20
ⵏⴼⵍⵍ ⵏⵎⵈⵍⴾ ⵆⵏⵏ ⵂⵔ ⴶⵎ ⵏⵓⵜⵢ
1 ⴹⴼⵔ ⵓⵏ ⴶⵗ ⵏ⵿ⴶⵍⵙ ⵜⵤⵀⵜⴹⵓ ⴶⵎⴹⵓ ⵌⵏⵓⵏ ⵜⴼ ⴹⵗ ⴼⵙⵏⵜ ⵜⵙⵙⵔⵜ ⵏⵗⵗⵢ ⵓⴰ ⵓⵔ ⵏⵍⴰ ⴹⵔ ⵜⴼ ⴹⵗ ⵙⵙⵔ ⵤⵓⵔⵏ⵰
2 ⵀⵤ ⵎⵈⵍⴾ ⵜⵎⵙⵏ ⵛⵍ ⵓⴰ ⵔⵓⵏ ⵎⵙ ⵀⵍⵙ ⵜⵓⵏⵙ ⴹⵗ ⵛⵢⵜⵏ ⴶⵙ ⵜⵓⵗⵏⵢ ⵤⴰ ⵜⴶⵜ ⴶⵎ ⵏⵓⵜⵢ⵰
3 ⴶⵔ⵿ⵜⵓ ⵏ⵿ⴶⵍⵙ ⴹⵗ ⵗⵗⵢ ⵓⵏ ⵂⵔ⵿ⵜⵓ ⴼⵍⵙ ⵗⴼⵍ⵿ⵜⵓ ⵙⵍⵗ ⴼⵍ ⴹ ⵓⵔ ⵍⵙ ⵙⵈⵔⴾ ⵏ⵿ⵜⵎⵜⵓⵏ ⵂⵔ ⴶⵓ ⴶⵎ ⵏⵓⵜⵢ⵰ ⴹⴼⵔ ⵓⵏ ⵍⵤⵎ ⴹ ⵏⵍⵎ ⵎⵔⵓ ⵂⵔ ⵔⵜ ⵏⵤⵎⵏ⵰
ⵏⴼⵍⵍ ⵏⵜⵓⵔⵏⴰ ⵏⵛⵢⵜⵏ
4 ⴶⵗ ⵛⵈⵓⴰ ⵏ⵿ⵜⵗⵎⵔ⵰ ⵓⵏ ⴼⵍⵙⵏⵜ ⵆⵎⵏⵏ ⴶⵔⵓⵏ ⵜⵔⵏⴰ ⵏⴹ ⵆⵍⵏ ⵎⵛⵔⵗⵏ⵰ ⴶⵗ ⵎⵏ ⵏⵢⵜⴹⵏ ⵓⵏ ⵙ ⵜⵓⵙⵀⵏ ⵔⵓⵏⵙⵏ ⴼⵍ ⴹⵍⵍ ⵏ⵿ⵜⴶⵢⴰ ⵜⵍⵗⵜ ⵜⴰ ⵜⴶⵏ ⴹⵗ ⵀⵜⵓ ⵏ⵿ⵗⵢⵙⴰ ⴹⵓⵍ ⵏⵎⵛⵏⴰ⵰ ⴶⵗ ⴹⵗ ⵢⵜⴹⵏ ⵓⵏ ⵓⵔ ⵏⵗⵀⴹ ⵎⴹⵔ ⵓⴰ ⵙⴾⵙⴹⵏ ⵤⴰ ⵓⵔ ⵙⵌⴹⵏ ⵢ ⵛⵛⵍⵏⵜ ⵓⵔ ⵜⵓⵌⵌⵓⵍⵏⵜ ⵜⴾⵏⵔⵏⵙⵏ ⵓⵍⴰ ⴼⵙⵏⵙⵏ⵰ ⵢⵜⴹⵏ ⵓⵏ ⴹⵏ ⵆⵍⵏ⵿ⵜⵏ⵿ⴹⵓ ⵎⵏⵙⵏ ⵏⵎⴶⵤⵏ ⵜⵗⵎⵔ ⴹⵍⵎⵙⵈ ⵎⵔⵏ ⵓⵏ ⴹ ⴶⵓ ⴶⵎ ⵏⵓⵜⵢ⵰
