3
ဘုရားသခင်ရဲ့ သားမီးလေကြောန်း
1 နို့လေဟှာ ဘုရားသခင်ရဲ့ သားမီးလေ ဆိုဘီး ခေါ်ခံရဟှူခွမ့်ဟှို ရဂေ့ဟှူကြောန့် နို့လေဟှို ဖဘုရားဟှာ ဖယ်မျှလော့‑က် ရှစ်နူးဆိုဟှာ ဆင်ခြင်ဂေ့ပါ။ နို့လေဟှာ တကယ်ဘဲ့ ဘုရားသခင်ရဲ့ သားမီးလေ ဖြစ်ဂေ့ဟှယ်။ အယ်ကြောန့် အယ်လောကသားလေဟှ နို့လေဟှို သိဟှ။ ဖဟှိုလည်း သိဟှ။
2 ရှစ်ရဟှူသူလေ၊ ခုဟှ နို့လေဟှာ ဘုရားသခင်ရဲ့ သားမီးလေ ဖြစ်ဂေ့ဟှယ်။ နော့‑က်မှ ဖယ်မျိုးဖြစ်မယ် ဆိုဇာ သေးသေချားချာဟှာ သိဟှဘေမဲ့ ခရစ်တော်ကြွလာဟှူ ခီမာ ကိုယ်တော်ဖြစ်နေတိုင်း ဖူးဗြင်ရမယ် ဖြစ်ဟှူကြောန့် နို့လေဟှာ ကိုယ်တော်န တူဂေ့မယ် ဆိုဇာ သိရဂေ့ဟှယ်။
3 ခရစ်တော်ဟှို မှီပြုဘီး အယ်မျိုးမျှော်လင့်ဘီး တောန်းတလူဟှာ ခရစ်တော်စင်ကြယ်မျိုးဘဲ ကိုယ့်ကိုယ်ကိုယ် စင်ကြယ်အောန် နေတတ်ဟှယ်။
4 ပြစ်ဒုစရိုက်ဟှို လောက်ရှင်းဟှာ ပညတ်တော်ဟှို ခ္လိုးဖော့‑က်ရှင်း ဖြစ်ဟှူကြောန့် ပြစ်လွန်ကျူလူ မှန်မျှဟှာ ပညတ်တရားဟှို ခ္လိုးဖော့‑က်ဟှူလူ ဖြစ်ဟှယ်။
5 ကိုယ်တော်ဟှာ ပြစ်ဟှိုယူဆောန်ဟှားဟှို့တွပ် ပေါ်လာဟှူကြောန်းဟှို နန်းနို့သိဂေ့ဟှယ်။ ကိုယ်တော်နှိုက် ပြစ် မှေ့ဟှ။
6 ကိုယ်တော်န တလောင်းတဝဒဲ တည်နေဟှူ လူတိုင်းဟှာ ပြစ်လောက်တတ်ဟှ။ ပြစ်လောက်နေဟှူ လူတိုင်းဟှာ ကိုယ်တော့်ဟှို သိဗြင်သေးဟှ။
7 သားမီးလေ၊ ဖယ်သူလည်း နန်းနို့ဟှို လှည့်ဇားစေန။ ခရစ်တော်ဟှာ ဖြောန့်မတ်ဟှူမျိုးဘဲ့ ဖြောန့်မတ်ရှင်းတရားဟှို ကျင့်သောင်းဟှူ လူဟှာ ဖြောန့်မတ်ဟှူလူ ဖြစ်ဟှယ်။
8 ပြစ်လောက်ဟှူလူဟှာ မာရ်နတ်န ဆိုင်ဟှူလူ ဖြစ်ဟှယ်။ ဖြားဖြစ်ကြောန့်နူးဆိုဟှာ မာရ်နတ်ဟှာ စစဒူးဟှ ပြစ်လွန်ကျူဟှူသူ ဖြစ်ဟှယ်။ ဘုရားသခင်ရဲ့ သားတော်ပေါ်လာရှင်းဟှ မာရ်နတ်လောက်ဟှားဟှူ မှုလေဟှို ဖျစ်ပစ်ဟှို့တွပ် ဖြစ်ဟှယ်။
