14
1 Urana u ro reve Jonata ulobo wa Shawulu u damma ulobo u na wa̱a̱ guzusa̱a̱ yi itana yu uvon, <<Ta̱wa̱, tsu 'ya̱wa̱ upasalai wa̱ oɓolo a̱ a̱soja a Filistiya, upasu u ndeɗe.>> Agba u damma dada va̱ yi shi.
2 Shawulu da̱na̱ ta̱ nden o ukosu wa Gibiya za̱la̱ vu uɗanga muwun m peme a̱tsuma̱ a Migiron. Ama a na a̱ da̱na̱i oɓolo na̱ a̱yi a rawa ta̱ ama ukpaku uta̱li (600),
3 oɓolo na̱ Ahija ganu zana da̱na̱i wotowu na̱ epo. A̱yi ulobo wa Ahitub ɗa mawun ma a̱na̱wu ma Ikabo olobo a Finiha, ulobo wa̱ Eli, ganu va̱ A̱sulazuva a̱tsuma̱ a Shilo. Agba ko za reve a na Jonata ka̱ra̱i shi.
4 O upasata u masasan ma na Jonata cigai u kuruwa̱a̱ a̱ tyo o oɓolo a̱ a̱soja a Filistiya atali o uga'an a̱ shi ta̱ lo a̱ mɓa̱nga̱ suru. Aala a za ta̱ Boze, za va ire waru Sene.
5 Aatali a̱ ta̱ e isawan ta̱ ugana a̱ ka̱lyuwusa̱ eleme a Mikimash, za ta̱ waru uyagi elime a Geba.
6 Reve Jonata damma ulobo u na wa̱a̱ guzusa̱a̱ yi itana yu uvon, <<Ta̱wa̱ tsu 'ya̱wa̱ o uva̱la̱ta̱ wa̱ a̱ a̱soja a Filistiya a aza a na a paɗai uryumbu shi. U ta gura o'wo A̱sulazuva a yuwan ulinga adama a̱ tsu. Babu ili i na yaa putsa A̱sulazuva ni iwawi, u ta̱ tsura̱ u lyuwu wa aci ko na ali o uvon a̱bunda̱ ko na̱ ri uka̱la̱mu.>>
7 Reve za na a̱a̱ guzusa̱a̱ yi itana yu uvo'on u damma yi, <<Yuwan ili i na i ri o okolo a̱ wu suru. Yuwan cine vu cigai, o okolo a̱ va̱ o to oɓolo na̱ a̱vu.>>
8 Reve Jonata damma, <<Lyawa tsu pasa a̱ 'ya̱wa̱ uba̱ta̱ wa ama'a adama tsu roco aciya̱tsu uba̱ta̱ u le.
9 Na a damma tsu, <Puroyi hali she na̱ tsu ta̱wa̱ ya̱'a̱ ɗu,> tsu te isawan uba̱ta̱ u na tsu ri, tsa̱a̱ 'ya̱wa̱ gawan le shi.
10 Amma na a damma, <Ta̱wa̱i gawan tsu,> tsu ta kumba a gawan, adama a na a̱yi nda u to o'wo tsu iroci i na A̱sulazuva a ca le ta̱ e ekere a̱ tsu.>>
11 Ɗaɗa ele ra o rocoi aciyele uba̱ta̱ wa̱ o oɓolo a̱soja a Filistiya. Reve aza a Filistiya a damma, <<Ka̱lyuwa̱i! Mmaci ma Ibrahim n te e ika̱ta̱pu o uta̱sa̱ a̱ a̱nci uba̱ta̱ u na a pa'aton yi aciya̱le.>>
12 Reve o oɓolo a̱ a̱soja a aza a Filistiya a salaa Jonata na̱ ulobo u na wa̱a̱ guzusa̱a̱ yi itana yu uvo'on, <<Gawain a̱ ta̱wa̱ uba̱ta̱ u tsu, tsu ta yuwan a̱guma̱ a̱ ɗu.>>
Ɗaɗa Jonata dammai ulobo u na wa̱a̱ guzusa̱a̱ yi itana yu uvo'on, <<Gawan o oɓolo na̱ a̱mu, A̱sulazuva a ca le ta̱ o ukere wa aza a Isra'ila.>>
13 Reve Jonata kumba ne ekere a̱ yi na ana, waru ulobo u na wa̱a̱ guzusa̱a̱ yi itana yu uvon a̱ca̱pa̱ a̱ yi. Jonata una ta̱ ozo o ro ne ekere a̱ yi, reve za na aa guzusa̱a̱ yi itana yu uvon una ozo ro e le a̱ca̱pa̱ a̱ yi.
