18
1 Dǝffǝr awen oggeɣ angalos iyyan ilân taɣmar wǝllen itazabbat-du daɣ jǝnnawan, imalawlaw amaḍal ketnet s ǝnnur ǝn tanaya-net.
2 Inna s ǝmǝsli issohen wǝllen:
«Babǝylon ta n tǝmizwart, tuda!
Awalla tuda Babǝylon!
Tǝqqal edag ǝn tǝmǝɣsurt n aššayatinan
d adag ǝn tǝmǝɣsurt ǝn kǝlǝsuf
d asammanay ǝn gǝḍad kul win xaramnen
[d asammanay n ǝzzǝnǝfan kul
ǝn mudaran win xaramnen]
ǝd win wǝr ǝren man ǝd win ǝtawaglafnen.
3 Šimattiwen n ǝddǝnet kul ǝddewnat dǝr-ǝs
daɣ arak deranan-net labasnen n igi n ǝzzǝna,
imos awen zun esmad sassinat.
Imǝnokalan n ǝddǝnet nimaggan dǝr-ǝs ǝzzǝna,
kǝl jola n ǝddǝnet deɣ
isaggargas-tan ǝɣrǝm wa n Babǝylon,
s ǝrrǝzǝɣan-net ǝknânen igǝt.»
4 Tǝzzar ǝsleɣ y ǝmǝsli iyyan as d-igmad ijǝnnawan inna:
«Ǝgmǝdat-du aɣrǝm
wǝdi kawanay win ǝmosnen tamattay-nin,
fǝl ad wǝr tǝgem ibakkadan win itaggu,
awǝd-kawan-in albala wa fall-as zʼuden.
5 Fǝlas ibakkadan-net ǝglan har ewadan ijǝnnawan,
amaran Mǝššina ikittǝw
arak mazalan labasnen n ǝɣrǝm wǝdi.
6 Ǝrzǝmat-as s ǝmmǝk was irazzam,
takfim-tu ǝnǝtfus ǝn mazalan-net!
Tǝkabart tas ikkat, ǝkǝtat-as ǝnǝtfus-net.
7 Ǝmmǝk was idkal iman-net,
immozal arat kul wa ǝran man-net,
ǝmmǝk di daɣ as agiwat-as ǝzǝɣɣǝzzǝb sǝksǝdan,
tǝsǝssugim-tu tǝkenzert labasat ogdânen d awen da,
id tǝnna a itaggu ǝɣrǝm wa n Babǝylon:
"Tǝxawit ta n tǝmǝnukǝla a fǝl ǝqqima,
wǝr ǝmosa tantut as aba alǝs-net,
wǝr ilkem ad ǝggâzaɣ afartay."
8 Awen daɣ a fǝlas albalatan zawwarnen
ǝddi win das-ǝnsanen:
Tǝmattant ǝd tǝkenzert labasat ǝd laz.
Ǝzǝl iyyanda a fall-as zʼuden albalatan win di,
tǝsǝrrǝkǝmmǝt-tu deɣ temsay.
Awalla, Ǝmǝli Mǝššina
imosan Mǝššis ǝn tarna
a itawaddaban aɣrǝm wen.»
Isǝmmǝdǝnnigan ǝgânen fǝl ǝɣrǝm ǝn Babǝylon
9 Imǝnokalan n ǝddǝnet kul win dǝr-ǝs ǝddewnen, nimaggan dǝr-ǝs ǝzzǝna d aratan win ǝran man-nasan daɣ ǝddǝnet, ad ǝnǝyan ǝhu ǝn tǝmsay ta tu-za-tǝsǝrrǝkǝmmet, ad hallin sǝkkǝlǝlan fǝl awa zʼagu ǝɣrǝm wen daɣ alɣazab.
10 A dǝr-ǝs nǝmǝggǝgan, fǝl tǝksǝda n a tan-in-awǝd alɣazab wa zʼagu den. Ad gannin:
«Xašša! Xašša wǝllen
y ǝɣrǝm wa zǝwwǝran ǝn Babǝylon ilan tarna.
Alwaq iyyanda ɣas a fǝl t-iwwǝddab Mǝššina!»
11 Kǝl jola n ǝddǝnet kul ad hallin fǝl tǝrǝmmeq y ǝɣrǝm wen. Wǝr t-illa awedan a ɣur-san izanzin awa ǝssǝtagan,
12 gǝr urǝɣ, wala azrǝf, wala šihun šin ǝlanen almaqam, wala ǝljuhǝr, wala lin, wala tabdoq tǝgât tǝzuɣay tǝŋŋât, wala ǝlxǝrir, wala tabdoq ta tǝgat tǝzuɣay tǝhossayat, wala eškan kul win as izod aḍu-nasan, wala aratan win ǝganen daɣ tǝhunt tǝknât tǝmǝllay s ǝnta daɣ itaggu uɣǝn wa n xummaysa, wala win eškan win ǝlanen almaqam, wala win daroɣ, wala win tǝzoli, wala win tǝhun šin hossaynen,
13 wala egel n ašǝk was itawannu kanel, wala ǝzzǝnǝfan n annabatan win ǝlanen aḍu, wala alwarditan, wala aḍutan win ǝzodnen ǝmosnen mir d ǝlmǝsǝk, wala esmad n alɣanab, wala widi wa n azzayt, wala egel, wala alkama, wala šitan, wala ayfad, wala ǝggǝsan wala amalankaytan wala eklan, wala ikefǝlan.
