MUKAANA A POOLE KUNDAA BASI
KOLOSE
OSOMO
Mukaana wu Poole áasono nde kundaa banga-a-kana baba mu bvulu lili Kolose. Nde nkini áli ka ámaato oko o, lo nde ágyughu nsia ti bakeretyẽ baba oko bágyili okwara kana. Me Epafarase, ndughu a nde áatswama oluo bo Nsia yi Mbwe.
Ŋa mbihi a mana mibvu, baara babake bágyene oko ya bákaluo mandagha mama ya lisobo ya Nsia yi Mbwe yi óluo bo Epafarase nsomo. Bo bákalyele ti, kala mbwuru dzyi ti Nzaami abvwuhu nde, nde faana nsomo okabuono bangye-yulu ya bilogho bibike bi bibvulu baara ba nsie. Bo báfirikalyele bo ti bo bafaana osomo nzo a mbaa ya ti bo ka báfaana okadza bilogho bibike o. Epafarase áyimono Poole ku Rome ku áli nde mu boloko ya ályele nde mandagha mwohono ma. Poole bu agyughu mandagha mamo, nde ásono bo mukaana wu mu osuo bo ti yini a kana mu Kriste liikasa ti mbwuru abvwughu.
Bu me bu baakakaba mukaana wu:
- Mboro (1.1-2).
- Lisamana mu obvuhulu matuono (1.3-14).
- Kriste na ya nde emakye ási? (1.5–2.19).
- Laama li linyaghara mu Yiisu-Kriste (2.20–4.6).
- Mboro yi masini (4.7-18).
1
Mboro
1 Me Poole, ntumu a Yiisu-Kriste mu dzyi li Nzaami, ya Timote ndughu mu kana,
2 lisono mukaana wu kundaa ba bangili ba bali ku Kolose, bandughu ba bihi mu kana: Nyaã bwehe ya edzuunu bi bifi kundaa Nzaami Taara a bihi, bikala ya be!
Nsia yi Mbwe yiito kundaa be
3 Bihi liikabvurulu matuono kundaa Nzaami, Taara a Mfumu a bihi Yiisu-Kriste, ya nswe matala liikasamana mu be.
4 Mu kuulu, bihi liigyughu bu baakabili mu kana li be mu Yiisu-Kriste ya mu dzyi li lili a be mu ba bangili bwohono,
5 mu nkooro a emiini ki baabunu be mu mayulu. Emiini ekye ki lígyighu be nsomo mu ndagha yi a ngaŋma, ndagha oyo me Nsia yi Mbwe.
6 Nsia yi Mbwe oyo yiito kundaa be, bwunu a bu yili mu okaburu yo bimburu ya yili mu okatsaŋama mu nsie nsyini, bwunu obo si yo yili ŋa kara li be, obaana etsughu ki lígyughu ya lígyahaba be bwehe bu Nzaami mu engaŋma.
7 Bwunu a bu óluo be Epafarase, ndughu a bihi wu mukolo ya nganda a bihi mu esala, nde li mu be musala a Kriste wu bakughu osa kana mu nde.
8 Ya nde aalyele bihi mu nki dzyi Mufulu ali mu okasala mu be.
Lisamana
9 Me mu obo, obaana etsughu ki lígyughu bihi nsia oyo, bihi si ka lili mu okakolo o mu osamana Nzaami mu be, ya lili mu okaluomo ti be ligyighili ogyahaba waa li Nzaami mu bunsughu bwohono ya mayele mama Mufulu,
10 mpaala be likala a nzya-nzyara yi afaana ŋa nkulu a Mfumu, mu kuulu be ligwa nde esee mu mandagha mwohono, be liburu bimburu mu bigyighili bi bibwe bibi mawa-mawa ya likulu kunsa ligyahaba li Nzaami.
11 Be sa ligwama mu lileene mu mandagha mwohono mu mpini a nde yi a nsia, mu kuulu be likala a mukama ya likuru mukolo mu mandagha mama otsihi mwohono.
