2
1 Mu obo, bandughu ba me mu kana, be beme ligyighili osoolo ti ogya o bihi kundaa be ka ooli ku obwunu o.
2 Ŋa mbihi a ŋa bámwehẽ bihi kimini ya ŋa límono bihi mpara ku bvulu lili Filipe, ti bwunu a bu lisoolo be, bihi liibagha bukyini bu bukughu mu Nzaami a bihi mu oluo be Nsia yi Mbwe a nde ŋa kara li mamvulu.
3 Mpama yi líkagwa bihi baara ka yísiŋi mu epfwumu o, ka yísiŋi mu osuŋumu o, bwunu we mu mayele ma mabi.
4 Lo buulu me Nzaami aagyeele bihi ya aagwi bihi Nsia yi Mbwe, bihi ka liikabili mu ogwa baara esee o, lo mu ogwa Nzaami wu aakagyeele mikolo mi baara esee.
5 Mu kuulu, be lisoolo ti kaala bihi nkini liisalala mbiili yi mbwe mu opele baara o. Kaala bihi nkini liisuo be bitsimi bibi ntono a nzi o. Nzaami li mpughulu mu mandagha mamo.
6 Bihi ka liisagha masyighi ma maafa kundaa baara o, ngu okala kundaa be, bwunu we kundaa baara bakimi.
7 Bu lili bihi bantumu ba Kriste, bihi liikaakwighi be mu ogwa bihi budziri, lo bihi liili ti anga bike-bike ŋa kara li be. Ti anga ngughu wu aakatsyaha baana ba nde,
8 mu dzyi li líli a bihi mu be, bihi ka lídzyi o ti bihi líluo be yini a Nsia yi Mbwe yi a Nzaami, lo si ogwa bumweẽ bu bihi bameme mu be, mu kuulu be lili baara baba ntala kundaa bihi.
9 Bandughu mu kana, be lilibili mweẽ mu esala e bihi ya mu mpara yi liimono bihi. Mu kuulu, bihi liikabulutsala be Nsia yi Mbwe yi a Nzaami, mu okasala si mpyibi ya mwi, mu onyaã ogwa leme kundaa nswe mbwuru ŋa kara li be.
10 Be lili bampughulu, ya Nzaami si li mpughulu, ti ŋa nkulu a be ba liikasa kana, bihi liili a nzya-nzyara yi bungili, yi bunsumu ya yi baagwene a yi baasyeme.
11 Be lisoolo si ti bihi líili kundaa nswe mbwuru mu be ti bu ookakala taara ya baana ba nde.
12 Bihi lili mu okagwa be mpama, bukyini ya lili mu okasa be enkwili mu okala a nzya-nzyara yi aakagwa Nzaami budziri, nde wu áti be mbili mu Emfumu ya mu nsia a nde.
13 Me mu obo, bihi si liikabvurulu matuono kundaa Nzaami matala mwohono mu kuulu be bu ligyagha ndagha a Nzaami yi liiluo bihi be, be liikihi yo, ka ti anga ndagha a mbwuru o, lo nkara a bwunu a bu yili yo ndagha a Nzaami yi a ngaŋma, yili mu okabulusala mu be ba liikasa kana.
14 Mu kuulu, bandughu mu kana, be beme liinama mabwunu ma Nzaami mama mu Yiisu-Kriste ma mali ku Yude. Behe si liigyagha kundaa baara ba nsie a beme ba baagwene okasa kana mu Yiisu, mpara oyo yi oogyagha banga-a-kana baba ku Yude kundaa baara ba nsie a bomo.
15 Me bo baadzwi Mfumu Yiisu ya mibighili, me bo baamwehẽ bihi kimini. Bo ka baakagwa Nzaami esee o ya bo bali mitaara mi baara bwohono.
16 Bo baakakahaba bihi mu oluo baala ka bali ba-Dzwife o maluo ma maabvwuhu bo. Obo me bu baakakwuhu eteese ki masumu ma bo matala mwohono. Lo nkehe a Nzaami yiibwi mu bo.
Poole li a nzala a ofirimono basi Tesalonike
17 Lo mu bihi, bandughu mu kana, bihi lili la ya be mu manyuru mu mana matala, lo ka mu mukolo o. Mu matala ma, bihi lili a nzala a oyamono be yi alagha, ya bihi lili mu okasa mpini mpaala ndagha oyo yikughu.
18 Mansa malagha, bihi liikasagha oyamono be, ya meme Poole aangyeele ogya kundaa be, lo Satana aakakahaba bihi.
19 Mu obo, nande li emiini e bihi? Nande li esee e bihi? Nande li kagha lili mutwunu a bihi? Ka ngu behe si ŋa nkulu a Mfumu a bihi Yiisu, mu matala ma akala aagya nde o?
20 Mu engaŋma, me be lili nsia a bihi ya esee e bihi.