5 ⵏ⵿ⵜⴰ ⴹⵏ ⴹⴰ ⵜⵏⴾⵔⴰ ⵜⴰ ⵜⵤⵔⵜ ⵏⵎⵜⵏ⵰ ⵏⵎⵜⵏ ⵓⵏ ⵂⴹⵜⵏⵏ ⵓⵔ ⴹⵏ⵿ⴾⵔⵏ ⵂⵔ ⵏ⵿ⴹⴰ ⴶⵎ ⵏⵓⵜⵢ ⵓⵏ⵰
6 ⵀⵍⵍⵏ ⵢⵜⴹⵏ ⵤⴹⴶⵏⵏ ⵓⵏ ⴹⵏ⵿ⴾⵔⵏⵏ ⴹⵗ ⵜⵏⴾⵔⴰ ⵏⵎⵜⵏ ⵜⴰ ⵜⵤⵔⵜ⵰ ⵢⵜⴹⵏ ⵓⵏ ⴹⵢ ⵓⵔ ⵜⵏⵏ⵿ⵜⴾⴰ ⵌⵂⵏⵎⴰ ⴹⵓⵍⴰ⵰ ⵏ⵿ⵜⵏⵢ ⵤⵆⵍⵏⵏ ⵍⵎⵎⵏ ⵏⵎⵛⵏⴰ ⴹⵍⵎⵙⵈ ⵎⵔⵏ ⴹⵔⵙ ⵏⵎⴶⵤⵏ ⵜⵗⵎⵔⵏⵜ ⵂⵔ ⴶⵎ ⵏⵓⵜⵢ⵰
7 ⵙ ⵏ⵿ⴹⴰ ⴶⵎ ⵏⵓⵜⵢ ⵓⵏ ⴹⵜⵓⵢⵓ ⵛⵢⵜⵏ ⴹⵗ ⴾⵙⵓ ⵓⴰ ⵂⴰ
8 ⴶⵍⵓ ⴹ ⵙⵈⵔⴾ ⵛⵎⵜⵓⵏ ⵓⵔⵏⵏ ⵜⵙⵢⵜ ⵏⵎⴹⵍ ⵎⵙⵏⵏ ⵢⵌⵌ ⴹⵎⵌⵌ⵰ ⵜⵏ⵿ⴹⵛⴹⵓ ⵢⵎⴶⵔ ⵎⵔⵏ ⴶⵏ ⴶⵜ ⵓⵏ ⵜⵀⵍⵍⵏ ⵏⵎⴹⵍ ⴹⵀⵢⴾⵏⵏ ⴹⵗ ⴼⵢ ⵏⴶⵔⵓ⵰
9 ⵙⵓⵍⵏ ⴹⵏⵜ ⴾⵜⵏⵜ ⵀⵤⵏ ⵗⵔⵎ ⵓⴰ ⴾⵏⵏ ⵜⵓⵔⴰ ⵗⵍⵢⵗⵍⵢⵏ ⵎⵤⴹⴶⵏ ⵏⵎⵛⵏⴰ⵰ ⵎⵛⵏ ⵜⵤⵀⵜⴹⵓ ⵜⵎ⵿ⵙⵢ ⴹⵗ ⵌⵏⵓⵏ ⵜⵙⵔⴾⵎⵜⵏ⵰
