91
Maaron imin niaan to yoŋgaaŋ
1 Ighe tamtamon eta iyooŋ ila to Maaron Ariaŋa Tau Iliiv Zimaronŋa Tisov na, i pale ileep poi ila i saamba.
2 I irau isaav pa Yoova ighe: “Maaron tsiau, yau nanumeer ghom.
Yoova, yo umin niag to yoŋgaaŋ, ve uponpoon ghau pa koiagŋa imin didiiŋ ariaaŋa.”
3 Onoon kat, i pale ipasalia aghem pa liis tau koiamŋa tighuru payo.
Ve ipaghau moroghooŋ saghati payo.
4 I pale iŋgin ghom ila niima saamba imin tatareek ipagud natŋa ila baage saamba.
Yes tau tiyooŋ ila tooni na, pale tileep poi.
Pasaa, i itataghon saveeŋ mbuaaŋ tooni. Ŋgar tana pale imin sigheu payo, ve ipoon ghom pa gabua sasaghati.
5 Tauvene yo irau uroi pa gabua sasaghati to mboŋ mako.
Ve mataaz paam, irau uroi pa koiamŋa paneegh toozi natŋa mako.
6 Tauvene moroghooŋ sasaghati tau ighamgham tamtamon pa mboŋ,
ve pataŋani tau iravrav zi pa mataaz na,
yo irau uroi pazi mako.
7 Isaav ighe tamtamon ndiŋndiŋ ndiŋndiŋ ee (1,000) timatmaat ve titaptap ila zigem,
ma tamtamon ndiŋndiŋ ndiŋndiŋ saŋavul (10,000) tau tilivut ghom na timataar, na uroi sov.
Pa gabua saghati eta irau ilam igharau ghom mako.
8 Atuya tau izaa to zeran sasaghati na, yo pale ulepleep, ve ughit katini pa taum matam.
9 Pasaa, yo uyoŋyooŋ ila to Yoova, ve i imin niam to lepoogh.
Maaron Tiina Tau Iliiv Zimaronŋa Tisov na iŋginŋgin ghom, tauta uleep poi ila i saamba.
10 Tauvene gabua saghati eta irau ivaghamun ghom mako,
ve moroghooŋ saghati eta irau igharau niam to lepoogh mako.
11 Pasaa, Maaron pale imbaaŋ aŋela tooni to tiŋgin ghom.
Nugh sindei tau ighe yo ula pani, yes pale matazi payo.
12 Yes pale tikis ghom pa nimazi, ve tipalot ghom.
Leso utut aghem ila maet sov.
13 Isaav ighe utut laion paaghu, ma uvaghaaz moot saghati eta, ene irau tigham gabua eta payo mako.
14 Pasaa, Yoova isaav ighe: “Yes tau lolozi isaghav ghau ve titaghon eez tsiau na, yau aat napas zi tivot pa pataŋani toozi.
Ve yau aat naghur zi tizala saaŋa ve matag pazi. Leso gabua eta ivaghamun zi sov.
Pasaa, yes tiwatagh ghau, ve lolozi igheen ilam tsiau.
15 Isaav ighe titaŋ rarai ghau, yau aat nalooŋ zi.
Saawe tau tileep ila pataŋani loolo, yau aat naleep tomani zi.
Pale nauul zi, ve napakur zi.
16 Yau pale naseeŋ saawe toozi ila malau, leso tileep toman lolozi poia.
Ve natotoi uleeŋ tsiau ivot ighazooŋ pazi.”