Mukaana a Poole wu a myele kundaa basi
KORENTE
OSOMO
Wu me mukaana wu muke wu ósono Poole kundaa bakeretyẽ baba ku bvulu lili Korente. Munsa mukaana wu átswama sono nde bo, Poole ályele bo ti nde áli a nzala a oyimono bo. Nde áluomo boho si mu otolo bikaba mpaala bagweghe bye kundaa banga-a-kana baba ku Yerusaleme. Nde ákatsimi ti ndeme akala aayigwolo bye, lo nde ka ágyene oko o. Buulu nde ka ágyene oko o, ligyughu bu óluru mandagha: Timote áli mu okagye ku Korente, mu nzili, nde ágyughu mansia mama nzya-nzyara a bakeretyẽ baba oko. Lo mansia mamo ka máli ma mabwe o. Nde ágyughu ti ndaama a ba-Dzwife áli bagyene ku Korente, ya bo bákaluo ndagha nkimi yi a lisobo ya Ndagha yi Mbwe yi óluo Poole nsomo oko. Ba-Dzwife babo bákalyele si ti Poole ka áli ntumu a Kriste wu a ngaŋma o. Timote bu ayabvughuru, ályele mandagha mamo kundaa Poole ya Poole ányoõ ku olagha. Me mu obo nde ágwolo munkaana wu osono bo mukaana mpaala asuo bo bitsimi bi nde, ya alyele bo mu emakye nde ágwene oyimono bo. Munsa mukaana wu Poole ályele bo ti nde li ntumu a Kriste mu ngaŋma, mu kuulu oli ya lisobo mu efa ki aakasala nde ya bu ookaluo babake nzili a Mfumu. Me mu obo bantumu baba mpya bo bákabele nde. Nde ányoõ mu kuulu basi-Korente báli ku engulu kii ba baakabele nde. Nde áfirilyele bo basa mukama mu otolo bikaba mpaala babaha banga-a-kana baba ku Yerusaleme. Nde ábwehe ti nde li a nkini etsimi ki oyimono bo, mpaala nde alyele engaŋma kundaa babo bali nkini kunsa masumu o. Kala ti Poole ákasa epini mu olyele ti nde li ntumu mu ngaŋma, mu kuulu nde ákadzyi ti baara basoolo Nsia yi Mbwe, ya basoolo si ti Yiisu li Mfumu.
Bu me bu baakakaba mukaana wu:
- Poole gwi Basi Korente mamboro ya bvurulu matuono kundaa Nzaami (1.1-11).
- Esala e ntumu kundaa banga-a-kana (1.12–2.17).
- Odzyi nganda bwunu a bu odzyi bihi Kriste (3.1–7.16).
- Libaha kundaa bawele (8.1–9.15).
- Poole lyele ti nde li ntumu mu engaŋma (10.1–13.10).
- Mamboro mama masini (13.11-13).
1
Mamboro
1 Me Poole, ntumu a Kriste-Yiisu mu waa li Nzaami. Ya Timote ndughu mu kana a bihi a be, me nsono mukaana wu kundaa libwunu li Nzaami li lili mu bvulu lili Korente, ya kundaa baara ba Nzaami ba bali mu etsulu e nsie kyehene kii Akayi.
2 Nyaã bwehe ya edzuunu bi bifi kundaa Nzaami Taara a bihi-a-be ya kundaa Mfumu Yiisu-Kriste bikala ya be!
Poole bvurulu matuono kundaa Nzaami
3 Masyighi kundaa Nzaami, Taara a Mfumu a bihi a be Yiisu-Kriste, Taara nga-a-nyiĩ ya Nzaami nga-a-mpama yohono!
4 Nde aakagwa bihi mpama mu mpara a bihi yohono, mpaala bihi likughu okagwa mpama kundaa babo bwohono ba bali mu mpara, mu mpama yi liikabagha bihi bameme kundaa Nzaami.
5 Mu kuulu, bwunu a bu oli mpara a Kriste yi alagha mu bihi, bwunu obo si mpama a bihi yiikakala yi alagha mu Kriste.
6 Kala ti bihi lili mu mpara, me mu ogwa be mpama ya okwulu o be. Kala ti bihi liibagha mpama, me mu nkooro a mpama a be, yi aakasa ti be likakuru mukolo mu mpara gyini oyo yi liikakwumu bihi si.