9 ဘုရားသခင်ဟှနေ မွီးလာဟှူ သားမီးလေဖြစ်ဟှူကြောန့် ပြစ်လောက်တတ်ဟှ။ ဖြားဖြစ်ကြောန့်နူးဆိုဟှာ သူ့မာ ဘုရားသခင်ရဲ့ ဇာတိသဘောလေ ပါနေဟှူကြောန့် ဖြစ်ဟှယ်။ သူဟှာ ဘုရားသခင်ဟှနေ ပေါ့‑က်လာဟှူ သားမီးလေဖြစ်ဟှူကြောန့် ပြစ်ဟှိုလောက်နိုင်ဟှ။
10 အယ်မျိုးလတ်ခဏာဟှို ကေ့မယ် ဆိုဟှာ ဘုရားသခင်ရဲ့ သားမီးလေန မာရ်နတ်ရဲ့ သားမီးဟှာ ကွာခြားရှင်းဟှို သိရဟှယ်။ ဖြောန့်မတ်ရှင်းတရားဟှို ကျင့်ဘဲ့ဟှူလူ၊ ကိုယ့်ရဲ့ ညီကို မောန်နှမလေဟှို ရှစ်ဘဲ့ဟှူလူဟှာ ဘုရားသခင်ရဲ့ သားမီး မှုဟှ။
ရှင်းရှင်းရှစ်ဂေ့ပါ
11 နို့လေဟှာ ရှင်းရှင်းရှစ်ရမယ် ဆိုဟှားဟှူ တရားတော်ဟှို စစဒူးဟှ နန်းနို့ဟှာ ကြားရဟှူ ဒန်းစကားဖြစ်ဟှယ်။
12 မာရ်နတ်နဆိုင်ဟှူ သူ့ညီ အားဗေလဟှို သတ်ဟှူ ကာဣနမျိုး ဖြစ်ဂေ့န။ ကာဣနဟှာ သူ့ညီဟှို ဖြားဖြစ်ကြောန့်သတ်နူး။ သူ့ကျင့်ဟှ ကောန်းဘဲဟှူကြောန့် သူ့ညီကျင့်ဟှ ဖြောန့်မတ်ဟှူကြောန့် ဖြစ်ဟှယ်။
13 အယ်ကြောန့် ညီကို မောန်နှမလေ၊ လောကသားလေဟှ နန်းနို့ဟှို မူးဂေ့ဟှူ ခီမာ အံ့ဩဂေ့န။
14 နို့လေဟှာ ကိုယ့်ရဲ့ ညီကို မောန်နှမလေဟှို ရှစ်ဂေ့ဟှူကြောန့် သေရှင်းဟှနေ သတ်ရှင်ဟှူနေရာဟှို ကူးရဂေ့ကြောန်းဟှို နို့လေဟှ သိဂေ့ဟှယ်။ ကိုယ့်ရဲ့ ညီကို မောန်နှမလေဟှို ရှစ်ဘဲ့ဟှူလူဟှာ သေနေဟှူ ဘဝမာဘဲ့ ရှိနေသေးဟှယ်။
15 ကိုယ့်ရဲ့ ညီကို မောန်နှမဟှို မူးနေဟှူလူဟှာ လူသတ်မားဖြစ်ဟှယ်။ လူသတ်မားဟှာ ထာဝရသတ်ဟှို ရဘဲ့ကြောန်းဟှို သိဂေ့ဟှယ်။
16 ခရစ်တော်ဟှာ နို့လေတွပ် သတ်စွန့်ဟှူ မြစ်တာကြောန်းဟှို နို့လေဟှာ သိဂေ့ဟှယ်။ နို့လေဟှလည်း ကိုယ့်ရဲ့ ညီကို မောန်နှမလေတွပ် သတ်ဟှို စွန့်ရဂေ့ဟှယ်။
