15
Masãrẽ ñaꞌarã waꞌacã weese niꞌi
(Mr 7.1-23)
1 Beꞌro fariseo masã Jesú tiropʉ ejawã. Tojo nicã Moisé ojaꞌquere buꞌeri masã quẽꞌrã Jerusalẽ́pʉ aꞌtiꞌcãrã Jesú tiropʉ eja, sẽrĩtiñaꞌwã:
2 —¿Deꞌro weerã mʉꞌʉ buꞌerã marĩ ñecʉ̃sʉmʉa weemʉjãtiꞌquere yʉꞌrʉnʉꞌcãti? Baꞌase dʉporo marĩ ñecʉ̃sʉmʉa weewʉaꞌcaronojõ omocoetima, niwã.
3 Jesú narẽ yʉꞌtiwĩ:
—Yʉꞌʉ quẽꞌrã mʉsãrẽ sẽrĩtiñaꞌgʉ̃ti. Mʉsã ñecʉ̃sʉmʉa weemʉjãtiꞌquere weesiruturã, ¿deꞌro weerã Õꞌacʉ̃ dutiro peꞌere yʉꞌrʉnʉꞌcãti?
4 Õꞌacʉ̃ aꞌtiro duticʉ niwĩ: “Mʉsã pacʉ, mʉsã pacore ẽjõpeoya.” Tojo nicã “Noꞌo cʉ̃ pacʉ, cʉ̃ pacore ñaꞌarõ ucũgʉ̃nojõ wẽrĩato”, nicʉ niwĩ.
5 Mʉsã peꞌe mʉsã pacʉre o mʉsã pacore na apeyenojõ sẽrĩcã, weetamusĩꞌrĩtirã, narẽ aꞌtiro nisaꞌa: “Nipeꞌtise ʉ̃sã cʉose mʉsãrẽ oꞌoboꞌquere Õꞌacʉ̃rẽ oꞌotojapʉ”, nisaꞌa.
6 Mʉsãta aꞌtiro nirãnojõrẽ na pacʉ o na pacore weetamuta basiotisaꞌa nisere buꞌeꞌe. Aꞌtiro wéérã, Õꞌacʉ̃ dutisere tojowaro ĩꞌacõꞌabutiacãꞌa. Mʉsã ñecʉ̃sʉmʉa weemʉjãtiꞌquere weesĩꞌrĩrã, tojo weeꞌe.
7 Diacjʉ̃ wéérã weronojõ weetaꞌsaꞌa. Isaía dʉporocjʉ̃pʉ Õꞌacʉ̃ ye quetire weremʉꞌtãrĩ masʉ̃ mʉsãrẽ diacjʉ̃ta nisapĩ. Aꞌtiro ojacʉ niwĩ:
8 “Ãꞌrã masã ʉsero meꞌrã diaꞌcʉ̃ yʉꞌʉre ẽjõpeoma.
Na tʉꞌoñaꞌse waro peꞌe noꞌopʉ nirõ nisaꞌa.
9 Tojo weerã na yʉꞌʉre ñubuepeose wapamarĩꞌi.
Na buꞌese yʉꞌʉ dutise mejẽta niꞌi.
Masã dutise niꞌi”, nicʉ niwĩ Õꞌacʉ̃, ni ojacʉ niwĩ Isaía, ni yʉꞌtiwĩ Jesú fariseo masãrẽ.
10 Narẽ tojo níca beꞌro Jesú masãrẽ pijio, niwĩ:
—Yé cjasere tʉꞌomasĩrãti nírã, tʉꞌoya.
11 Marĩ ʉsero meꞌrã baꞌase mejẽta Õꞌacʉ̃ ĩꞌorõpʉ marĩrẽ ñaꞌarõ waꞌacã weeꞌe. Tojo weronojõ oꞌoro, marĩrẽ ʉseropʉ wijatise peꞌe ñaꞌarõ waꞌacã weeꞌe, niwĩ.
12 Tojo níca beꞌro ʉ̃sã cʉ̃ buꞌerã cʉ̃ pʉꞌto waꞌa, cʉ̃rẽ niwʉ̃:
—Mʉꞌʉ tojo nisere tʉꞌorã, fariseo masã tʉꞌsatiama, niwʉ̃.
13 Ʉ̃sã tojo nicã, Jesú queose meꞌrã yʉꞌtiwĩ:
—Wese cʉogʉ ñaꞌase, topʉ pĩꞌrĩbajuasere duꞌacõꞌagʉ̃sami. Yʉꞌʉ pacʉ ʉꞌmʉsepʉ nigʉ̃́ nisoose meꞌrã buꞌerãrẽ mejãrõta weegʉsami. Narẽ cõꞌabutiagʉsami.