7 Ya emiini e bihi mu nkooro a be eli a mpini, mu kuulu bihi lisoolo ti be bu likaba mpara a bihi, behe si lili a mpama emõ ya bihi.
8 Mu kuulu, bandughu mu kana, bihi ka lidzyi o ti be ligwene osoolo kimini li límono bihi ku etsulu e nsie kii Adzi: Bamwehẽ bihi kimini li lilagha, kimini li libvulu mpini a bihi, ya bihi ka lífirisyili a emiini o ti sa likala baba mweẽ.
9 Lo mu mikolo, bihi bameme áli liisoolo ti bihi sa likpa. Mpaala linyaã osa kana mu bihi bameme, lo mu Nzaami wu aakasiili ba bápki mu lipfu.
10 Me nde áakwulu bihi mu lipfu lili obo ya akala aakwulu bihi mu lo. Eẽ, bihi lili a emiini e bihi mu nde, ya bihi lili a emiini ti nde akala aafirikwulu bihi.
11 Be beme si lili mu okabaha bihi, bu liikasamana mu bihi. Me obo, bwehe bu lígyagha bihi mu nkooro a nsamana a baara balagha, buukala ndagha yi oobvurulu baara balagha matuono kundaa Nzaami mu bihi.
Poole sobo bitsimi mu midzye mi nde
12 Mu kuulu ndagha yi lili a bihi mutwunu me bumpughulu bu likyi li liikabili mu mikolo mi bihi. Bihi liidzyara mu nsie, emvulu-ngughu ŋa busu bu be gwene a ligwagha, ya mu bunsumu bi biikafa kundaa Nzaami. Ka oli mu bunsughu bu baara o, lo mu bwehe bu Nzaami.
13 Bihi ka lili mu ofirisono be ndagha nkimi o, ŋa yulu a mi lili mu okatala ya okabaghala be. Ya me nsimi ti be tumu ligyighili obaghala,
14 bwunu a bu liibaghala be ndaama ti: Bihi lili ndagha yi likughu okoboro be ntulu, bwunu obo si be liikala mutwunu a bihi mu etsughu e Mfumu a bihi a be Yiisu.
15 Ya buulu me áansi mukolo mu ndagha oyo, me áandi a etsimi ki ogyamono be, mpaala ŋa aangya me, me ngwa be esee mu sa lili ywolo,
16 ya me mara kundaa be, me áandzyi ogye ku etsulu e nsie kii Masedwane, ya ŋa nseele, me bu mara ku Masedwane, me ali aandzyi ogyabvughuru kundaa be. Mpaala be ligwa bi bifaana mu midzye mi me ku etsulu e nsie kii Yude.
17 Me bu aangwene okuhu munkaana wu, odzyi olyele ti me ka aakankuhu mandagha ma aakankuru me o? Bu odzyi olyele ti bitsimi bi aankuru me bili bibi embwuru, mpaala mu me mu sa limo okala a «Eẽ» ya «Pele»?
18 Nzaami mpughulu a me: Ndagha yi liilyele bihi kundaa be ka yili «Eẽ» ya «Pele» o.
19 Mu kuulu Mwana a Nzaami, Yiisu Kriste, wu lítsala bihi nsia kundaa be, me, Timote ya Silibvẽ, ka áli «Eẽ» ya «Pele» o. Lo mu nde matala mwohono óli yini a «Eẽ»!
20 Mu kuulu misiini mi Nzaami myehene mu Yiisu mili yini a «Eẽ». Me mu obo bihi liikalyele mu nde «Aamene» mu ogwa nsia kundaa Nzaami .
21 Munde wu aakagwa bihi ya be mpini mu Kriste, ya wu áaswolo bihi mu okala baba ndaa nde, me Nzaami.
22 Nde ási bihi si enyeme e nde ya átwulu Mufulu a nde mu mikolo mi bihi ti anga esughu mu bi aagwa nde bihi.
23 Nzaami li mpughulu a me, nyaã nde adzwa me, kala me mpfiri. Me ka áyambvughuru ku Korente o, mu kuulu be linyaã omono mpara.
24 Bihi ka lili mu okasagha okwighi be mi lifaana osa kana o. Lo bihi lili mu okasala emõ ya be mu esee e be buulu be liigyighili ogwama mu kana,