TAITAS
Suh Pool Ih Raang Arah Le
Ephangjatjih
Taitas ah Ranglajatte dung nawa lek ano Kristaan ih hoonta eno Pool damdi Rangte mootkaat ni roong mota.Taitas suh Pool leeraang ah heh damdi roong mote Kritiite suh baat ha, erah ni chaas mootkaat soksam suh tongthuk arah suh ah. Le adi jaatjom tiitwaan raangha.
Jaakhoh ah, Taitas suh chaas phansiitte mihak dang ajang ah mamah angtheng ah ih baat ha, ehanthoon ah Kriti mina loong ethih reeraangte loong asuh baat ha. Erah lidi, Taitas suh chaas mina loong hephan hejaat di mote asuh mamet nyootsoot theng ah baat ha, wikuh teekaang, jaaro jaalah, nyia dah loong raang ih ah. Hethoondi, arah raangte warah ih Taitas suh Kristo mina loong dang ajang tiit ah hukse baat koha, ehanthoon ah joonte sano ih tong tiit nyia semroongroong ih tong tiit ah baat ha, nyia emiksuk mui ah eto etheng ih baat ha, erah dam ih edaan mui jengmui, nyia chaas ah lapheephaak tiit ah baat ha.
Hemong Dowa Jatjih
Ephangjatjih (1:1-4)
Chaas ni mote loong (1:5-16)
Chaas ni hephan hejaat dung ni mote(2:1-15)
Chaankot tiitkhaap nyia echoojih tiit banbaat (3:1-11)
Hethoon tiit (3:12-15)
1
1 Arah le ah langla, Rangte laksuh nyia Jisu Kristo Kaamwah Pool jiin nawa.
Ngah ah langla Rangte mina danje choi loong ah chosok suh nyia seng thooroom ih baat ha jun ih amiisak lam nah mamet hanpi theng ah nyia siit theng tiit ah nyootsoot suh daapkaat tahang,
2 erah tiit ah seng babah uh lathoon theng roidong asuh laalomli adi roopla. Babah uh eleek tiit labaatte, Rangte ih, seng suh saapoot maang rookliika ngakhodi erah roidong jeng kakham ah hoonta,
3 eno saapoot chang adi heh tiitkhaap ni dongjat thukta. Erah loong mootkaat ah ngah suh kotahang, eno seng Pangte Rangte ih baat halang jun ih tumbaat hang.
4 Nga sah Taitas suh raanghang, seng ah esiit tuungmaang di roopli.
Seng Rangte nyia pangte Kristo Jisu ih an suh minchan nyia semroongroong ah toom koho.
Kriti ni Taitas mootkaat
5 Ngah ih an Kriti ni thiinhaat taha langla, maangthoon mootkaat loong ah phanjangjang angthuk suh nyia samthung rep nah chaas phansiitte loong ah dongsiit suh thiinhaat taha. Ngah ih huk baattaan hala samthun et uh:
6 mihak phokhoh ah moongtaang muh jaatjaat angtheng; heh minuh ah esiit luulu jaatjaat angtheng; nyia heh sah ah hanpiite angtheng nyia heh reeraang pakna ese, adoleh mih jeng chaatchaat ang arah angtheng.
7 Chaas mihak phokhoh ah Rangte mootkaatte ang abah heh reeraang adoh moong ataang laje theng. Heh ah laatchaatte mina adoleh ten seek ih khatte mina lajaatjaat angtheng, adoleh kham mokte adoleh changrookte adoleh ngun doh nyamnyookte lajaatjaat angtheng.
8 Heh wenwah soksamte nyia mootkaatse suh nookte angtheng. Heh teeteewah jen soksamte, epun mina, esa mina, nyia phanjangjang angtheng.
9 Heh ih Rangte tiitkhaap ah dangdang ih kapjih marah laalomjih nyia rang banlam tiit di roongroopla rah ah. Emah lam ih ba heh ih mihoh suh jen nyootsoot ah erah dam ih Rangte tiit daante loong asuh neng moongtaang ah mi renbaat korum ah.
10 Tumeah, amiisak tiit daante nyia lalangka jengkhaap nawa ih mokwaante mina hantek je ah, ehanko ah Jehudi thooroom nawa lekte miloong ah reeraangla.
11 Erah loong jeng ah tanghaam etjih jaatjaat, tumeah neng eh lanyootjih loong ah nyoot rum ano warep changka ni thungjoong thuk rumha, eno erakri etheng lampo nawa eh ngun akom ah niik et rumha.
12-13 Erah tiitbaatte ah Kritiite wasiit neng hah hah nawa khowah angta, heh ih amiisak tiit amet baatta, “Kriti mina loong ah saarookwih eleek tiitbaatte, ethih siiawi likhiik, edem mina nyia pookwok sawok mina loong.” Erah raangtaan ih an ih neng ah dangdang ih kanja rum uh, eno ba neng hanpi ah rongtangtang ang ah
14 nyia Jehudi loong te awah khiikkhi nyia amiisak tiit thaajuute mina loong jiin nawa ra hala jengdang ah takah kap rumka ang ah.
15 O mina tenthun mongtham esa ang ah, heh di jaatrep ah esa ang ah; enoothong o mina miittah hoomte adoleh lahanpiite loong raangtaan ih tumjih uh esa tah angka, tumeah nengthung nengtak ni miittah ah ejen dong thuk et rumta.
16 Rangte ah ejat et hi ih neng tu nawa ih chaang rumha, enoothong neng reeraang nawa ih bah edaan et rumha. Neng ah mih misukte nyia jeng lachaatte mina, tumjih uh ese di tapun rumka.