2
ဧဖက်သင်းတော်တွပ် ဒန်းစကား
1 “ဧဖက်ဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။
“ညာလတ်မာ ကြယ်ခွန်နစ်လောင်းဟှို ကိုင်ဟှားဟှူသူ၊ ရွှေမီးခွပ် ခွန်နစ်လောင်းရဲ့ လယ်မာ သွားလာနေဟှူသူဟှ အယ်မျိုးမိန့်တော်မူဟှယ်။
2 နန့်ရဲ့ လောက်ဆောန်ရှင်းလေ၊ နန်ရဲ့ ကြိုးစာအားထုမှုန သီးခံရှင်းလေဟှို ငါသိဟှယ်။ နန်ဟှာ ရရာတိုင်း ဆိုးဟှူ လူလေဟှို လတ်ခံဘဲဟှူကြောန်းန ကိုယ့်ကိုယ်ကိုယ် တမန်တော် ဆိုဘီး ခေါ်ဂေ့ဘေမဲ့ တမန်တော်မှုဘဲဟှူ လူလေဟှို စမ်းသပ်စစ်ဆေးဘီး သူးနို့လေဟှာ လီညာဟှူသူလေ ဖြစ်ဂေ့ဟှယ် ဆိုဇာဟှို နန်ဟှာ တွိရဟှူ ကြောန်းဟှိုလည်း ငါသိဟှယ်။
3 နန်ဟှာ သီးခံဘီး ငါ့ရဲ့ နာမတွပ် ပန်ဗန်းဘေမဲ့ အားလျော့ဟှ။
4 အယ်ဘေမဲ့ နန့်ဟှို ငါ့ဟှာ ပြစ်ပြောဇာရှိဟှယ်။ ဖြားဖြစ်ကြောန့်နူးဆိုဟှာ နန်ဟှာ စစဒူးဟှဖြစ်ဟှူ ရှစ်ရှင်းမြစ်တာဟှို စွန့်ဟှားဘီ။
5 အယ်ကြောန့် နန်ဟှာ ဖယ်မျှလော့‑က် က္လဆင်းလာဟှယ် ဆိုဇာဟှို ဒိရဂေ့ဘီး၊ နောန်ဒရဂေ့ဘီး စစဒူးဟှ ကျင့်ဟှူတိုင်းဘဲ့ ပ္လန်ကျင့်ပါ။ အယ်မျိုးမှုဘဲနေဟှာ နန်ရှိဟှူနေရာဟှို ငါလာမယ်။ နန်ဟှာ နောန်ဒရဘဲနေမယ် ဆိုဟှာ နန်ရဲ့ မီးခွပ်ဟှို နေရာဟှနေ ငါဟှာ ဖယ်ပစ်မယ်။
6 အယ်ဘေမဲ့ နိကောလ တဗဲ့လေရဲ့ ကျင့်ကြံရှင်းလေဟှို ငါဟှာမူးမျိုး နန်လည်း မူးဟှူကြောန့် နန့်ဟှို ချီးမွမ်းဇာရှိဟှယ်။
7 “ဝိညာဉ်တော်ဟှ သင်းတော်ဟှို မိန့်တော်မူဟှူ ဇာလေဟှို နားရှိဟှူသူလေ ကြားပါစေ!
“အောန်မြင်ဟှူသူဟှို ဘုရားသခင်ရဲ့ ပရဒိသုဘောင်မာ သတ်ပန်ရဲ့သီးဟှို စားရဟှူခွမ့်ဟှို ငါပေးမယ်။
စမုရနသင်းတော်တွပ် ဒန်းစကား
8 “စမုနရဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။
“ဦးဆောင်းန နော့‑က်ဆောင်းဖြစ်ဟှူသူ၊ သေဘီးမှ သတ်ပ္လန်ရှင်လာဟှူသူဟှ အယ်မျိုးမိန့်တော်မူဟှယ်။
9 နန့်ရဲ့ ဒေါက်ခဝေဒနာန ဆင်းရဲရှင်းလေဟှို ငါသိဟှယ်။ မှန်ဆိုဟှာ နန်ဟှာ ကြွယ်ဝဟှယ်။ ကိုယ့်ကိုယ်ကိုယ် ယုဒလူမျိုးဖြစ်ဟှယ် ဆိုဘီး ပြောဂေ့ဟှူ၊ ယုဒလူမျိုးမှုဘဲဟှူ၊ စာတန်ရဲ့ သင်းဝမ်လေဖြစ်ဂေ့ဟှူ သူလေနားဟှနေ ကဲ့ရဲ့ဘီး ပြောခံရရှင်းလေဟှိုလည်း ငါသိဟှယ်။
10 နန်ခံစားရဟှို့ ဒေါက်ခဝေဒနာလေဟှို ကြော့‑က်န။ နန်ဟှာ စောင်ဇမ်းနှော့‑က်ယှစ်ရှင်းဟှို ခံရဟှို့ကြောန်း မာရ်နတ်ဟှာ နန်းနို့ထဲမာ တချို့လေဟှို ထောန်ထဲမာ ထဲ့ဟှားဟှယ်။ နန်နို့ဟှာ ဆယ်ရစ်လောင်းလောင်း ဆင်းရဲဒေါက်ခဟှို ခံရဂေ့လေ့မယ်။ သေဒဲ့ထိ သစ်စာစောန့်ပါ။ အယ်မျိုးဆိုဟှာ သတ်သရဖူဟှို နန့်ဟှို ငါပေးမယ်။
11 “ဝိညာဉ်တော်ဟှ သင်းတော်ဟှို မိန့်တော်မူဇာလေဟှို နားရှိဟှူသူလေ ကြားပါစေ!