14 Tojo weerã narẽ tojo ĩꞌacõꞌacãꞌña. Na nisoose meꞌrã buꞌérã, caperi ĩꞌatirã ãpẽrã caperi ĩꞌatirãrẽ wejemʉꞌtãrã weronojõ nima. Niꞌcʉ̃ ĩꞌatigʉ apĩ ĩꞌatigʉre wejemʉꞌtãgʉ̃, na pʉarãpʉta noꞌo nirĩ copepʉ bʉrʉsãjãsama, niwĩ.
15 Beꞌro Pedro Jesure niwĩ:
—Ʉ̃sãrẽ wereya. Mʉꞌʉ níꞌque ¿deꞌro nisĩꞌrĩrõ weesari? niwĩ.
16 Jesú cʉ̃rẽ niwĩ:
—¿Mʉsã quẽꞌrã aꞌtere tʉꞌomasĩweti yujupʉ?
17 Nipeꞌtise marĩ baꞌasõrõse paapʉ waꞌa, beꞌro yʉꞌrʉwijaa waꞌasaꞌa.
18 Masã na ucũse, ʉseropʉ wijase peꞌe wãcũsepʉ wadatiwijatiꞌi. Aꞌte pũrĩcã Õꞌacʉ̃ ĩꞌorõpʉ masãrẽ ñaꞌarã waꞌacã weeꞌe.
19 Marĩ wãcũse ñaꞌarõ wãcũsepʉ dʉꞌpocã́tiwijatiꞌi. Ãpẽrãrẽ wẽjẽcõꞌase, nʉmo nitigore aꞌmetãrãse, numio meꞌrã ñaꞌarõ weese, yajase, nisoose, ucjase aꞌte nipeꞌtise wãcũsepʉ dʉꞌpocã́tiwijatisaꞌa.
20 Aꞌte peje pũrĩcã Õꞌacʉ̃ ĩꞌorõpʉre masãrẽ ñaꞌarã waꞌacã weesaꞌa. Marĩ na weewʉasenojõrẽ baꞌase dʉporo omocoetirã pũrĩcã, masãrẽ ñaꞌarã waꞌacã weetisaꞌa, niwĩ.
Judío masõ nitigo ape diꞌtacjõpʉ Jesure ẽjõpeoꞌque niꞌi
(Mr 7.24-30)
21 Beꞌro Jesú Genesarepʉ níꞌcʉ Tiro, Sidṍ wãmetise macãrĩpʉ waꞌawĩ. Tocjãrã judío masã nitiwã.
22 Topʉ eja, niꞌcõ numio topʉ nigṍ Canaácjõ Jesú tiro caricũwãꞌcãtiwõ:
—Yʉꞌʉ wiogʉ, Davi dʉporocjʉ̃ wiogʉ pãrãmi, yʉꞌʉre pajañaꞌña. Yʉꞌʉ macõ wãtĩ sãjãnoꞌco nitjĩagõ, pũrõ piꞌetimo, niwõ.
23 Jesú core yʉꞌtitiyʉꞌrʉocãꞌwĩ. Tojo weerã ʉ̃sã cʉ̃ buꞌerã cʉ̃ pʉꞌto waꞌa, cʉ̃rẽ niwʉ̃:
—Marĩ siro ñaꞌarõ caricũwãꞌcãtisamo. Core waꞌadutiya, niwʉ̃.
24 Beꞌro Jesú core niwĩ:
—Õꞌacʉ̃ yʉꞌʉre Israe curuacjãrã oveja bajudutiꞌcãrã weronojõ nirã́ diaꞌcʉ̃rẽ aꞌmadutigʉ oꞌówĩ, niwĩ.
25 Cʉ̃ tojo nimicã, co cʉ̃rẽ ẽjõpeogo, cʉ̃ pʉꞌto ejaqueꞌawõ. Aꞌtiro niwõ:
—Wiogʉ, yʉꞌʉre weetamuña, niwõ.
26 Jesú core yʉꞌtiwĩ:
—Wĩꞌmarã baꞌasere ẽꞌma, diayiare doquecũucã, ñaꞌa niꞌi, niwĩ.
27 Cʉ̃ tojo nimicã, co peꞌe cʉ̃rẽ niwõ:
—Yʉꞌʉ wiogʉ, tojota niꞌi, nírõ. Diayiapʉta mesapʉ na wiorã baꞌastedijosere baꞌasama. Tojo nígõ, yʉꞌʉ judío masõ nitimicã, judío masã na “Diayi weronojõ nimo” nigõrẽ, judío masãrẽ mʉꞌʉ weetamudʉꞌaꞌquere weetamuña nígõ, tojo niwõ.
