၁ ကောရိန္သု
ကောရိန္သု သင်းတော်ဟှို ပေါလုရဲ့ ပထမပေးစာ
နိဒါန်း
ကောရိန္သု သင်းတော်ဟှို ပေါလုရဲ့ ပထမပေးစာ ဟှာ ခရစ်တော် မွီးဘီးန ၅၅ ခုနှစ်လော့‑က်ဟှ တမန်တော် ပေါလုဟှ ရေးဟှားလေဟှယ် (၁.၁)။ အယ်စာဟှာ ကောရိန့်ဗြို့မာရှိဟှူ သင်းတော်ဟှို ပေါလုရေးဟှူ ပေးစာနှေ့စောန်ထဲဟှ ပထမစောန် ဖြစ်ဟှယ်။ သူဟှာ မာကေဒေါနိပြည်ဟှို ဖြတ်ဘီး ကောရိန့်ဗြို့ဟှို ရော့‑က်လာခန် ဧဖက်ဗြို့မာ နေနေဒူး အယ်စာဟှို ရေးဟှားဇာ ဖြစ်နိုင်ဟှယ် (၁၆.၅–၉)။
အယ်စာဟှာ သင်းတော်ထဲမာ ကွဲပြားမှုလေ၊ တရားဘဲဟှူ မေထုန်မှုလေန ကောန်းဘဲဟှူ ကျင့်လေဘောန်းဇောင်ကြောန်းဟှို ရေးဟှားဟှူစာဟှို သင်းဝမ်သူ တချို့နားဟှနေ ပေါလုဟှ လတ်ခံရရှိဟှူကြောန့် ပ္လန်ဘီးဖြေရှင်းဟှားဇာ ဖြစ်လေဟှယ်။ ကောရိန့်ဗြို့ဟှာ တရားဘဲဟှူ မေထုန်န ပတ်သက်ဘီး နာမယ်ကီးဟှူကြောန့် အယ်သင်းတော်မာ အယ်မျိုးပြဿနာန ရင်ဆိုင်နေရဇာဟှာ အံ့ဩဇာ မှေ့ဟှ။ ကောရိန္သု သင်းတော်ဟှို ပေါလုရဲ့ ပထမပေးစာမာလည်း မြစ်တာန ပတ်သက်ဘီး ထန်ရှားဟှူ ခန်းလေ ပါဝမ်လေဟှယ် (၁၃)။
ကြောန်းရာ ကျဉ်းချောက်
၁။ ပေါလုဟှာ ကောရိန္သု သင်းတော်ဟှို နှောက်ဆစ်ဘီးန သူးနို့တွပ် ဘုရားသခင်ဟှို ချီးမွမ်းဟှားဟှူကြောန်း (၁.၁–၉)
၂။ သူဟှာ ကောရိန္သု သင်းတော်ထဲမာ ကွဲပြားမှုလေန ပတ်သက်ဟှူ စာဟှို လတ်ခံရရှိဟှူကြောန့် ပ္လန်ဘီး ဖြေရှင်းဟှားဟှူကြောန်း (၁.၁၀—၄.၂၁)
၃။ သူဟှာ တရားဘဲဟှူ မေထုန်ပြဿနာန တရားစီရင်ဟှို့တွပ် ပ္လန်ဘီး ရှင်းပြဟှားဟှူကြောန်း (၅.၁—၆.၂၀)
၄။ အယ်ဘီးမှ သူဟှာ လတ်ထတ်ရှင်းကြောန်း၊ ရောက်ထုဟှို ပူဇော်ပသရှင်းကြောန်း၊ ဝတ်ပြုကိုးကွယ်ရှင်းကြောန်း၊ ဝိညာဉ်ဆုကျေးဇူးန ထမြော့‑က်ရှင်းကြောန်းန ပတ်သက်ဘီး ညွှန်ကြားဟှားဟှူကြောန်း (၇.၁—၁၅.၅၈)
၅။ နော့‑က်ဆောင်းမာ သူဟှာ လူပေါက်ကိုန ဆိုင်ဟှူဇာလေ၊ လတ်တွိ လောက်ဆောင်ရဟှို့ဇာလေန နိဂေါင်းချောက်ဟှားဟှူကြောန်း (၁၆.၁–၂၄)
1
1 ဘုရားသခင်ရဲ့ လိုတော်တိုင်း ယေရှုခရစ်တော်ရဲ့ တမန်တော်ဖြစ်န ခန့်အပ်ဟှူ ကျေးဇူးဟှို ခံရဟှူ ငါပေါလုန ငါ့ညီသုဿင်ဟှာ —
