Aatagada a vumava̱sula̱
Zafaniya
Ucuɗuwu wa aatagada a nda
Zafaniya vumava̱sula̱ yuwan ta̱ adanshi e ikaka o ukosu wa a'wan ukpakucindere (700) kafu a matsan Yesu. U ta gura o'wo adanshi e ikaka i nda i fara ta̱ a'wan kupa kafu Mogono Josiya yuwan ulapulu wi itoni a a'wan ukpakukupa uta̱li nu ushin na̱ za ta̱ (621) kafu limatan va̱ Yesu.
Aatagada'a u ta̱ ni idanshi yi ikaka i na a̱ ri urevu ne e le, za na aa dansa, urana wu uge'etosu nu ukototosu u ta̱ lo a̱ ta̱wa̱ na A̱sulazuva aa yuwaan Yahuda adama a na wa yuwusaan musula̱ n ro a̱ga̱nda̱. Waru A̱sulazuva a̱ ta̱ ge'eto akapi a nɗa suru.
Ko na wo o'woi e ge'eto ta̱ Urishelima, acina elime a̱ ta̱ ka̱mbuwa̱i cine u da̱na̱i. Ama a na a̱a̱ da̱nu pe, o to o'wo ama a na a̱ ka̱ɗa̱toi aciyele oɓolo na̱ a̱za̱ a̱ a̱ɓula̱. A̱sulazuva na aciya̱yi u ta yuwan ma̱za̱nga̱ o una̱ wa akapi ama a̱yi na buwai.
Ili i na i ri pe:
Urana u na A̱sulazuva e ge'eto Yahuda ta̱ lo a̱ ta̱wa̱ 1:1-18
Ɗewu adama o uvadalasa 2:1-3
Uge'etosu wu nɗa ma atakpaci 2:4-15
Uge'etosu wa̱ Urishelima ni iwawi ya̱ yi 3:1-13
Ishipa i ma̱za̱nga̱ 3:14-20.
1
1 A mantsa ma na Josiya ulobo wa Amon da̱na̱i o tsugono tsa Yahuda, vumava̱sula̱ Zafaniya ulobo wa Kush, ulobo wa Gedaliya, mawun ma tsukaya ma Amariya wu u'wa wa Hezekiya, damma ta̱ ili i na A̱sulazuva a damma niyi.
Urana wu uge'etosu wa̱ A̱sulazuva
2 Reve A̱sulazuva a damma, <<N ta̱ kototo ili biti
a̱tsuma̱ o uvaɗi.>>
3 <<N ta̱ kototo vaɗilima̱
ni inama yu uvaɗi suru,
n ta̱ kototo nnunu
na̱ mugula m mala,
n ta̱ kototo a̱za̱ e iwuya,
a̱vu n tawa vaɗilima̱ diga o uvaɗi.>>
4 <<N ta̱ ba̱ruwa̱ ukere u va̱ n yuwan nla̱ngi na̱ Yahuda
na aza a na a̱ ri nden a̱tsuma̱ a̱ Urishelima suru.
Waru n to kototo akapi ama a na a yuwusaan Ba'al a̱ga̱nda̱
na ala a nan ganu a na a yuwusan yi ulinga.
5 N ta̱ kototo aza a na a tsu kumba ukwa̱'a̱
a yuwaan urana na̱ woto na̱ italyo'o a̱ga̱nda̱.
N ta̱ kototo aza a na a̱ ka̱ɗa̱tosu a kucinasa na̱ A̱sulazuva,
waru a yuwusan akucunu na̱ ma̱sula̱ Mole.
6 N ta̱ kototo aza a na a vadalai ucina a lyawai itoni ya̱ A̱sulazuva,
na aza a na a zamiyi A̱sulazuva ko a pati niyi ikambishi shi.>>
7 Vu rungwa̱ kpen a̱ ma̱ka̱nka̱ ma̱ A̱sulazuva!
Adama a na urana wa̱ yi u yuwan ta̱ zuzu.
A̱sulazuva o foɓo ta̱ na wa ca a ama a̱ yi kucci,
waru u ɗangula ta̱ aza a yuwan ili i na u foɓoi.
Uge'etosu a aci azagbain o mogono
8 <<Urana u na a̱mu A̱sulazuva maa ca ama a̱ va̱ kucci,
n ta̱ ge'eto azagbain o mogono na̱ muwun n mogono,
na aza a na oo otosu a̱tugu a̱ga̱nda̱
a̱ musula̱ mi iɗa i ro.
9 O urana u ndolo n ta̱ ge'eto za na suru
a yuwusan a̱ga̱nda̱ tsa za na revei A̱sula̱ shi,
na aza a na o shitoyin u'wa wu zagbain le
ni ili ya usa na̱ yipalishi.>>
Uge'etosu a aci aza a atsulu na awina a Urishelima
10 A̱vu A̱sulazuva a damma, <<O urana u ndolo,
a ta uwwa mesun diga o Una̱ntsu u Magula,
yorori diga o Upasu u ire,
ni ilama yu ucira i ma̱riya̱ ma agaɗi.
11 Oruwoi, a̱ɗu aza a na i ri nden upasu we eden!
Adama a na o kototo ta̱ suru aza a atsulu na awina,
aza a na a tsulusa azurufa suru
o una le ta̱.
Uge'etosu e ekere aza a na a cayi okolo shi
12 A mantsa mo ndolo
n ta gbangaɗa Urishelima ni ifitila,
a̱vu n ca a̱za̱ nden n vama oforo,
aza a na aa yuwusan majiyan,
<A̱sulazuva a yuwan tsu isa'ani ko iwuya shi.>
13 A̱ ta̱ pura̱ utsuru u le,
'wa le waru o kototo le,
a ta suwa 'wa agba a̱ da̱nu pe shi.
A̱ ta̱ cu'wa̱n a̱ɗuma̱ a̱ ina̱bi
agba oo sowo masayan me le shi.>>
Urana wa̱ A̱sulazuva
14 Urana u gbain wa̱ A̱sulazuva
a yuwan ta̱ zuzu a̱ zura̱sa̱ ni ilaɗi.
Uwwai! Uɗyo u mesun ma̱ A̱sulazuva ma̱ ta̱ da̱na̱ okono,
o urana'a za a na gurai uvon u ta yuwan yisali lon.
15 Urana u ndolo u to o'wo urana wu upan,
urana u ɗa wa̱ a̱tsumola̱ngu na̱ a̱tsuma̱lima̱,
urana u ɗa wa̱ a̱tsuma̱lima̱ nu ukototosu,
urana u ɗa wi irumbu picim,
urana u ɗa we eleshe ni irumbu da̱n.
16 Urana u ɗa u mesun ma avana na̱ yorori yu uvon
a aci e ilyuci i na i ri na̱ kari vu ucira
na atsura o uga'an.
17 <<N ta̱ ta̱wa̱a̱ ama na̱ a̱tsuma̱lima̱
hali e reme mmalu tsa̱ nrumba̱,
adama a na a yuwaan ta̱ A̱sulazuva unusu.
O to oco mpasa n le tsa̱ mini,
inama i le waru tse everi.>>
18 O urana wu upan wa̱ A̱sulazuva
azurufa na̱ zinariya le
aa gura wawa le shi.
A̱tsuma̱ o upan wu usuɗu wa̱ yi,
u to kototo uvaɗi ma̱ɓula̱.
Na amayun u ta̱ kototo
aza a na a̱ ri nden o uvaɗi suru.