28 Co tojo nicã, Jesú niwĩ:
—Mʉꞌʉ pũrĩcã ẽjõpeose cʉoyʉꞌrʉaꞌa. Tojo weero mʉꞌʉ níꞌcaronojõta waꞌato, niwĩ.
Cʉ̃ tojo nirĩ curata co macõ wãtĩ cõꞌawĩrõnoꞌcopʉ tojaco niwõ.
Jesú pãjãrã dutitirãrẽ yʉꞌrʉoꞌque niꞌi
29 Jesú Tiro, Sidṍpʉ níꞌcʉ wijawãꞌcãgʉ̃, Galilea wãmetiri ditara sumutopʉ yʉꞌrʉawĩ. Beꞌro ʉ̃rʉ̃gʉ̃pʉ mʉjãa, ejanujãwĩ.
30 Pãjãrã masã cʉ̃ dujiropʉ etawã. Na opa cõꞌñerĩ sijarãrẽ, caperi bajunoꞌtirãrẽ, omocã, dʉꞌpocã dojoriwiꞌiare, ucũmasĩtirãrẽ, noꞌo duti cʉorãnojõrẽ miiejawã. Jesú tiropʉ narẽ miiejacũuowã. Narẽ yʉꞌrʉowĩ.
31 Tojo weecã, ucũmasĩtimiꞌcãrã ucũwã. Omocãrĩ, dʉꞌpocãrĩ dojoriwiꞌia yʉꞌrʉonoꞌwã. Opa cõꞌñerĩ sijaꞌcãrã diacjʉ̃ sijawã. Ĩꞌatimiꞌcãrã ĩꞌawã. Tere ĩꞌarã, masã ĩꞌamarĩawã. Beꞌro Õꞌacʉ̃rẽ “Marĩ Israe curuacjãrã wiogʉ tutuayʉꞌrʉami”, ni eꞌcatise oꞌowã.
Jesú baꞌparitisetiri mil ʉmʉarẽ ecaꞌque niꞌi
(Mr 8.1-10)
32 Beꞌro Jesú ʉ̃sã cʉ̃ buꞌerãrẽ pijio, niwĩ:
—Ãꞌrã masãrẽ pajañaꞌa waꞌasaꞌa. Na marĩ meꞌrã nirṍ iꞌtia nʉmʉ yʉꞌrʉꞌʉ. Tojo weerã na baꞌase toja waꞌasama. Na ʉja meꞌrã na ye wiꞌseripʉ tojaacã ʉatisaꞌa. Na baꞌatirã, maꞌapʉ tʉꞌomasĩse peꞌtiqueꞌa waꞌabosama, niwĩ.
33 Cʉ̃ tojo nicã, ʉ̃sã cʉ̃rẽ niwʉ̃:
—¿Deꞌro wee ʉ̃sã baꞌase bocabosari ãꞌrã pãjãrãrẽ? Aꞌtore masã marĩma, niwʉ̃.
34 Jesú ʉ̃sãrẽ niwĩ:
—¿Dicʉsepaga pã́ cʉoti? niwĩ.
Ʉ̃sã cʉ̃rẽ niwʉ̃:
—Sietepaga pã́, tojo nicã waꞌi pejetirãcã cʉoꞌo, niwʉ̃.
35 Ʉ̃sã tojo níca beꞌro masãrẽ dujidutiwĩ.
36 Beꞌro pã́ sietepagare, tojo nicã waꞌire mii, cʉ̃ pacʉ Õꞌacʉ̃rẽ eꞌcatise oꞌowĩ. Tuꞌajanʉꞌcõ, pã́rẽ dʉcawaa, ʉ̃sãrẽ oꞌowĩ. Ʉ̃sã peꞌe tere masãrẽ etiwʉ.
37 Nipeꞌtirã baꞌa, yapiyʉꞌrʉawã. Beꞌro siete piꞌseri na baꞌadʉꞌaꞌquere seeneowʉ̃.
38 Tere baꞌarã numia, wĩꞌmarã baꞌpaqueonoꞌña marĩrõ ʉmʉa seꞌsaro baꞌparitisetiri mil niwã.
39 Beꞌro Jesú masãrẽ weꞌeriti, ʉ̃sã yucʉsʉpʉ mʉjãsãjãa, Magdala wãmetiropʉ pẽꞌa waꞌawʉ.