“အောန်မြင်ဟှူသူဟှို ဒုတိယသေရှင်းဟှာ ညှဉ်းဆဲဟှို့ရဟှ။
ပေရဂံသင်းတော်တွပ် ဒန်းစကား
12 “ပေရဂံဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။
“သွားနေဖတ်ပါဟှူ၊ ရရာတိုင်းထတ်ဟှူ၊ သန်လျက်ရှိဟှူသူဟှ အယ်မျိုး မိန့်တော်မူဟှယ်။
13 နန်ဟှာ ဖယ်နေရာမာ ထိုင်နေဟှယ် ဆိုဇာဟှို ငါသိဟှယ်။ အယ်နေရာမှာ စာတန်ရဲ့ ပလ္လင်ရှိဟှယ်။ ငါ့ဟှို သစ်စာရှိဟှူ ငါ့ရဲ့သတ်သေ အန္တိပဟှာ စာတန်ရဲ့နေရာဖြစ်ဟှူ နန်နို့နားမာ သတ်ခံရဟှူ ခီမာ နန်ဟှာ ငါ့ရဲ့နာမဟှို စွဲကိုင်ဘီး ငါ့မှာဟှားဟှူ ယောင်ကြည်ရှင်းဟှို စွန့်ပစ်ဟှ။
14 အယ်ဘေမဲ့ နန်းနို့ဟှို ငါဟှာ ပြစ်ပြောဇာ နဲနဲရှိဟှယ်။ ဖြားဖြစ်ကြောန်းနူးဆိုဟှာ နန်းနို့မာ ဗာလရဲ့ ယူဝါဒဟှို ခံယူဘီးဟှာ ကျင့်နေဂေ့ဟှူ သူလေရှိနေဟှယ်။ ဣသရေလလူမျိုးလေဟှာ ရောက်ထုဟှို ပူဇော်ဟှားဟှူဇာလေဟှို စားဂေ့ဟှို့တွပ်ရော၊ တရားဘဲဟှူ မေထုန်ဟှို လောက်ဂေ့ဟှို့တွပ်ရော သူးနို့ရှေ့မာ မှားယွင်းဂေ့ဟှူ ဇာလေဟှို ခ္လဟှားဟှို့ကြောန်း ဗာလမ်ဟှာ ဗာလက်မန်းဟှို သန်ပေးဟှယ်။
15 အယ်မျိုးဘဲ့ နန်းနို့မာ နိကောလ တဗဲ့လေရဲ့ ယူဝါဒဟှို ခံယူဘီး ကျင့်နေဂေ့ဟှူ သူလေလည်း ရှိနေဟှယ်။
16 အယ်ကြောန့် နောန်ဒရပါ။ အယ်မျိုးမှုဘဲနေဟှာ ငါဟှာ နန်းနို့နားဟှို ဗြန်းဗြန်ဟှားလာဘီး ငါ့ဇပ်ပေါ့‑က်ထဲဟှ သန်လျက်န နန်းနို့ဟှို တိုက်ခိုက်မယ်။
17 “ဝိညာဉ်တော်ဟှ သင်းတော်ဟှို မိန့်တော်မူဇာလေဟှို နားရှိဟှူသူလေ ကြားပါစေ!
