20
နှစ်တထောန်
1 အယ်ဘီးန ကောန်းဂန်တမန်တပါးဟှာ နတ်ဆောင်းတွမ်းရဲ့ သော့‑က်န ရရာတိုင်း ကီးဟှူ သံကြိုးလေဟှို သူ့ရဲ့လတ်မာ ကိုင်ဟှားဘီး ကောန်းဂန်ဘောင်ဟှ ဆင်းလာဇာဟှို ငါဗြင်ရဟှယ်။
2 သူဟှာ စာတန်မာရ်နတ်ဖြစ်ဟှူ၊ ရှေးဗွီဟောန်းဖြစ်ဟှူ နဂါးဟှို ဖမ်းဘီး နှစ်တထောန်ခယ်ဟှားဟှယ်။
3 နှစ်တထောန်ကူဟှူခီထိ လူလေဟှို နော့‑က်ထပ် လှည့်ဇားနိုင်ဘဲနေအောန် သူ့ဟှို နတ်ဆောင်းတွမ်းထဲဟှို ပစ်ခ္လဘီး၊ ပိဟှားလိုက်ဘီး ဇိနခတ်ဟှားလေဟှယ်။ အယ်ခီကာလကူဘီးမှ သူ့ဟှို ရှစ်ဟှားလွတ်ပေးရဟှယ်။
4 အယ်ဘီးန ပလ္လင်လေန အယ်ပလ္လင်ထတ်မာ ထိုင်နေဟှူ သူလေဟှို ငါဗြင်ရဟှယ်။ အယ်သူလေဟှာ တရားစီရင်ဟှို့ ခွမ့်အာဏာဟှို ရဂေ့ဟှယ်။ အယ်ဘီးဟှာ ယေရှုနဆိုင်ဟှူ သတ်သေခံချစ်တွပ်ရော၊ ဘုရားသခင်ရဲ့ စကားတော်တွပ်ရော၊ ခေါန်းဖြတ်ခံရဟှူ သူလေရဲ့ ဝိညာဉ်လေန သားရဲန သားရဲရဲ့ရောက်ထုဟှို ကိုးကွယ်ဘဲ သူ့ရဲ့ဇိဟှိုရော၊ သူးနို့လေရဲ့ ဖူးမာ အယ်မျိုးမှုဘဲဟှာ လတ်မာ ခံဘဲဟှူ သူလေဟှိုရော ငါဗြင်ရဟှယ်။ သူးနို့ဟှာ သတ်ပ္လန်ရှင်ဘီး နှစ်တထောန်လောင်းလောင်း ခရစ်တော်နတူးဒူ အောက်စိုးရဂေ့ဟှယ်။
5 ရင်ဟှသေဟှားဟှူ သူလေဟှာ နှစ်တထောန်ကူခန်ထိ သတ်ရှင်ရဂေ့ဟှ။ အယ်ဇာဟှာ ပထမ ထမြော့‑က်ရှင်း ဖြစ်ဟှယ်။
6 ပထမ ထမြော့‑က်ရှင်းမာ ပါဟှူသူဟှာ မင်္ဂလာရှိဟှူသူ၊ သန့်ရှင်းဟှူသူ ဖြစ်ဟှယ်။ ဒုတိယ သေရှင်းဟှာ သူးနို့လေထတ်မာ တဂိုးမှေ့ဟှမ်း။ သူးနို့ဟှာ ဘုရားသခင်န ခရစ်တော်ရဲ့ ယဇ်ပုရောဟိတ်လေ ဖြစ်ဂေ့ဘီး ခရစ်တော်နတူးဒူ နှစ်တထောန် အောက်စိုးဂေ့လေ့မယ်။
စာတန် ရှောင်းဟှားဟှူကြောန်း
7 အယ်နှစ်တထောန် ကူဟှားဟှူ ခီမာ စာတန်ဟှာ သူခယ်ဟှားခံရဟှူ တွမ်းထဲဟှနေ လွတ်ပေးရှင်းဟှိုခံရဘီး