14 Ad gannin kǝl jola y ǝɣrǝm wen:
«Aratan win ǝran man-nak kul
ǝddǝggagan fall-ak.
Tǝnaflǝyt, d aratan win hossaynen,
ǝzodnen aba-tan fall-ak.
Wǝr ilkem ad ǝlasan ǝtǝwǝnay!»
15 Kǝl jola win ǝggǝrgasnen daɣ ǝsǝtǝg wa taggin daɣ ǝɣrǝm wen, a dǝr-ǝs nǝmǝggǝgan fǝl tǝksǝda n a tan-in-awǝd alɣazab-net. Ad hallin, sikalalan;
16 gannin:
«Xašša! Xašša wǝllen
y ǝɣrǝm wa zǝwwǝran a!
Dat awa ilsa tabdoq ǝn lin ihossayan,
ǝd tabdoq tǝgât tǝzuɣay tǝŋŋât
ǝd tabdoq ta tǝgat tǝzuɣay tǝhossayat,
iqqân uɣǝnan hossaynen n urǝɣ
ǝd tǝhun šin ǝlanen almaqam d ǝljuhǝr.
17 Amaran alwaq iyyanda ɣas
a fǝl aba tǝgǝrgist ten!»
Aytedan kul win azzarnen y ǝɣlalan win aman ǝzzozalan-tan d aytedan kul win šakalnen fǝl gǝrwan win zawwarnen ǝd win maššaɣalan n ǝɣlǝlan n aman ǝd win ǝganen jola gǝr kallan ǝs tarrayt ǝn gǝrwan, ǝbdadan-in daɣ igǝg
18 assaɣa wad ǝnayan ǝhu ǝn tǝmsay ta tǝsirǝkǝmmet aɣrǝm wen, sakkarayan gannin:
«Wǝr kala ad itawanay
arat šilat ǝn wa igraw ǝɣrǝm ogdân ǝd wa.»
19 Sawaran iɣafawan-nasan aboqqa, hallin, ǝɣšâdan man-nasan wǝllen, sikarayan gannin:
«Xašša! Xašša wǝllen
y ǝɣrǝm wa zǝwwǝran a,
s ǝnta a daɣ ǝggǝrgasan aytedan kul
win ǝlanen iɣlalan n aman win zawwarnen,
mišan alwaq iyyanda ɣas a fǝl iɣrad ahluk!»
20 «Dawatat ijǝnnawan!
Aɣrǝm iɣrad ahluk!
Dawatat kawanay da win ǝmosnen imizdagan ǝn Mǝššina
ǝd nǝmmuzal d ǝnnǝbitan.
Awalla, Mǝššina iwwǝddab
aɣrǝm wa fǝl tǝkma ta dawan-iga.»
21 Tǝzzar idkal angalos iknân tǝla ǝn tarna tǝhunt zǝwwǝrat tolât ǝd ta fǝl itawaẓad alkama, igar-tat daɣ agarew igannu:
«Ǝnta da da ǝmmǝk was din-z-itǝwǝgǝr
ǝɣrǝm wa zǝwwǝran ǝn Babǝylon
ǝs tǝmǝwit labasat,
amaran wǝr zʼilǝs ǝtǝwǝnay dǝffǝr adi.
22 Wǝr ilkem ad ǝlasan aytedan
tesalay daɣ ǝɣrǝm wen
i sǝwat win ǝganen ǝs tǝhǝrdănt wala asak,
wala win ǝganen ǝs tǝsǝnsǝq, wala esǝk.
Wǝr ilkem a daɣ-as itiwanay ǝššǝɣǝl
wa n ǝfus, wala win tu-tagginen.
Wǝr ilkem a daɣ-as itiwasla y ǝmǝsli
n aẓed n attaɣam.
23 Wǝr ilkem a daɣ-as imilawlaw
ǝnnur ǝn fǝtǝla
za wǝr ilkem a daɣ-as ilas ǝtǝwǝsla
y ǝmǝsli n ǝmǝrmuš ǝd tǝmazlayt-net.
Amaran ǝnta da ǝddǝlil wa fǝl iga adi:
"Kǝl jola-nak, ǝntanay a ogarnen
tǝla ǝn batu daɣ ǝddǝnet kul,
išaɣawan-nak deɣ ǝssixrakan šimattiwen kul.
24 Kay aɣrǝm wa n Babǝylon,
a daɣ itawanɣal ǝzni n ǝnnǝbitan
d ǝzni ǝn mizdagan ǝn Mǝššina
d aytedan kul win tawanɣanen daɣ ǝddǝnet."»