Mukaana kundaa
Ba-Eebere
OSOMO
Mukaana wu básono nde kundaa ba-Dzwife ba bánama nzili a Kriste. Ka basoolo mbwuru wu áasono mukaana wu o, lo ndagha yi a ngaŋma yili ti mbwuru munde ágyighili osoolo Bisono bibi ngili. Mu kuulu, me mu bye nde ákagwolo bifaana mu osuo engaŋma kundaa ba-Dzwife ba bánama nzili a Kriste. Bákamwehẽ bakriste baba nsomo nkara a kimini tee mu matala ma bábaana bo okabulusweme. Mu obo, mbwuru wu áasono bo mukaana wu ákaluomo bo mu osini a ndagha oyo mpini, mu ogwene onyaã nzili a Kriste.
Mu matala ma bankagha-kwuru, Nzaami áli ágwihini sa limõ ya ba-Dzwife. Nde ályele bo ti, kala mbwuru si lisumu, nde faana odzwa nyama mu ogwa nde mukaba ya Nzaami sa sa nde kolokolo. Lo mukaana wu li mu okalyele mu nkubu yi a ndaa nde ti, ogwihini ku onyaghara ku ósi Nzaami ya baara ba bási kana mu Mwana a nde obvulu kuu nsomo. Mu kuulu, ndagha yi oogyighili Yiisu-Kriste kundaa baara yibvulu mandagha ma ógyighili bangye-yulu, ya Moyidze, ya Aarõ, ya Dzodzuwe. Me Yiisu li Mwana a endoomo e Nzaami ki bágwi mukaba mu nkooro a masumu ma baara bwohono. Nswe munde wu aasa kana mu nde ka afirisyili a nzala a ogwa mikaba mu nkooro a masumu ma nde o. Nzaami sa sa lisumu li nde kolokolo.
Bu me bu baakakaba mukaana wu:
- Mwana a Nzaami li mbwuru wu munene (1.1-3).
- Yiisu bvulu bunene ya bangye-yulu (1.4–2.18).
- Yiisu bvulu bunene ya Moyidze ya Dzodzuwe (3.1–4.13).
- Yiisu li ngaa a Nzaami wu bvulu bunene (4.14–7.28).
- Yiisu aagyi a ogwihini ku obvulu ogwihini kuu nsomo (8.1–9.22).
- Mukaba a Yiisu li wu a mbunu ya nde li wu masini (9.23–10.31).
- Banga-a-kana babake ba banene baba nsi-nkulu (11.1-40).
- Litswe linama efaana e Yiisu (12.1–13.19).
- Suŋunu li mandagha ya mamboro mama masini (13.20-25).
1
Nzaami aabili kundaa bihi mu Mwana
1 Mu matala ma makulu, Nzaami ábili mu bifaana bilagha ya mu mansa malagha kundaa bankagha-kwuru mu mibighili.
2 Lo mu bitsughu bibi masini bi, nde aabili kundaa bihi-a-be mu Mwana, wu aatwulu nde mu ogwolo mapfa ma bilogho byehene. Me mu ndehe si nde ágyighili byehene bi bili.
3 Mwana wu, wu li osehene o nsia a Nzaami,
ya wu li omoŋono kuu bu ali nde,
aakasughu byehene mankaana mu ndagha a nde yi a lileene.
Bu amana otsehebe baara banga a masumu,
nde aabwi-nsini ku kwogho kii babaghala kii nsia mu mayulu.
4 Mwana bu abvulu bangye-yulu,
nde ágwolo pfa li nkwumu yibvulu bunene ya nkwumu yi a ndaa-bo.
Mwana bvulu bangye-yulu
5 Mu kuulu, kundaa nki ngye-yulu Nzaami ámaalyele ti:
«We li Mwana a me wu baghala,
lolo li me aamburu we?»
Bwunu we ti:
«Me sa nkala taara a nde
Ya nde sa akala Mwana a me wu baghala?»
6 Lo mu matala ma ágweghe nde mwana a nde wu a nsomo mu nsie, nde ályele ti:
«Nyaã bangye-yulu ba Nzaami bwohono bakunu mabuo ŋa nkulu a nde!»
7 Mu bangye-yulu, nde ályele bu:
«Nde aakasa ti bangye-yulu ba nde bakala mifulu,
Ya ti, basala ba nde bakala mile mi mbaa.»
8 Lo mu Mwana, nde ályele ti:
«A Nzaami, likubu li we lili lili mibvu ya mibvu!
Ya mukaana a emfumu e we li mukaana wu bunsumu.
9 We aadzyi bunsumu ya we aabele bubi,
Me mu obo Nzaami, Nzaami a we, áseme we
Bu agyiri ŋa yulu a mutswi a we maala mama esee
Nde aabvulusuo dzyi mu we ti bambaala ba we.»
10 Ya nde áfirilyele ti:
«Mfumu, ku ebaana, me we áagyigili nsie,
Ya mayulu mali bigyighili bi myaã mi we.
11 Byehene bibye sa bidzimini, lo we sa kala bwunu a bu li,
Byehene sa biŋmini ti anga binkuru,
12 Ya we sa fughuru bye ti anga bu baakafughuru enkuru ki ela ki baakalaha ŋa yulu,
Ya sa basobo bye ti anga bu baakasobo enkuru,
Lo we, we li wuunu munde ya we sa kala mu matala mwohono.»
13 Kundaa nki ngye-yulu Nzaami ámaalyele ti:
«Bwa-nsini ku kwogho e me kii babaghala,
Tee mu matala ma aansa me ti mitaara mi we mikala nkara a myili mi we?»
14 Bangye-yulu bwohono ka bali mifulu mi miikasalala Nzaami o, ya mi bágweghe mu osalala ba bafaana obagha pfa lili obvwughu?