8 မ္လေဂီးလေးမျစ်နှာမာရှိဟှူ လူမျိုးလေဖြစ်ဂေ့ဟှူ ဂေါဂ၊ မာဂေါဂဟှို လှည်းဖြားဟှို့တွပ်န စစ်ပွဲတွပ်၊ သူးနို့ဟှို စုဝီးဂေ့ဟှို့တွပ် ထွပ်ဟှားလေ့မယ်။ သူးနို့လေဟှာ ပန်လယ်သဲလောင်းလော့‑က် များဂေ့ဟှယ်။
9 သူးနို့လေဟှာ မ္လေဂီးရဲ့ ရရာတိုင်း က္လယ်ဟှူနေရာဟှို တတ်လာဂေ့ဘီး သန့်ရှင်းသူလေရဲ့ တပ်စခန်းန ရှစ်ဇာကောန်းဟှူဗြို့ဟှို ဝိုင်းဟှားဂေ့ဟှယ်။ အယ်ခီမာ ကောန်းဂန်ဘောင်းဟှ မီးဟှာ က္လလာဘီး သူးနို့လေဟှာ လောန်ဘီးဟှာ ဖျစ်ဆီးခံရဂေ့ဟှယ်။
10 သူးနို့ဟှို လှည့်ဇားဟှူ မာရ်နတ်ဟှိုလည်း သားရဲ့န ပရောဖက်တုယောန်ရှိဟှူ၊ ကန့်နရောဟှားဟှူ မီးအိုင်ထဲဟှို ပစ်ခ္လရှင်းဟှို ခံရဟှယ်။ သူးနို့လေဟှာ နေ့ရောညဉ့်ရော ကမ္ဘာဆစ်ဆစ် ညှဉ်းဆဲရှင်းဟှို ခံရဂေ့လေ့မယ်။
နော့‑က်ဆောင်း တရားစီရင်ဟှူကြောန်း
11 အယ်ဘီးန ဖ္လူဟှူပလ္လင်ဂီးန အယ်ပလ္လင်ထတ်မာ ထိုင်နေဟှူ သခင်ဟှို ငါဟှာ ဗြင်ရဟှယ်။ ကောန်းဂန်န မ္လေဂီးဟှာ အယ်သခင်ရဲ့ရှေ့မာ ပျော့‑က်ဟှားဘီးဟှာ နေဟှို့နေရာ မှေ့ဟှမ်း။
12 ရင်ဟှသေဟှားဂေ့ဟှူ ကီးငယ်လေဟှာ ပလ္လင်ရှေ့မာ ရပ်နေရှင်းဟှို ငါဗြင်ရဟှယ်။ စာစောန်လေဟှို ဖွမ့်ဟှားဘီး သတ်စာစောန်န တခြားစာစောန်ဟှိုလည်း ဖွမ့်ဟှားဟှယ်။ ရင်ဟှသေဟှားဟှူ သူလေဟှာ အယ်စာစောန်လေမာ ရေးဟှားတိုင်း သူးနို့လေရဲ့ လောက်ဟှူမှုလေတိုင်းဘဲ တရားစီရင်ရှင်းဟှို ခံရဂေ့ဟှယ်။
13 ပန်လယ်ဟှာ သူမာရှိဟှူ လူသေလေဟှို ပေးလေဟှယ်။ သေရှင်းန မရဏာနိုင်ငံလေဟှလည်း သူ့မာရှိဟှူ လူသေလေဟှို ပေးလေဟှယ်။ အယ်ခီမာ လူလေ ဂူလောင်းဟှာ သူးနို့ လောက်ဟှားဟှူတိုင်း တရားစီရင်ရှင်းဟှို ခံရဂေ့ဟှယ်။
14 အယ်ဘီးန သေရှင်းန မရဏာနိုင်ငံဟှလည်း မီးအိုင်ထဲဟှို ပစ်ခ္လရှင်းဟှို ခံရဂေ့လေ့မယ်။ (အယ်မီးအိုင်ဟှာ ဒုတိယ သေရှင်း ဖြစ်ဟှယ်။)
15 သတ်စာစောန်မာ စာရင်းဝမ်ဘဲဟှူသူ ရှိမျှဟှိုလည်း မီးအိုင်ထဲဟှို ပစ်ခ္လရှင်းဟှို ခံရဂေ့ဟှယ်။