Mwana li efaana e Nzaami wu baagwene okamono
Mu esee,
12 liikabvurulu matuono kundaa Taara wu áasi kuulu ti be likala ba bakughu ogyagha kaba li pfa lili ba bangili kunsa otsyeme.
13 Nde ábvwuhu bihi mu litumu li mpyibi yi a laŋa-laŋa mu ogye a bihi kunsa empu e Mwana a nde wu a dzyi.
14 Mu mwana a nde bákwulu bihi ya bási masumu ma bihi kolokolo.
15 Nde li efaana e Nzaami wu baagwene okamono,
Mwana wu a nsomo mu baara ya mu byehene bi bágyighili,
16 mu kuulu, me mu nde bágyighili bilogho byehene,
mu mayulu ya ŋa nsie,
bilogho bi baakamono ya bi baagwene okamono,
makubu ya bimfumu,
bimpu ya litumu.
Bilogho byehene bágyighili mu nde ya mu nkooro a nde.
17 Nde, nde li nsomo mu bilogho byehene,
ya me mu nde bilogho byehene bili ŋa bibini bi bye.
18 Nde li mutswi a nyuru, nyuru me libwunu li Nzaami.
Nde li ebaana,
mwana wu a nsomo wu ásighili mu ba bákpi,
mu kuulu nde akala wu a nsomo mu bilogho byehene.
19 Mu kuulu Nzaami ádzyi ti enzaami e nde ekala kii mukughu mu Mwana a nde,
20 ya mu Mwana a nde, Nzaami ábvurulu ogwihini ŋa kara li byehene ya ndeme,
ngu okala bi bili ŋa nsie,
ngu okala bi bili mu mayulu,
bu asi edzuunu mu Mwana a nde,
mu makili ma mátsaŋama ŋa kuruwa.
21 Ya be baala mu matala ma makulu líili banzyi ya mitaara mi Nzaami mu bitsimi ya mu bigyighili bi be bi bibi,
22 mu matala ma, Nzaami aasi ti be ligwihini ya nde mu lipfu li Mwana a nde, mu nyuru yi a musunu, mpaala be limoŋono ba bangili ŋa nkulu a nde, ba bagwene a bifwumu ya ba bagwene a mi baasyeme bo.
23 Lo be lifaana okala munsa kana, ba bagyighili omyehe midza, gwene onyiĩ, baala ka bakughu ogye a bo la ya emiini e Nsia yi Mbwe yi lígyughu be o, yi bátsala mu nsie nsyini, ya me mu yo me Poole ndi musala.
Mvulu a ntumu Poole
24 Mu matala ma, me ndi a esee mu mpara yi ndi mu okamono me mu nkooro a be, ya me ndi mu okabwehe mu nyuru a me kimini li ligwene mu kimini li lili mu nyuru a Kriste, libwunu li Nzaami.
25 Me ayi musala a lo, bwunu a bu ooluomo me Nzaami mu osala esala e nde, mpaala me ntwoho ndagha a Nzaami yohono kundaa a be.
26 Mu matala ma makulu, ndagha oyo áli básweghe yo kundaa biseene byehene matala mwohono. Lo mu matala ma, nde aasuo yo epankala kundaa ba bangili ba nde.
27 Kundaa bo, Nzaami aadzyi osuo nsia ya busini bu ndagha oyo ŋa kara li baara baala ka bali ba-Dzwife o. Ensweghe ekye me Kriste mu be, emiini kii nsia!
28 Me nsia a Kriste munde bihi lili mu okabulutsala, bu ligyehe ya liluo nswe mbwuru mu bunsughu, mu kuulu nswe mbwuru akala mukughu mu Kriste.
29 Me mu obo me ndi mu okasala ya ndi mu okadzwana mu mpini a nde, yili mu okasala mu me mu lileene.