8
Osamana ku okulu ooluru
1 Ndagha yibvulu mupfunu mu mi lili mu okalyele ngu yi: bihi-a-be lili a mukwuru a bangaa ba Nzaami wu obo, wu áabwi-nsini ku ngulu a kwogho kii babaghala ki likubu li Nzaami mu mayulu,
2 ti anga musala wu a ebini kii ngili ya wu a ngo ebvulu ki ótwu Mfumu, lo ka mbwuru o.
3 Nswe mukwuru a bangaa ba Nzaami baakabyaha nde mpaala akagwa bikaba ya mikaba. Oli bubwe ti ndehe si akala a elogho ki aagwa.
4 Kala ti Kriste áli ŋa nsie, nkini nde ka áakaakala ngaa a Nzaami o, mu kuulu oli a bangaa ba Nzaami bakimi ba baakagwa bikaba ti bwunu a bu ookatumu Mikyene.
5 Bangaa ba Nzaami babo baakasala mu nzo a Nzaami mu efaana ki esala kii mu mayulu, edzyimi-a-dzyimi ki mandagha ma mali mu engaŋma mu mayulu. Mu kuulu, ŋa óbaana Moyidze otwu ebvulu, Nzaami ályele kundaa nde ti: Mono, gyighili myehene bwunu a bu oli efaana ki ánsuo me we ku yulu a munguo.
6 Lo mu bu, Nzaami aagwi nde esala ki ebvulu mupfunu, buulu nde li nzili yi obvurulu ogwihini ku obvulu bubwe, ku oli mu misiini mi mibvulu bubwe.
7 Buulu, kala ti ogwihini kuu nsomo oko óli kuu mukughu, nkini áli ka bákaasagha ogwihini kuu nsa ywolo o.
8 Lo ásyeme bo mu epfwumu ki ámono nde mu bo ŋa ályele ti:
Bu me bu olyele Mfumu: Mu bitsughu bi bili mu ogya,
me sa nsa ogwihini ya nzo a Isarayele,
ogwihini ku onyaghara ya nzo a Yuda.
9 Ogwihini oko ka okala ti anga ku ánsi me ya bataara ba bo o
mu etsughu ki ánkwara me bo mu kwogho,
mu opaha bo mu nsie yi a Edzipite.
Buulu bomo ka bási mukama mu ogwihini o me o,
mehe si áanyaghala bo,
obo me bu olyele Mfumu.
10 Ŋa mbihi a bitsughu bibye, obo me bu olyele Mfumu
Mono ogwihini ku akala aansa me ya nzo a Isarayele:
me sa ntwulu Mikyene mi me mu bitsimi bi bo,
me sa nsono mye mu mikolo mi bo.
Me sa nkala Nzaami a bo,
bo sa bakala ekaana e me.
11 Ka ofirikala a mbwuru si mumõ o wu akala aaluo nganda-mbwuru a nde wu bali nsie mõ,
bwunu we wu aalyele kundaa mbaala a nde ti: Soolo Mfumu!
Mu kuulu, bo bwohono sa basoolo me
obaana mu baara ba basala tee mu bakwuru
12 Buulu, me sa nsa bo kolokolo mu bipfwumu bi bo,
me ka afirindibili mweẽ mu masumu ma bo o.
13 Nzaami bu abili mu ogwihini ku onyaghara, nde aasi kuulu ti ogwihini kuu nsomo okala ku okulu. Lo elogho kiili ayi ki ekulu ya ki eŋmini, kye eekagye ku odzimini.