghoro: 3.1-12.
-Oboghoro o Yiisu ya bigyeele kundaa dyabulu: 3.13–4.11.
-Esala e Yiisu mu etsulu e nsie kii Ngalile (luo, gyihi ya dzuhu mampwumu ma baara): 4.12–18.35.
-Midzye mi Yiisu ku Yerusaleme: 19–20.
-Bitsughu bi Yiisu bibi masini ku Yerusaleme 21–28:
Mukakana wu lipfu,
Lipfu li nde,
Osighili o nde mu lipfu,
Omoŋono o nde kundaa baara.
1
Musyi a dzumu li Yiisu
(Luk 3.23-38)
1 Musyi a dzumu li Yiisu-Kriste, Dabvide, li nkagha-kwuru a Yiisu, Abarahame li nkagha-kwuru a Dabvide.
2 Abarahame áburu Idzake, Idzake áburu Dzakobe, Dzakobe áburu Yuda ya bambwee ya banaana ba nde ba babaghala.
3 Yuda áburu Faredze ya Dzara mu Tamare. Faredze áburu Eserõ, Eserõ áburu Arame.
4 Arame áburu Aminadabe, Aminadabe áburu Naasõ, Naasõ áburu Salamone,
5 Salamone áburu Bohese mu Rahabe. Bohese áburu Obede mu Rute, Obede áburu Yese,
6 Yese áburu mukogho Dabvide.
Dabvide áburu Salomõ mu mukala a Uri,
7 Salomõ áburu Roboame, Roboame áburu Abiya, Abiya áburu Adzafe,
8 Adzafe áburu Dzodzafate, Dzodzafate áburu Dzorame, Dzorame áburu Odzyase,
9 Odzyase áburu Yohatame, Yohatame áburu Akadze, Akadze áburu Edzekyase,
10 Edzekyase áburu Manase, Manase áburu Amose, Amose áburu Dzodzyase,
11 Dzodzyase áburu Dzekonya ya bambwee ya banaana ba nde ba babaghala mu ena ki bábiri baara mu minsunughu ku Babilone.
12 Ŋa mbihi a ŋa bábiri baara mu minsunughu ku Babilone, Dzekonya áburu Salatyele, Salatyele áburu Dzorobabele,
13 Dzorobabele áburu Abiwude, Abiwude áburu Elyakime, Elyakime áburu Adzore,
14 Adzore áburu Sadoke, Sadoke áburu Akime, Akime áburu Eliwude,
15 Eliwude áburu Eleyadzare, Eleyadzare áburu Matane, Matane áburu Dzakobe,
16 Dzakobe áburu Dzodzefe mulumu a Mari, me mu nde báburu Yiisu wu baakata Kriste.
17 Mu obo, mu obaana Abarahame tee Dabvide, biseene bili kwumu ya bina (14). Mu obaana Dabvide tee mu ena ki bábiri baara mu minsunughu ku Babilone, biseene bili kwumu ya bina (14). Ya mu obaana matala mamo tee etsughu ki báburu Kriste biseene bili kwumu ya bina (14).
Oburu o Yiisu
(Luk 2.1-7)
18 Bu me bu báburu Yiisu-Kriste: Ngughu a nde Mari áli mukaha wu ógwi Dzodzefe bilyimi. Lo nsomo bakala nzo mo, Mari ákeghele mu lileene li Mufulu a Ngili.
19 Dzodzefe mulumu a nde, áli mbwuru wu bunsumu. Ya nde bu ágwene odzyi otwuhu Mari budzwa ŋa mihi mi baara, nde ábagha bitsimi bii okahaba bala mu ensweghe.
20 Mu matala ma ákabulutsimi nde obo, ngye-yulu a Mfumu áyamoŋono a nde mu nzolo ya ályele kundaa nde ti: «Dzodzefe mwana a Dabvide, ka bara nzalamweẽ mu ogwolo Mari, mukala a we mu nzo a we o. Mu kuulu, mu lileene li Mufulu a Ngili nde aakeghele.
21 Nde sa aburu mwana wu baghala ya we sa gwa nde nkwumu Yiisu, mu kuulu nde sa abvwuhu baara ba nde mu masumu ma bo.»
22 Mandagha mwohono mamo mámoŋono mu kuulu mi ólyele Mfumu mu mubighili mikeele:
23 «Mono, mutughu wu munkyini sa akeghele.
Nde sa aburu mwana wu baghala,
ya sa bata nde mu nkwumu yi a Emanwele.»
Mbaala ti: «Nzaami ŋa kara li bihi-a-be.»
24 Bu asighili kunsa ensama, Dzodzefe ási bwunu a bu ótumu nde ngye-yulu a Mfumu, ya ágwolo mukala a nde álo nde mu nzo.
25 Lo nde ka ábvughu mbughu ya Mari o, tee matala ma áburu nde mwana wu baghala wu ágwi nde nkwumu Yiisu.