14 O uvon wu ufaru reve Jonata na̱ ulobo u na wa̱a̱ guzusa̱a̱ yi itana yu uvon o una ama ushin a agalaci a washin a na a rawai uɓatsulai wu uɗuma̱ u na inan yi iluma yaa luma urana u ta̱.
15 Reve wovon u reme a̱ a̱soja a Filistiya a na a̱ ri o uva̱la̱ta̱ suru, na a aza a na a̱ ri ya aa alanga, hali fo na̱ o oɓolo a̱ a̱soja, na a aza a na a̱ tsu 'ya̱wa̱a̱ nu uvon. Reve suru n le a uwwa wovon lon. Reve iɗa i jinga̱ɗa̱. A̱sula̱ a ɗa a̱ lyunguyi na̱ wovon u ndolo.
Aza a Isra'ila a lyuwa ta̱ aza a Filistiya
16 Ana a̱za̱ e ipiri ya Shawulu a̱tsuma̱ a Gibiya va Banyami a̱ ka̱lyuwa̱i, reve e ene o oɓolo a̱soja a aza a Filistiya e bete'we za suru saɓa ure wa̱ yi.
17 Reve Shawulu damma ama a na a̱ ri oɓolo na̱ a̱yi, <<Kecei a̱soja tsura̱ i reve a aza a na a̱ ri pa oɓolo na̱ a̱tsu shi.>> Ana e kecei, Jonata na̱ ulobo u na wa̱a̱ guzusa̱a̱ yi itana yu uvon ɗa a̱ ri lo shi.
18 Ɗaɗa Shawulu dammai Ahija, <<Ta̱wa̱ na Akpati a Nzuwulai a̱ A̱sula̱ pa nda.>> Adama a na a mantsa mo ndolo u da̱na̱ ta̱ ekere a aza a Isra'ila.
19 Shawulu a yuwusaan adanshi na̱ ganu'u, reve utogbolyuwu a̱tsuma̱ o uva̱la̱ta̱ wa aza a Filistiya u ka̱ra̱ a̱ da̱shishi. Ɗaɗa Shawulu dammai ganu, <<She u damaton wu wan.>>
20 Ɗaɗa Shawulu na ama a̱ yi suru o ɓolotoi reve a̱ ka̱ra̱ a̱ tyo uba̱ta̱ o uvon. A cina ta̱ aza a Filistiya utogbolyuwu lon, a munulai can le na̱ mutsun mu pe'eni.
21 Mmaci ma Ibrahim n na n ri oɓolo na aza a Filistiya, waru a̱ ka̱ra̱i a gawan oɓolo ne ele o uva̱la̱ta̱, a̱ ka̱mba̱ ta̱ a̱ tyo uba̱ta̱ wa aza a Isra'ila aza a na a̱ ri oɓolo na̱ Shawulu na̱ Jonata.
22 Ana aza a Isra'ila suru a na a̱ shi a pa'ain a̱tsuma̱ e iɗa ya agaɗi ya Ifiramu a uwwai a na aza a Filistiya e te ilaɗi, ele fo a saɓa le ta̱ a̱ca̱pa̱ nu uvon.
23 Ne ɗa A̱sulazuva a wawai aza a Isra'ila o urana u ndolo, waru uvon u lyuwa ta̱ elime hali u ka̱ra̱ Bet Aven.
Jonata pupeɗe ta̱ ishiki
24 O urana u ndolo a̱ a̱soja a Isra'ila a uwa ta̱ a̱tsuma̱lima̱, adama a na Shawulu tara ta̱ akucunu na ama a dansa, <<Una̱ u ta̱ reme vuma na suru lyuwai ilyalya babu na ulivu u yuwain, babu na n tsupayi aciya̱va̱ e ekere a n'yuwatan n va̱!>> Ne ɗa gba babu vuma na peɗei ilyalya.
