Mukaana wu a nsomo wu a
DZÃ
OSOMO
Wu mukaana wu a nsomo wu ósono Dzã. Nde áli atswama osono Nsia yi Mbwe, ya mu yo, nde ábili mu mi mitala bumweẽ bu Yiisu ŋa yulu a nsie yi: Ngu «Nsia yi Mbwe yi ósono Dzã». Ya ŋa mbihi a mukaana wu lili mu obili wu, nde áfirisono mikaana myele. Mu matala mamo, áli oli a ba bákapfiri baara ti Kriste wu aagyi ŋa nsie mu okala mbwuru, ka li Mwana a Nzaami o. Bo báfirikalyele ti, nswe mbwuru faana okasa bu adzyi nde, ya Nzaami ka amono o ti oyo yili ndagha yi masumu.
Me mu obo Dzã ásono kundaa bakriste mu olyele bo Yiisu nande ali. Nde ályele bo si ti, mu engaŋma, laama lili mibvu ya mibvu li li, ya ásuo bo bu okughu obagha mbwuru lo: Nswe munde wu aasa kana mu Yiisu, nde sa abagha laama lili mibvu ya mibvu. Nde áfirilyele si kundaa baara mu okala emõ ya Nzaami, ya Mwana a nde Yiisu, mu odzyi Nzaami, ya babo bwohono ba baakasa kana. Kala ti bo basi obo, lo bakala a kana ti sa bo babagha laama lili mibvu ya mibvu.
Mukaana wu baakakaba nde bu:
- Ndagha yi a laama lili mibvu ya mibvu (1Dzã 1.1-4).
- Liikadzyara kunsa otsyeme (1Dzã 1.5–2.2).
- Mukyene wu a dzyi (1Dzã 2.3-17).
- Mutaara a Kriste ya baana ba Nzaami (1Dzã 2.18–3.24).
- Mufulu wu engaŋma ya mufulu wu a mpya (1Dzã 4.1-21).
- Bumpughulu mu mi mitala Mwana a Nzaami (1Dzã 5.1-21).
1
Ndagha yi a laama lili mibvu ya mibvu
1 Ndagha yi áali ku ebaana, yi liigyughu bihi, yi liimono bihi mu mihi mi bihi bameme, yi liikehene bihi, ya yi oobyeme myaã mi bihi, ngu ndagha yi a laama lili mibvu ya mibvu.
2 Mu kuulu laama lilo liimoŋono. Ya bihi liimono lo, ya bihi lili bampughulu ba lo, ya bihi lili mu okatsala be nsia a laama lili mibvu ya mibvu li líli kundaa Taara ya li liiyamoŋono kundaa bihi.
3 Mi liimono ya liigyughu bihi, bihi lili mu okalyele be mye si, mu kuulu behe si likala bumõ ya bihi, ya bumõ bu bihi buli ya Taara, ya Mwana a nde, Yiisu-Kriste.
4 Ya bihi lili mu osono be mandagha ma, mu kuulu esee e bihi ekala mukughu.
Liikadzyara kunsa otsyeme
5 Nsia yi liigyughu bihi kundaa Yiisu-Kriste, ya yi lili mu otuoho bihi kundaa be me yi: Nzaami li otsyeme, ya mpyibi ka yili mu nde o.
6 Kala ti bihi-a-be liikalyele ti: «Bihi lili bumõ ya nde», ya lili mu okadzyara kunsa mpyibi, bihi-a-be lili mu okapfiri mpya, ya ka lili mu okadzyara mu engaŋma o.
7 Lo kala ti bihi-a-be lili mu okadzyara kunsa otsyeme, ti bwunu a bu oli Nzaami ndeme kunsa otsyeme, bihi-a-be lili bumõ ya babake, ya makili ma Yiisu, Mwana a nde, maakatsehebe bihi-a-be mu masumu mwohono.
8 Kala ti bihi-a-be liikalyele ti: «Bihi ka lili a masumu o», bihi-a-be liikapfiri manyuru ma bihi bameme, ya engaŋma ka eli mu bihi o.
9 Kala ti bihi-a-be liikakihi masumu ma bihi, Nzaami li bunsumu ya li wu aakakuhu misiini mi nde. Nde sa asa masumu ma bihi-a-be kolokolo, ya sa atsehebe bihi-a-be mu bubi bwohono.
10 Kala ti bihi-a-be liikalyele ti: «Bihi ka lisi masumu o», bihi-a-be liikasa ti Nzaami akala nga-a-mpya, ya ndagha a nde ka yili mu mikolo mi bihi o.