2 ကောရိန့်ဗြို့မာရှိဟှူ ဘုရားသခင်ရဲ့ သင်းဝမ်ဟှူ သူလေန နေရာတိုင်းမာရှိဟှူ နို့လေန သူးနို့လေရဲ့ သခင် ယေရှုခရစ်တော်ရဲ့ နာမတော်ဟှို ကိုးကွယ်ဟှူသူ ယေရှုခရစ်တော်နှိုက် တလောင်းတဝဒဲ ဖြစ်ရှင်းအားဖြင့် ဘုရားသခင်ရဲ့ သန့်ရှင်းဖြောန့်မတ်ဟှူ သူဖြစ် ဝီးကော့‑က်ခံရဟှူ လူတိုင်းနားဟှို စာရေးလိုက်ပါဟှယ်။
3 နို့လေရဲ့ သခင် ယေရှုခရစ်တော်န နို့လေရဲ့ဖ ဘုရားသခင်နားဟှနေဘီး ကျေးဇူးတော်န ငြီသတ်ရှင်းဟှာ နန်းနို့ ဂူလောင်းမာ ရှိပါစေ။
ဆုကျေးဇူးတော်လေကြောန်း
4 ယေရှုခရစ်တော်အားဖြင့် နန်းနို့လေဟှို ပေးသနားတော်မူဟှူ ဘုရားသခင်ရဲ့ ကျေးဇူးတော်ကြောန့် ငါဟှာ နန်းနို့လေတွပ် နို့လေရဲ့ဘုရားသခင်ကျေးဇူးတော်ဟှို မြဲဒမ်း ချီးမွမ်းပါဟှယ်။
5 ဖြားဖြစ်ကြောန့်နူးဆိုဟှာ နန်းနို့လေဟှာ နှောက်သတ္တိ၊ ဉာဏ်သတ္တိန စစရာရာမာ ခရစ်တော်အားဖြင့် ကြွယ်ဝပ္လဲ့ဇောင်ဂေ့ဟှူကြောန့်၊
6 ယေရှုခရစ်တော်နဆိုင်ဟှူ သတ်သေခံချစ်ဟှာ နန်းနို့လေမာ တည်ပြုဟှူဇာဟှို ခံရလေဟှယ်။
7 အယ်ကြောန့် နို့လေရဲ့သခင် ယေရှုခရစ်တော် ပေါ်ထွပ်လာဟှူဇာဟှို မျှော်လင့်နေဟှူ ခီမာ ဆုကျေးဇူး တဇောင်တခုလည်း လျှော့ဘဲန စောင်လင်ဂေ့ဟှယ်။
8 နို့လေရဲ့သခင် ယေရှုခရစ်တော် ပေါ်ထွပ်လာဟှူနေ့ရစ်မာ ပြစ်တန်ခွမ့်န လွတ်ကင်းဟှို့တွပ်၊ ကိုယ်တော်ဟှာ ဆောင်းထိအောန်ဘဲ့ နန်းနို့ဟှို ခိုင်ခံ့စေလေ့မယ်။
9 သူ့ရဲ့ သားတော်ဖြစ်ဟှူ နို့လေရဲ့ သခင် ယေရှုခရစ်တော်ရဲ့ မိတ်သဟာယဖွဲ့ရှင်း ထဲဟှို နန်းနို့လေဟှို ခေါ်တော်မူဟှူ ဘုရားသခင်ဟှာ သစ်စာန ပ္လဲ့ဇောင်တော်မူလေဟှယ်။
သင်းတော်ထဲမာ စိဝန်းကွဲဟှူကြောန်း
10 ညီကို မောန်နှမလေ၊ နန်းနို့လေရှင်းရှင်း စိဝန်းကွဲရှင်းမှေ့ဘဲန စည်းစည်းလောင်းလောင်း ညီးညီညွတ်ညွတ်နေဘီး စိတူကိုယ်တူဖြစ်ဟှို့တွပ် သခင် ယေရှုခရစ်တော်ရဲ့ နာမတော်ဟှိုမှီပြုဘီးဟှာ နန်းနို့လေဟှို ငါတောန်းဗန်ပါဟှယ်။
11 ဖြားဖြစ်ကြောန့်နူးဆိုဟှာ ညီကို မောန်နှမလေ နန်းနို့လေ ရှင်းရှင်း ရန်များဂေ့ဟှယ် ဆိုဇာဟှို ကလောဣ အီသူအီသားလေ ပြောပြဟှူကြောန့် ငါကြားသိရဟှယ်။