10 ⵀⵍⵙ ⵙⵏ⵿ⵜⴰ ⴹⵙⵏⵤⵔⵏ ⵙⵈⵔⴾⵏ ⵜⵓⴶⵔ ⴹⵗ ⵗⵤⵔ ⵏ⵿ⵜⵎ⵿ⵙⵢ ⵜⴶⵜ ⵙⴹⵗⵙⵏ⵿ⵜⵂⵔ⵿ⵜ ⵓⴰ ⵂⴰ ⵎⴹⵔ ⴹⵏⵀⵢ ⵏⵀⵂⵓ⵰ ⴹⵏ ⴹⵗ ⴹⵙⵏ⵿ⵤⵜⵓⴶⵓ ⵜⵓⵤⵗⵤⵀ ⵙⴾⵙⴹⵏ ⵂⴹ ⵤⵍ ⵂⵔ ⴼⵓ⵰
ⵏⴼⵍⵍ ⵏⵛⵔⵗⴰ ⵏⵎⵛⵏⴰ
11 ⴶ ⵜⵈⵓⵜ ⵏ⵿ⵜⵗⵎⵔ ⵜⴾⵏⵜ ⵜⵤⵓⵔ⵿ⵜ ⵜⴾⵏⴰ ⴹⵗ ⵜⵎⵍⵢ ⴹⵓⴰ ⴼⵍⵙ ⵆⵎⵏ⵰ ⴹⴶⴶⵏⵙ ⵌⵏⵓⵏ ⴹⵎⴹⵍⵏ ⴶⴶⵏ⵿ⵜⵓ ⵓⵔ ⴹⵢⵏ ⵓⵍⴰ ⴹⵔⵤ⵰
12 ⴹⴼⵔ ⵓⵏ ⴶⵗ ⵏⵎⵜⵏ ⵓⵏ ⵓⵔ ⵏⵍⴰ ⵍⵎⵆⵎ ⵂⵔⴾⴹ ⵓⵏ ⵜⵍⵏⵏ ⵀⴹⴹⵏ ⴹⵜ ⵜⵈⵓⵜ ⵜⵏ ⵜⵗⵎⵔⵏ⵰ ⵏⵍⵎⵏ ⵍⴾⵜⵀⵏ⵰ ⵏⵍⵎ ⵍⴾⵜⵀ ⵢⵏ ⵙⵏ⵿ⵜⴰ ⵎⵙⵏ ⵍⴾⵜⵀ ⵓⵏ ⵜⵎⴹⵔ⵿ⵜ⵰ ⵜⵓⵈⴾⵎⵏ ⵏⵎⵜⵏ ⵙⵓⴰ ⵂⵏ ⵍⴾⵜⵀⵏ ⵓⵏ ⴹⵏ ⵓⵍ ⵓⵏ ⵙ ⵎⵤⵍⵏⵙⵏ⵰
13 ⴾⴼⴹⵓ ⴶⵔⵓ ⵏⵎⵜⵏ ⵓⵏ ⵜⵂⵏⵏ ⵜⴾⴼⴹⵓ ⵜⵎⵜⵏ⵿ⵜ ⴹⵍⵈⵔⵜ ⵏⵎⵜⵏ ⵓⵏⵙⵏⵜ ⵜⵓⵈⴾⵎ ⴾⵢⵏ ⴹⵗⵙⵏ ⵙ ⵎⵤⵍⵏⵜ⵰
14 ⵜⵜⵓⴶⵔ ⵜⵎⵜⵏ⵿ⵜ ⴹⵍⵈⵔⵜ ⴹⵗ ⵗⵤⵔ ⵏ⵿ⵜⵎ⵿ⵙⵢ⵰ ⵗⵤⵔ ⵏ⵿ⵜⵎ⵿ⵙⵢ ⵓⵏ ⵏ⵿ⵜⴰ ⵎⵙⵏ ⵌⵂⵏⵎⴰ⵰
15 ⵓⴹⵏ ⴾⵜⵏⵜ ⵓⵙ ⵓⵔ ⴾⵜⵀ ⵙⵎⵏⵜ ⴹⵗ ⵍⴾⵜⵀ ⵓⵏ ⵜⵎⴹⵔ⵿ⵜ ⵜⵓⴶⵔ ⴹⵗ ⵗⵤⵔ ⵏ⵿ⵜⵎ⵿ⵙⵢ ⵓⵏ⵰