“အောန်မြင်ဟှူသူဟှာ ဖွပ်ဟှားဟှူ မန္နဟှို ငါပေးမယ်။ က္လော့‑က်ဖ္လူဟှိုလည်း ငါပေးမယ်။ အယ်က္လော့‑က်ဟှို ရဟှူသူဟှလွဲဘီး ဖယ်သူလည်း အယ်နာမယ်သစ်ဟှို သိဂေ့ဟှ။
သွာတိရသင်းတော်တွပ် ဒန်းစကား
18 “သွာတိရဗြို့မာရှိဟှူ သင်းတော်ရဲ့ စေတမန်ဟှို အယ်မျိုးရေးလိုက်ဟှယ်။
“မီးလျှံမျိုး မျစ်စိန ရရာတိုင်း တော့‑က်ဟှူ၊ ကြေးဝါနတူဟှူ၊ ခေရှိဟှူ ဘုရားသခင်ရဲ့ သားတော်ဟှ အယ်မျိုးမိန့်တော်မူဟှယ်။
19 နန့်ရဲ့ လောက်ဆောန်ရှင်းလေန နန့်ရဲ့ရှစ်ရှင်း၊ ယောင်ကြည်ရှင်း၊ မှုတော်ဆောန်ရှင်း၊ သီးခံရှင်းလေဟှို ငါသိဟှယ်။ နန်ဟှာ နော့‑က်ဆောင်းလောက်ဆောန်ရှင်းလေဟှာ ရင်ဟှလောက်ဆောန်ရှင်းထတ် သာနေဟှူကြောန်းဟှိုလည်း ငါသိဟှယ်။
20 အယ်ဘေမဲ့ နန့်ဟှို ငါဟှာ ပြစ်ပြောဇာရှိဟှယ်။ ဖြားဖြစ်ကြောန်းဆိုဟှာ နန်ဟှာ ကိုယ့်ကိုယ်ကိုယ် ပရောဖက်မ ဆိုဘီး ခေါ်ဟှူမီးမ ယေဇဗေလဟှို လောက်ရှင်ဟှူမျိုး လောက်ဟှို့ ခွမ့်ပေးဟှားဟှယ်။ အယ်ကြောန့် သူဟှာ ငါ့ရဲ့ စေခံလေဟှို တရားဘဲဟှူ မေထုန်ပြုဟှို့တွပ် ရောက်ထုဟှို ပူဇော်ဟှားဟှူဇာလေဟှို စားဂေ့ဟှို့တွပ် သွန်သန်ဘီးဟှာ သူးနို့လေဟှို လှည့်ဇားနေဟှယ်။
21 ငါဟှာ သူ့ဟှို နောန်ဒရဟှို့တွပ် ခီပေးဘေမဲ့ သူဟှာ တရားဘဲဟှူ မေထုန်ဟှို နောန်ဒရရှင်ဟှူစိ မှေ့ဟှ။
22 အယ်ကြောန့် ငါဟှာ သူ့ဟှို အိယာထတ်မာ လဲစေဟှယ်။ သူ့န အီထောန်ရေးဖော့‑က်ပ္လန်ဘီး ပြစ်မှားဟှူ လူလေဟှိုလည်း သူးနို့လောက်ဟှူ မှုလေတွပ် နောန်ဒရဘဲနေဟှာ ရရာတိုင်း ကီးဟှူ ဆင်းရဲဒေါက်ခဟှို ရော့‑က်စေမယ်။
23 သူ့ရဲ့ သားမီးလေဟှိုလည်း သေဘေးန ငါစီရင်မယ်။ အယ်ခီမာ ငါဟှာ စိနှလောင်းဟှို သိဟှူသူဖြစ်ဟှယ် ဆိုဇာ သင်းတော်ဂူလောင်းဟှာ သိရဂေ့လေ့မယ်။ နန်းနို့ ဂူလောင်းဟှိုလည်း ကိုယ်လောက်ဟှားဟှူတိုင်းဘဲ့ ကျိုးပြစ်ဟှို ငါဟှာပေးမယ်။
24 “အယ်ဘေမဲ့ အယ်မီးမရဲ့ ယူဝါဒန စာတန်ရဲ့ နတ်နဲရှင်းဖြစ်ဟှူ၊ သူးနို့ ခေါ်ဂေ့ဟှူဇာလေ သိဘဲန သွာတိရဗြို့မာ ကျန်နေဟှူလူလေဟှို ငါပြောရှင်ဟှူဇာဟှ နန်းနို့ထတ်မာ တခြားဝန်ထောက်လေဟှို ငါတန်ဟှ။
25 နန်နို့လေမာ ရှိဟှူဇာလေဟှိုဘဲ့ ငါကြွလာဟှူခီထိ စွဲကိုင်ဟှားဂေ့။
26 အောန်မြင်ဟှူ သူလေန ငါ့ရဲ့မှုဟှို ဆောင်းထိစောန့်ထီးဟှူ သူလေဟှာ လူမျိုးဂူလောင်းဟှို အောက်စိုးရဟှူ ခွမ့်ဟှို ငါပေးမယ်။
27 အယ်လူလေဟှာ ငါကိုယ်တိုင် ငါ့ရဲ့ ဖနားဟှရဟှူ အောက်စိုးခွမ့်နတူဟှူ မ္လေအိုးလေဟှို ရိုက်ခွဲမျိုးဘဲ့ သံလှံတံန သူးနို့ဟှို အောက်စိုးရလေ့မယ်။
28 ငါဟှာ မိုးသော့‑က်ကြယ်ဟှိုလည်း အယ်လူလေဟှို ပေးမယ်။
29 “ဝိညာဉ်တော်ဟှ သင်းတော်ဟှို မိန့်တော်မူဇာလေဟှို နားရှိဟှူသူလေ ကြားပါစေ။