29
Aza a Filistiya a 'yuwan ta̱ Da̱wuda
1 Aza a Filistiya o ɓoloto ta̱ ali o uvon e le suru ɗe Afe, a̱vu aza a Isra'ila a̱ va̱la̱ a̱ lyusu mini a̱tsuma̱ a Yezireyel.
2 Mantsa ma na azagbain a aza a Filistiya a̱ ri a mmalu no oɓolo ali o uvon ukpaku na̱ ukpakukupa, Da̱wuda na ali o uvon a̱ yi a̱ da̱na̱ ta̱ o tono ele a mmalu a̱ca̱pa̱ oɓolo na̱ mogono Akish.
3 Nan yali o uvon a Filistiya a yuwan ta̱ yeci, <<Nye i ɗa Mmaci ma Ibrahim nda maa yuwusan pa?>>
Reve Akish usu, <<Da̱wuda ɗa zana da̱na̱i aagbashi a Shawulu mogono ma Isra'ila. U ta̱ pa oɓolo na̱ a̱mu aa'wan aa'wan, waru diga urana u na wu kasai na̱ Shawulu a cina ana'an n tsura̱ yi nu unusu shi.>>
4 Amma nan yali o uvon a Filistiya a yuwan ta̱ upan na̱ a̱yi a̱vu a damma yi, <<Ka̱mba̱to ɗe vuma nda, adama u ka̱mba̱ ɗe uba̱ta̱ u na vu ca niyi nda̱na̱ta̱. Wa̱a̱ 'ya̱wa̱ oɓolo na̱ a̱tsu uba̱ta̱ o uvon shi, ta̱wa̱ u ta̱wa̱ u vadalaa tsu mantsa mo uvon wan. U ta gura yuwan ulinga na̱ mantsa ma nda wu koɗo aci a̱tsu adama u yo'onoto Shawulu zagbain va̱ yi okolo.
5 Ashe Da̱wuda ɗa na a canaa yi ishipa nu uje'en a̱vu a cana,
<Shawulu una ta̱ ukpakukupa va̱ yi,
waru Da̱wuda una ta̱ ukpakukupa kupa va̱ yi.> >>
6 Ɗaɗa Akish ɗeyi Da̱wuda reve u damma yi, <<N kucina ta̱ na̱ A̱sulazuva a na a̱ ri wuma, a̱vu za va̱ a̱ɓula̱ ɗa, waru shi ta̱ n ciga vu 'ya̱wa̱ uvon oɓolo na ali o uvon a̱ va̱. Adama a na diga urana u na vu ta̱wa̱i ya̱'a̱ va̱ a cina ana'an, n tsura̱ wu nu unusu shi, amma akapi azagbain a Filistiya a̱ usu wu shi.
7 To, gogo she vu vadala vu ka̱mba̱ na asuvu nden, she vu yuwan ili i na ya̱a̱ lungusa̱ okolo akapi azagbain a Filistiya wan.>>
8 A̱vu Da̱wuda ece yi, <<Amma nye i ɗa n yuwain? Unusu u ne u ɗa vu tsura̱i uba̱ta̱ wa aagbashi a̱ wu diga o urana u na n ta̱wa̱i ya̱'a̱ wu hali a cina ana'an? Nye i zuwai ma̱a̱ 'ya̱wa̱ n yuwan uvon na̱ n'yuwatan mu zagbain va̱ mogono shi?>>
9 A̱vu Akish usu yi reve u damma, <<N reve ta̱ vu ta̱ babu unusu na amayun a̱ wenu u va̱ tsa malingata ma̱ A̱sula̱, suru na̱ ne nan yali o uvon a Filistiya a damma ta̱, <Wa̱a̱ 'ya̱wa̱ oɓolo na̱ a̱tsu uba̱ta̱ o uvon shi.>
10 Gogo she vu 'yon nu usana, oɓolo na̱ agbashi a zagbain va̱ wu Shawulu aza a na a̱ ta̱wa̱i oɓolo na̱ a̱vu, a̱vu i ka̱ra̱ nu usana urana a̱ ma̱ɓa̱tsa̱a̱.>>
11 Ɗaɗa Da̱wuda na ali o uvon a̱ yi o uta̱i nu usana adama a̱ ka̱mba̱ e iɗa ya aza a Filistiya, reve aza a Filistiya a̱ ka̱ra̱ a̱ tyo Yezireyel.