25 Ana a̱ a̱soja'a suru a uwai a̱ a̱a̱rumbu, a̱vu a cina ishiki e iɗa.
26 Waru ana a uwai a̱ a̱a̱rumbu'u, a̱vu a cina pe ishiki a̱ ɗa̱wusa̱, agba babu za na zuwai aakatsu u peɗei, adama a na ama a ta uwwusa wovon wa akucunu'u.
27 Agba Jonata reve a na dada va̱ yi yuwain akucunu na ama'a shi, ɗaɗa u sapiyi combo va a aaɗanga a na a̱ ri o ukere wa̱ yi reve u tsupu yi a abaji e ishiki'i. Reve u 'ya̱sa̱n ukere wa̱ yi a̱ tyo o una̱ wa yi, a̱vu esu a̱ yi a̱ kpa̱tu'wa̱.
28 Reve za ta̱ a̱tsuma̱ a ama'a u damma yi, <<Dada va̱ wu yuwaan ta̱ ama akucunu o usa̱n, u damma, <Una̱ u ta̱ reme vuma na suru lyuwai ilyalya ana'an!> A̱yi ɗa i zuwai ama a̱ ri uta̱ka̱lyuwu.>>
29 Ɗaɗa Jonata dammai, <<Dada va̱ ta̱wa̱a̱ ta̱ iɗa na addama. Ka̱lyuwa̱ cine esu a̱ va̱ a̱ kpa̱tu'wa̱i a na m peɗei ishiki i nda ke'en.
30 U shi a la'a na̱ a̱ shi a damma a lyawa ta̱ ama a lyuwa ilyalya fa̱a̱n ana'an diga a̱tsuma̱ e ilyalya i na a̱ pura̱i uba̱ta̱ wu n'yuwatan n le. Aza a Filistiya a na tsu shi o una a̱ shi a la'a nda shi?>>
31 O urana u ndolo o una ta̱ aza a Filistiya diga Mikimash a̱ tyo Ayalon, waru ama a̱ta̱ka̱lyuwu ta̱ lon.
32 Reve a ama a̱ ga̱da̱ra̱ azaza e itana yu uvon i na a̱ pura̱i. A̱vu a̱ pura̱ ikyon ni inan, na̱ mudindim a̱vu a paɗa le e iɗa, reve a tama le oɓolo na̱ mpasa n le.
33 Reve ama a damma Shawulu, <<Ka̱lyuwa̱i, a̱yi ɗa nda ama a yuwusan unusu e ekere a̱ A̱sulazuva a tamusa inama na̱ mpasa.>>
Reve u damma, <<I kuɗa ta̱ wila̱. Bunda̱la̱i aatali a gbain a̱ ta̱wa̱ pa nda gogo.>>
34 Reve u dammisa, <<Ka̱ra̱i o uta̱ uba̱ta̱ wa ama a̱vu i damma le, <Lyawa vuma suru ta̱wa̱ na̱ nan va̱ yi ko kyon va̱ yi, a̱vu a paɗa le pa a tama le. She i yuwusan unusu uba̱ta̱ wa̱ A̱sulazuva i tama inama na̱ mpasa n le wan.> >> Ne ɗa za suru ta̱wa̱i na̱ nan va̱ yi ayin o ndolo reve a paɗa le ɗe aatali'i.
35 Ɗaɗa Shawulu suwayi A̱sulazuva masa'a, a̱yi ɗa masa'a mo ufaru ma na u suwayi A̱sulazuva.
36 Reve Shawulu damma, <<Lyawa tsu cipa̱i za̱la̱ tsu 'ya̱wa̱a̱ aza a Filistiya nu uvon na ayin a̱vu waru tsu pura̱ le itana hali she usana, waru tsaa lyawa za ro le wuma shi.>>
Reve a̱ usu, <<Yuwan ili i na ve enei u lobono wu ta̱ suru.>>
Amma ganu damma ta̱, <<Lyawa tse ecei A̱sula̱ pa nda.>>
37 A̱vu Shawulu ece A̱sula̱, <<N ka̱ra̱ a̱cipa̱ a na ma̱ 'ya̱wa̱a̱ aza a Filistiya nu uvon? Vu ta ca le e ekere a aza a Isra'ila?>> Agba A̱sula̱ a̱ usu yi o urana u ndolo shi.
38 Reve Shawulu damma, <<Ta̱wa̱yi pa nda, suru nɗu azagbain a̱ a̱soja, reve tsu zamiyi cu'un vu unusu u na a yuwain ana'an.