12 နန်းနို့လေဟှာ ရှင်းရှင်း စိဝန်းကွဲဟှူ စကားလေဟှို ပြောဂေ့ဟှယ်။ တယော့‑က်ဟှ “ငါဟှာ ပေါလုရဲ့တဗဲ့၊” တယော့‑က်ဟှလည်း “ငါဟှာ အာပေါလုရဲ့ တဗဲ့၊” နော့‑က်တယော့‑က်ဟှလည်း “ငါဟှာ ကေဖရဲ့တဗဲ့၊” “ငါဟှာ ခရစ်တော်တဗဲ့” ဖြစ်ဟှယ် ဆိုဘီး နန်းနို့ရှင်းရှင်း ပြောနေဂေ့ဟှူကြောန့် ငါပြောရဟှူ ဇာဖြစ်ဟှယ်။
13 ခရစ်တော်ဟှာ ကွဲပြားဟှူကြောန့်လော။ ပေါလုဟှ နန်းနို့လေတွပ် လတ်ဝါးကပ်တိုင်မာ သေခံဟှူဇာလော။ အယ်မျိုးမှုဘဲနေဟှာ ပေါလုရဲ့ နာမန ဗတ္တိဇံခံဂေ့ဟှိကြောန့်လော။
14 ငါဟှာ ကရိပ္ပုန ဂါယုဟှလွဲဘီး နန်းနို့လေထဲဟှ ဖယ်သူဟှိုမှလည်း ဗတ္တိဇံပေးဘဲကြောန့် ဘုရားသခင်ရဲ့ကျေးဇူးတော်ဟှို ချီးမွမ်းပါဟှယ်။
15 အယ်ကြောန့် နန်းနို့လေဟှာ ငါ့နာမန ဗတ္တိဇံဟှို ခံဟှယ် ဆိုဘီး ဖယ်သူလည်း ပြောဇာကြောန်း မှေ့ဟှ။
16 (ငါဟှာ သတေဖန်ရဲ့ အီသူအီသားလေဟှို ဗတ္တိဇံပေးဟှယ်။ နော့‑က်ထပ် ဖယ်သူလေဟှို ဗတ္တိဇံပေးဟှယ် ဆိုဇာ ငါမှတ်မိဟှမ်း။)
17 ခရစ်တော်ဟှာ ဗတ္တိဇံပေးဟှို့တွပ် ငါ့ဟှို စေလွှတ်ဟှူဇာ မှုဟှ။ အယ်ဘေမဲ့လည်း ခရစ်တော်ရဲ့ လတ်ဝါးကပ်တိုင် တရားဟှို ချည်းနှီးသတ်သတ် ဖြစ်ဘဲနေအောန် လူလေရဲ့ ဉာဏ်ပညာန ယှဉ်ဟှူ စကားဟှို သုံးပြုဘဲ ဒန်းကောန်းဟှို ပြောဟှို့တွပ် ငါ့ဟှို စေလွှတ်ဇာဖြစ်ဟှယ်။
ဘုရားသခင်ရဲ့ တဂိုးတော်န ဉာဏ်ပညာ ဖြစ်တော်မူဟှူ ခရစ်တော်
18 ဖြားဖြစ်ကြောန့်နူးဆိုဟှာ လတ်ဝါးကပ်တိုင်တော်န ဆိုင်ဟှူ တရားစကားဟှာ ပျစ်စီးရှင်းဟှို ရော့‑က်ဟှူ သူလေတွပ် မိုက်မဲဟှူရာ ဖြစ်ဟှူလည်းဘဲ့ ကယ်တန်ရှင်းခံရဟှူ နို့လေတွပ်ဟှ ဘုရားသခင်ရဲ့ တဂိုးတော်ဖြစ်လေဟှယ်။
19 ဖြားဖြစ်ကြောန့်နူးဆိုဟှာ ကျမ်းစာလာဟှူဇာဟှ၊
“ပညာရှိလေရဲ့ ပညာဟှို ငါဖျစ်ဆီးမယ်။
ဉာဏ်ကောန်းဟှူသူလေရဲ့ ဉာဏ်ဟှိုလည်း ငါဖယ်ရှားမယ်” ဆိုဘီး လာလေဟှယ်။
20 အယ်မျိုးဖြစ်ဟှယ် ဆိုဟှာ၊ ပညာရှိဟှူသူဟှ ဖယ်မာရှိနူး။ ကျမ်းပြုဆရာဟှ ဖယ်မာရှိနူး။ လောကီရေးရာမာ ကျွမ်းကျင်သူလေဟှာ ဖယ်မာရှိနူး၊ ဘုရားသခင်ဟှာ လောကီပညာလေဟှို မိုက်မဲစေတော်မူဟှယ် မှုဟှလော။
21 ဖြားဖြစ်ကြောန့်နူးဆိုဟှာ ဘုရားသခင်ဟှာ သူ့ရဲ့ ဉာဏ်ပညာတော်အားဖြင့် စီရင်ဟှားဟှူကြောန့်၊ လောကသားလေဟှာ သူးနို့ရဲ့ပညာအားဖြင့် ဘုရားသခင်ဟှို သိဘဲနနေဟှူ ခီမာ ဘုရားသခင်ဟှာ ယောင်ကြည်ဟှူသူလေဟှို မိုက်မဲဟှူဒေသနာ ဟောပြောရှင်းအားဖြင့် ကယ်တန်ဟှို့တွပ် စေတနာတော်ရှိလေဟှယ်။
