Mukaana a Poole kundaa basi
NGALATE
OSOMO
Wu me mukaana wu osóno Poole kundaa mabwunu ma Nzaami ma máli ku etsulu e nsie kii Ngalate. Nde áli agyene oko mansa mwolo, mu oyitsala bo Nsia yi Mbwe. Ba-Dzwife ya baala ka bali ba-Dzwife o, bákagyagha Nsia oyo mu okala bakeretyẽ. Poole ákaluo bo ti yini a kana mu Yiisu likughu osa ti, Nzaami amono bo baara baba nsumu. Lo ŋa mbihi a mana a matala, ba-Dzwife bana, bágyene ku Ngalate oko. Ya bákalyele oko ti, bakwuru mu banga-a-kana baba ku Yerusaleme báagweghe bo. Bo bádzihibi myehene mi ókaluo Poole. Bo bákabululyele ti nde ka áli ntumu wu a ngaŋma o, ya nde ka ákaluo engaŋma o. Bo bákalyele kundaa bo ti, buulu baala ka bali ba-Dzwife o baasi kana mu Yiisu, bo bafaana si osalala mi ookatumu Mikyene mi Moyidze. Bo bákagyili onyeme ndagha yi a osomo nzo a mbaa. Bo ti, ngu osomo nzo a mbaa ookasa kuulu ti Nzaami amono bo ti bo bali baara baba nsumu.
Basi Ngalate si bábaana okasa obo. Ya Poole bu ágyughu ndagha oyo, nde ákolo nkehe yi alagha. Mu kuulu, ka oli onama Mikyene mi Moyidze okughu osa ti Nzaami amono bo baara baba nsumu. Me mu obo Poole ásono mukaana kundaa babo ba báli ku Ngalate, mu osuo bo ti Nzaami ka ályele obo o. Osomo nzo a mbaa ku bályele, me osa ti mufulu a mbwuru faana okala wu a tse-tse. Nde ályele bo ti Nzaami ámono Abarahame, Taara a ba-Dzwife, mbwuru wu a nsumu ŋaala nde áli nkini ásomo nzo a mbaa o. Lo yini a kana mu Yiisu, wu áakpi ŋa kuruwa, likughu osa ti bihi-a-be bikala baba nsumu ya likala a bigyighili bi biikagwa Nzaami esee.
Mu obo, mukaana wu bakabala nde mu manzili nsaama ma:
- Mamboro ya Nsia nga-mõ yi Mbwe: (1.1-10).
- Poole gyagha Nsia yi Mbwe: (1.1–2.14).
- Mu kana baara baabvwughu: (2.15–5.1).
- Kriste ágwi bihi bumpoholo: (5.2-12).
- Okala mu litumu li Mufulu, lo ka mu lili nyuru o: (5.13-26).
- Osala mu nkooro a bubwe bu banganda: (6.1-10).
- Ogyehe kuu masini ya mamboro: (6.11-18).
1
Mamboro
1 Me Poole, wu li ntumu, mu gwaa li Yiisu-Kriste ya lili Nzaami, Taara wu áasiili nde ŋa kara li ba bápki, lo me ka ndi ntumu mu dzyi li baara o, bwunu we mu libaha li mbwuru.
2 Emõ ya bandughu mu kana bwohono ba bali kunu ya me, me nsono mukaana wu kundaa mabwunu ma Nzaami ma mali mu etsulu e nsie kii Ngalati mu olyele ti:
3 Nyaã bwehe ya edzuunu bi bifi kundaa Nzaami Taara a bihi ya kundaa Mfumu a bihi Yiisu-Kriste, bikala ya be!
4 Yiisu-Kriste ágwi bumweẽ bu nde ndeme mu nkooro a masumu ma bihi-a-be, mpaala akwulu bihi-a-be mu nsie yi a bubi yi, ti bwunu a bu oli gwaa li Nzaami, wu li Taara a bihi-a-be.