17 လောကီစည်းဇိမ် အောက်စာလေ ကြွယ်ဝဟှူလူဖြစ်ဘီး ကိုယ့်ရဲ့ ညီကို ယော့‑က်ယော့‑က်ဟှ ဆင်းရဲရှင်းဟှို ဗြင်ဟှူ ခီမာ သနားကြင်နာမှု မှေ့ဘဲနေဆိုဟှာ ဖယ်မျိုး ဘုရားသခင်ရဲ့ မြစ်တာတော်ဟှ ရှိနိုင်ဟှို့နူး။
18 သားမီးလေ၊ နို့လေရဲ့ မြစ်တာဟှာ နှောက်ဖြားမာဘဲ့ရှိဟှူ ရှစ်ရှင်းမြစ်တာမျိုး ဖြစ်သင့်ဟှ။ လတ်တွိ ဖော်ပြရဟှူ မြစ်တာစစ်မြစ်တာမှန် ဖြစ်ရမယ်။
ဘုရားသခင်ရှေ့မာ ရဲရင့်ဟှူခွမ့်
19 အယ်မျိုးနည်းအားဖြင့် နို့လေဟှာ သမ္မာတရားနဆိုင်ဟှူ လူဖြစ်ဟှူကြောန်းဟှို သိနိုင်ဟှယ်။ ဘုရားသခင်ရဲ့ ရှေ့မာလည်း ကိုယ့်ရဲ့ စိနှလောင်းဟှ သတ်သာဂေ့လေ့မယ်။
20 နန့်စိနှလောင်းဟှ နန့်ဟှို ပြစ်တန်ခံရဟှူ ခီမာ ဘုရားသခင်ဟှာ နို့လေရဲ့ စိနှလောင်းထတ် ကီးမြတ်ကြောန်း၊ ကိုယ်တော်ဟှာ မှုရှိမျှဂူလောင်းဟှို သိကြောန်းဟှို နို့လေဟှ သိဂေ့ဟှယ်။
21 အယ်ကြောန့် ရှစ်ရဟှူသူလေ၊ နို့လေရဲ့ စိနှလောင်းဟှ နို့လေဟှို ပြစ်တန်ဘဲန နေမယ် ဆိုဟှာ နို့လေဟှာ ဘုရားသခင်ရှေ့မာ ရဲရင့်ဟှူခွမ့်ဟှို ရဂေ့ဟှယ်။
22 နို့လေဟှာ ကိုယ်တော်ရဲ့ ပညတ်တော်ဟှို စောန့်ဟှူလူလေ၊ ကိုယ်တော် နှစ်သက်ဟှူမှုလေဟှို လောက်ဟှူလူလေ ဖြစ်ဟှူကြောန့် နို့လေ တောန်းရှော့‑က်ရှင်း မှန်မျှဟှာ ဘုရားသခင်နားဟှ ရဂေ့ဟှယ်။
23 ကိုယ်တော်ရဲ့ ပညတ်တော်ဟှ နို့လေဟှာ ဘုရားသခင်ရဲ့ သားတော် ယေရှုခရစ်ရဲ့ နာမတော်ဟှို ယောင်ကြည်ရမယ်။ အယ်သခင် ပြောဟှားဟှူတိုင်းဘဲ့ ရှင်းရှင်း တယော့‑က်ဟှိုယော့‑က် ရှစ်ရမယ် ဆိုဘီး ပြောဟှားဟှယ်။
24 ဘုရားသခင်ရဲ့ ပညတ်တော်လေဟှို စောန့်ဟှူလူဟှာ ဘုရားသခင်န တလောင်းတဝဒဲဖြစ်ဘီး ဘုရားသခင်ဟှလည်း အယ်လူန တလောင်းတဝဒဲ ဖြစ်ဟှယ်။ အယ်မျိုး ဖြစ်ဟှူကြောန်းဟှို ကိုယ်တော်ပေးဟှားဟှူ ဝိညာဉ်တော်ကြောန့် နို့လေ သိဂေ့ဟှယ်။