14
ညီကို မောန်နှမလေဟှို ပြစ်တန်ဝေဖန်မှု မလောက်ဟှို့ကြောန်း
1 ယောင်ကြည်ရှင်းအားနဲသူလေဟှို လတ်ခံဂေ့ပါ။ အယ်ဘေမဲ့ သူခံယူဇာန ပတ်သတ်ဘီး ဂြင်းခူလောက်ဂေ့န။
2 တချို့သူလေဟှာ စားဇာဘောန်းဇောင်ဟှို စားအပ်ဟှယ် ဆိုဘီး ယောင်ကြည်ဂေ့ဟှယ်။ အားနဲဟှူသူဟှာ ဟန်းသီးဟန်းဝပ်လေဟှိုဘဲ့ စားတတ်ဟှယ်။
3 စားဇာဘောန်းဇောင်ဟှို စားဟှူသူဟှ စားဘဲနေသူဟှို ထီမဲ့မြင်လောက်န။ စားဘဲနနေဟှူသူဟှလည်း စားဟှူသူဟှို စစ်ကြောစီရင်န။ ဖြားဖြစ်ကြောန့်နူးဆိုဟှာ ဘုရားသခင်ဟှာ သူ့ဟှို လတ်ခံတော်မူဘီ။
4 နန်ဟှ ဖယ်မျိုးဟှူသူဖြင့်ကြောန့် သူများပိုင်ဟှူ စေခံဟှို စစ်ကြောစီရင်ဟှယ်နူး။ သူဟှာ သူ့သခင် စီရင်ဇာအားဖြင့် ပြစ်လွတ်ရှင်းန ပြစ်စီရင်ရှင်းဟှို ရော့‑က်လေ့မယ်။ သူဟှာ ပြစ်လွတ်လေ့မယ်။ ဖြားဖြစ်ကြောန့်နူးဆိုဟှာ ဘုရားသခင်ဟှ သူ့ရဲ့ပြစ်ဟှို လွတ်ပေးဟှို့တွပ် တတ်နိုင်တော်မူဟှယ်။
5 တချို့လူလေဟှာ နေ့ရစ်တရစ်ထတ် တရစ်ဟှာ ပိုဘီး ရေးကီးဟှယ် ဆိုဘီး စီရင်ဂေ့ဟှယ်။ တချို့လူလေဟှလည်း နေ့ရစ်တိုင်းဟှာ တူးဒူဘဲ့ဖြစ်ဟှယ် ဆိုဘီး ယူဆဂေ့ဟှယ်။ လူတိုင်း ကိုယ့်ရဲ့ယောင်ကြည်ချစ်တိုင်း ခိုင်မြဲပါစေ။
6 နေ့ရစ်ဟှို စောန့်ထီးဟှူသူဟှာ ဘုရားသခင်တွပ် စောန့်ဟှယ်။ စားဟှူသူဟှလည်း ဘုရားသခင်ဟှို ထော့‑က်ဘီး စားဟှယ်။ စားဘဲနေဟှူ သူဟှလည်း ဘုရားသခင်ဟှိုထော့‑က်ဟှူကြောန့် စားဘဲနနေဘီး ကျေးဇူးတော်ဟှို ချီးမွမ်းဝန်ခံလေဟှယ်။
7 နို့လေထဲမာ ဖယ်သူဟှလည်းဘဲ့ ကိုယ့်တွပ် သတ်ရှင်ဟှ။ ဖယ်သူဟှလည်း ကိုယ့်တွပ် သေဟှ။
8 နို့လေ သတ်ရှင်ဟှာ သခင်ဘုရားတွပ်ဖြစ်ဘီး သေဟှာလည်း သခင်ဘုရားတွပ် ဖြစ်ဟှယ်။ အယ်ကြောန့် နို့လေသတ်ရှင်နေဟှူဘဲ့ဖြစ်ဖြစ်၊ သေဟှူဘဲ့ဖြစ်ဖြစ် သခင်ဘုရား ပိုင်ဆိုင်လေဟှယ်။
9 ဖြားဖြစ်ကြောန့်နူးဆိုဟှာ ခရစ်တော်ဟှာ သေဟှူသူလေ သတ်ရှင်ဟှူသူလေရဲ့ စိုးရဟှူ သခင်ဖြစ်ဟှို့တွပ် သေခံဘီး ရှင်ပ္လန်ထမြော့‑က်တော်မူလေဟှယ်။
10 အယ်ကြောန့် နန်းနို့လေဟှာ ဖြားဖြစ်ဟှိ ကိုယ့်ညီကို မောန်နှမလေဟှို လိုက်စစ်ကြောစီရင်နေနူး။ ဖြားဖြစ်ကြောန့် ထီမဲ့မြင်ပြုရနူး။ နို့လေဂူလောင်းဟှာ ဘုရားသခင်ရဲ့ တရားပလ္လင်ရှေ့ဟှို ရော့‑က်ရဂေ့မယ်။
11 ကျမ်းစာလာဟှူဇာဟှ၊
“ငါသတ်ရှင်ဟှူတိုင်း၊
ငါ့ရှေ့မာ လူတိုင်း ဒူးထော့‑က်ရမယ်,
ငါဟှာ ဘုရားသခင်ဖြစ်ကြောန်းဟှို လူတိုင်း နှောက်နဝန်ခံရမယ်” ဆိုဘီး ဘုရားသခင် မိန့်တော်မူလေဟှယ်။