22 ယုဒလူမျိုးလေဟှ နိမိတ်လတ်ခဏာဟှို တောန်းခံတတ်ဂေ့ဟှယ်။ လူမျိုးခြားလေဟှ ဉာဏ်ပညာဟှို ရှာဂေ့လေဟှယ်။
23 နို့လေဟှ လတ်ဝါးကပ်တိုင်မာ သေခံတော်မူဟှူ ခရစ်တော်ရဲ့ကြောန်းဟှို ဟောပြောလေဟှယ်။ အယ်မူကြောန်းရာဟှာ ယုဒလူမျိုးလေတွပ် မှားယွင်းဟှူကြောန်းဖြစ်ဘီး၊ လူမျိုးခြားလေတွပ်ဟှ မိုက်မဲဟှူကြောန်း ဖြစ်ဟှယ်။
24 အယ်ဘေမဲ့လည်း ယုဒလူမျိုးဘဲ့ဖြစ်ဖြစ်၊ လူမျိုးခြားလေဘဲ့ဖြစ်ဖြစ် ဝီးကော့‑က်ရှင်းဟှို ခံရဟှူသူလေတွပ်ဟှ ဘုရားသခင်ရဲ့တဂိုးတော်န ဘုရားသခင်ရဲ့ ပညာတော်ဖြစ်ဟှူ ခရစ်တော်ရဲ့ တရားဖြစ်လေဟှယ်။
25 ဘုရားသခင်ရဲ့ မိုက်မဲဟှူဇာဟှာ လူလေရဲ့ ဉာဏ်ပညာထတ် ပိုဘီး ပညာရှိလေဟှယ်။ ဘုရားသခင်ရဲ့ အားနဲချစ်ဟှာ လူလေရဲ့ စွမ်းထတ် ပိုဘီး စွမ်းအားကီးဟှယ်။
26 ညီကို မောန်နှမလေ၊ နန်းနို့ဟှို ဝီးကော့‑က်ဟှူ ကြောန်းရာဟှို ပ္လန်ဘီး ဆင်ခြင်ကေ့ဂေ့ပါ။ လူ့အဗြင်အားဖြင့် ပြောရမယ် ဆိုဟှာ နန်းနို့လေဟှို ခေါ်ဟှူဇာဟှာ ပညာရှိဟှူသူလေ၊ အသရေရှိဟှူသူလေ၊ မန်းမျိုးမန်းနွယ်လေ လှော့‑က်ဘီးပါဟှ။
27 အယ်ဘေမဲ့ ဘုရားသခင်ဟှာ သူ့ရဲ့ ကြံစည် ရည်ရွယ်ချစ်အားဖြင့် ပညာရှိလေဟှို ယှစ်ရစေဟှို့တွပ် လောကမာ မိုက်မဲဟှူသူလေဟှို ဝီးကော့‑က်တော်မူဟှယ်။ စွမ်းသတ္တိရှိဟှူ လူလေဟှို ယှစ်ရစေဟှို့တွပ် လောကမာ အားနဲဟှူ သူလေဟှို ဝီးကော့‑က်တော်မူဟှယ်။
28 နော့‑က်ဘီး မြတ်ဟှူသူလေဟှို ဖယ်ရှားဟှို့တွပ် လောကမာ ဆင်းရဲဟှူသူ၊ ရေရာဘဲဟှူသူ၊ ယုတ်ညံ့ဟှူသူလေဟှို ဘုရားသခင် ဝီးကော့‑က်တော်မူဟှယ်။
29 အယ်မျိုးဖြစ်ကြောန့် ဘုရားသခင်ရဲ့ ရှေ့တော်မာ ဖယ်လူလည်း ဝါကြွားဟှို့ကြောန်း မှေ့ဟှ။
30 နန်းနို့လေဟှာ ဘုရားသခင်အားဖြင့် ယေရှုခရစ်တော်နှိုက် တည်နေဂေ့ဟှယ်။ အယ်သခင်ဟှာ နို့လေတွပ် ဘုရားသခင်နားဟှလာဟှူ ဉာဏ်ပညာ ဖြစ်တော်မူဘီး ဖြောန့်မတ်ရှင်း၊ သန့်ရှင်းရှင်းန ဝီးနှုကယ်တန်ရှင်း ဖြစ်တော်မူလေဟှယ်။
31 အယ်ကြောန့် ကျမ်းစာဟှ “ဝါကြွားဟှူသူဟှာ ဘုရားသခင်အားဖြင့်ဘဲ့ ဝါကြွားပါစေ” ဆိုဘီး ပြောဟှားဟှယ်။