5 Nyaã nsia a Nzaami yikala yi mibvu ya mibvu! Amene.
Nsia nga-mõ yi Mbwe
6 Me nkiŋimi mu maswa ma liisi be mu otyeghe munde wu aati be mbili mu bwehe bu Kriste mbihi, mu onama nsia yi mbwe nkimi.
7 Lo mu ogyighili otala, ka yili Nsia yi Mbwe nkimi o, mu kuulu yini a baara ba bali mu okasa yaghala ŋa kara li be, ya ba badzyi obyihi Nsia yi Mbwe yi a Kriste.
8 Lo kala ti mbwuru, bwunu we bihi bameme, bwunu we kala ti ngye-yulu mumõ wu a mayulu tsala be Nsia yi Mbwe, yili a lisobo ya yi liitsala bihi be, nyaã babiili nde epwolo!
9 Bihi liimaatswama olyele be yo, ya mu matala ma me firindyele ti: Kala ti mbwuru tsala be Nsia yi Mbwe nkimi yili a lisobo ya yi liigyagha be, nyaã babiili nde epwolo!
10 Mu matala ma, me bu ndi mu okasagha ti baara bakihi me, bwunu we kuulu ti Nzaami akihi me? Baara me ndi mu osagha ogwa esee? Pele, kala ti me baara aakandzyi ogwa esee, nkini me ka akaankihi okala musala a Kriste o.
Poole gyagha ya tuoho Nsia yi Mbwe
11 Bandughu ba me mu kana, mu engaŋma, me ndyele kundaa be ti: Nsia yi Mbwe yi, yi aantuoho me be ka yifi kundaa a mbwuru o.
12 Mu kuulu, ka oli mbwuru aagyaha me yo o, bwunu we aaluo me yo, lo Yiisu-Kriste áasuo me yo.
13 Buulu be líigyughu bu óli nzya-nzyara a me mu matala ma makulu, ŋa ándi me mu libwunu li ba-Dzwife. Be lisoolo bu áakamwehẽ me libwunu li kimini mu dzighi, ya bu áakansagha me odzwa lo.
14 Mu osalala ku mikyene ya ekulu ki ba-Dzwife, me áakamvulu ba-Dzwife balagha ba bali eseene emõ ya me. Mu kuulu me áandi a ebaa kii elagha mu okakala ekulu ki bankagha ba bihi.
15 Lo Nzaami wu áasuolo me obaana mu mweẽ a ngughu a me, ya wu áati me mbili mu bubwe bu nde,
16 nde aamono bubwe mu osuo me Mwana a nde mu matala ma, mu kuulu me ntuoho Nsia yi Mbwe yi a nkwumu a nde kundaa baala ka bali ba-Dzwife o. Lo mbala mõ, me ka ánduomo luo kundaa mbwuru o,
17 ya me ka ámangye ku Yerusaleme mu oyimono babo ba báli bantumu nsomo ya me o. Lo me áangyene ku nsie yi a Arabi. Bu ámara oko, me áambvughuru ku bvulu lili Damase.
18 Yini a ŋa mbihi a bamvulu batere, me áankumu ku Yerusaleme mu oyimoŋo ya Sefase. Ya me áansi bitsughu kwumu ya bitaana (15) ya nde.
19 Me ka ámono ntumu mukimi o, kala ti ka yini a Dzake o, mbwee a Mfumu.
20 Nzaami li mpughulu mu mandagha ma ma ndi mu osono me be, me ka mpfiri mpya o.
21 Ŋa mbihi oŋo, me áangyene ku bitsulu bi nsie bibi Siri ya bibi Silisi.
22 Lo baara baba mabwunu ma Nzaami mama mu etsulu e nsie kii Yude, ma máli mu Kriste, nkini ka bámaamono edzili e me o.
23 Bo yini a nsia ali bágyughu ti: «Munde wu áakamwehẽ bihi-a-be kimini mu matala ma máluru, mu matala ma, li mu okabulutsala ti anga nsia yi mbwe yi a kana li ákasagha nde odzihibi».
24 Mu obo bo bákasyighi Nzaami mu nkooro a me.