39 N kucuna ta̱ na̱ A̱sulazuva a na a̱ ri wuma za na wawai Isra'ila, ko na̱ u shi u bura ta̱ ulobo u va̱ Jonata, she nu u kuwa̱.>> Amma babu za na yuwain adanshi a̱tsuma̱ a ama a na a̱ da̱na̱i lo.
40 Reve Shawulu damma aza a Isra'ila suru, <<Yi isawan ndeɗe, waru a̱mu na̱ Jonata ulobo u va̱ tsu te isawan pa nda.>>
A̱vu ama'a a̱ usu Shawulu, <<Yuwan ili i na ve enei u lobono nuwu.>>
41 Reve Shawulu yuwan avasa a̱ tyo uba̱ta̱ wa̱ A̱sulazuva A̱sula̱ a Isra'ila, <<Nye i zuwai vu usu yi aagbashi a̱ wu ana'an shi? Na̱ unusu u va̱ u ɗa, ko za vu ulobo u va̱ Jonata, vu usu na̱ Urim, amma nu unusu wa ama a Isra'ila ɗa, vu usu na̱ Tumim.>> Reve mazuwa ma agita mo roco Jonata na̱ Shawulu ɗa, reve ama'a o o'wo babu unusu.
42 Reve Shawulu damma, <<Zuwayi agita e ekere va̱ na̱ Jonata ulobo u va̱.>> A̱vu a tawa Jonata.
43 Ɗaɗa Shawulu dammai Jonata, <<Damma mu ili i na vu yuwain.>>
Ɗaɗa Jonata damma niyi, <<M peɗe ta̱ ishiki wa'a nu combo va aaɗanga a na a̱ ri o ukere u va̱. Gogo n ta gura kuwa̱.>>
44 A̱vu Shawulu damma Jonata, <<Lyawa A̱sula̱ a ca a̱mu a̱tsuma̱lima̱ lon, na̱ o una wu shi.>>
45 Reve ama a damma Shawulu, <<Cine Jonata a̱a̱ kuwa̱, za na yuwain a̱ba̱jini o ulinga wi iwawi a̱tsuma̱ a Isra'ila? A̱sulazuva a para! Tsu kucuna ta̱ na̱ a̱ A̱sulazuva a na a̱ ri wuma, babu ko a̱nji a aaci a̱ yi za ta̱ na a̱ riya̱ e iɗa, adama a na u yuwan ta̱ ili i nda ana'an ni ikambi ya̱ A̱sula̱.>> Ne ɗa ama'a a papai Jonata, agba o una yi shi.
46 Ɗaɗa Shawulu lyawai magbagba ma aza a Filistiya, a̱vu aza a Filistiya a̱ ka̱mba̱ a̱ tyo e iɗa i le.
47 Ana Shawulu tarai tsugono ekere aza a Isra'ila u yuwan ta̱ uvon na̱ n'yuwatan n le uba̱ta̱ suru: A̱za̱ a̱ Mowa, na aza a Amon na̱ a̱za̱ a̱ Edom, na̱ ngono n Zoba na aza a Filistiya. Uba̱ta̱ u na u yuwain uvon suru u tsu lyuwa ta̱ aci.
48 U yuwan ta̱ uvon nu ukadu lon, reve u lyuwa aza a Amaleka nu uvon. Waru u wawa ta̱ aza a Isra'ila e ekere a aza a na a̱ pura̱ nle itana.
U'wa wa Shawulu
49 Olobo a Shawulu ele ɗa Jonata, na̱ Ishvi na̱ Malkishuwa. Waru e esheli e re a̱ yi ele ɗa, Mera zakpara, Mikal zawa'a.
50 Ala a ka va̱ yi ɗa Ahinowam usheli wa Ahima'az. Ala a yali ya̱ a̱soja a̱ yi a̱yi ɗa Abna ulobo wa Ner, waru Ner dada ke'en va Shawulu ɗa.
51 Kish ɗa dada va Shawulu, waru Ner dada va Abna, Kish na̱ Ner olobo a Abiyel a ɗa.
52 A̱tsuma̱ a wuma wa Shawulu suru, u yuwan ta̱ uvon wu usuɗuwu na aza a Filistiya. Na̱ we ene za vu ucira ko zana ri na̱ ukadu lon, reve wo o'woto yi soja va̱ yi.