12 အယ်ကြောန့် နို့လေဂူလောင်းဟှာ ဘုရားသခင်ရဲ့ စစ်ကြောတော်မူရှင်းဟှို ခံရဂေ့မယ်။
သူတပါးဟှို မှားယွင်းအောင်လောက်န
13 အယ်ကြောန့် နို့လေဟှာ နော့‑က်ထပ် ရှင်းရှင်းဟှို စစ်ကြောစီရင်ဘဲန နေဂေ့ဇို့။ ညီကို မောန်နှမဟှို ထိမိလဲတတ်ဟှူ မှုရာလေဟှို ကြံစည်ဂေ့န။
14 ဖယ်စားဇာလည်း နဂိုတိုင်း ညစ်ညူးဟှ ဆိုဇာဟှို သခင်ယေရှုအားဖြင့် ငါမှန်းမှန်သိဟှယ်။ အယ်ဘေမဲ့လည်း ညစ်ညူးဟှယ် ဆိုဘီး နန်းနို့ယောင်ကြည်ဟှာ ယောင်ကြည်ဟှူသူတွပ် အယ်စားဇာဟှာ ညစ်ညူးဟှယ်။
15 တကယ်ဟှိ နန်ဟှာ ကိုယ်စားဟှူစားဇာအားဖြင့် ညီကို မောန်နှမဟှို ထိမိဘီး လဲစေဟှယ် ဆိုဟှာ နန်ဟှာ မြစ်တာတရားဟှို ကျင့်ဘဲနေဇာ ဖြစ်ဟှယ်။ ခရစ်တော်ရဲ့ သေခံတော်မူဟှူ ကျေးဇူးတော်ဟှို ခံရဟှူသူဟှို နန့်ရဲ့စားဇာအားဖြင့် ကျိုးနဲစေန!
16 နန်းနို့ ကောန်းဟှယ် ဆိုဘီး ယောင်ကြည်ခံယူဇာဟှို သူများကဲ့ရဲ့စေန။
17 ဘုရားသခင်ရဲ့ နိုင်ငံတော်ဟှာ စားသော့‑က်န တည်ဟှူဇာ မှုဟှ သန့်ရှင်းဟှူဝိညာဉ်တော်အားဖြင့် ခံရဟှူ ဖြောန့်မတ်ရှင်း၊ ငြီသတ်ရှင်း၊ ဝန်းသာရှင်းလေနဘဲ့ တည်ဟှယ်။
18 အယ်မျိုးကျင့်ဘီး ခရစ်တော်ရဲ့မှုတော်ဟှို ဆောန်ရွပ်ဟှူသူလေဟှာ ဘုရားသခင်ရှေ့တော်မာ နှစ်သက်ဖွယ်ဖြစ်ဘီး လူလေလည်း ချီးမွမ်းဂေ့ဟှယ်။
19 အယ်ကြောန့် ငြီးငြီးချမ်းချမ်းနေထိုင်ဇာန ပတ်သတ်ဟှူကြောန်းရာလေဟှို ပြုစုပေးဘီးဟှာ ရှင်းရှင်း တယော့‑က်ဟှိုတယော့‑က် နို့လေ မြဲဒမ်း တည်ဆော့‑က်ပေးဟှို ပေးရမယ်။
20 ဘုရားသခင်ရဲ့မှုတော်ဟှို နန့်ရဲ့စားဇာအားဖြင့် ဖျစ်ဆီးန။ စားဇာဘောန်းဇောင်ဟှာ စင်ကြယ်ဟှယ်။ အယ်ဘေမဲ့ သူများထိမိဘီး လဲတတ်ဟှူစားဇာဟှို စားဟှူသူဟှာ ပြစ်ဖြစ်ဟှယ်။
21 မဲသားဟှို စားဟှူဇာန စဗျစ်ဝိုင်ဟှို သော့‑က်ဟှူဇာအားဖြင့် ညီကို မောန်နှမဟှို ထိမိဘီးလဲဇာ ဖြစ်ဘဲနေအောန် ရှောန်သင့်ဟှယ်။
22 နန်ယောင်ကြည်ရှင်းရှိမယ် ဆိုဟှာ ကိုယ့်ဖာသာ ဘုရားသခင်ရှေ့မာ ရှိပါစေ။ ကိုယ်လတ်ခံဟှူဇာအားဖြင့် ကိုယ့်ကိုယ်ကိုယ် စစ်ကြောစီရင်ဘဲသူဟှာ မင်္ဂလာရှိဟှယ်!
23 အယ်ဘေမဲ့ သံသယစိန တခုခုဟှိုစားဟှူသူဟှာ ဘုရားသခင်ရဲ့ စီရင်ရှင်းဟှို ခံရလေ့မယ်။ ဖြားဖြစ်ကြောန့်နူးဆိုဟှာ ယောင်ကြည်ရှင်းမှေ့ဘဲကြောန့် ဖြစ်ဟှယ်။ ယောင်ကြည်ရှင်းမှေ့ဘဲန ကျင့်ဟှူဇာမှန်ဟှူမျှလည်း ပြစ်ဖြစ်ဟှယ်။