1 Reve A̱sulazuva a damma Musa, 2 <<Damma aza a Isra'ila, na̱ vuma yuwan unusu o ucigu wa̱ yi shi a̱vu u yuwan ili i ta̱ e ili i na A̱sulazuva a zuwai she a yuwan wan, 3 nna̱ ganu na a̱ tsuwa̱yin mani'in yuwan unusu, reve u ta̱wa̱a̱ ama nu unusu, u ta̱ ta̱wa̱a̱ A̱sulazuva na̱ moggono ma nan ma na ma̱ ri usa̱du shi kucci adama o unusu u na u yuwain. 4 U ta̱ ta̱wa̱a̱ na̱ moggono'o o u'uwata wo Oogodo o Uga'asusan a̱ ma̱ka̱ka̱n ma̱ A̱sulazuva. U ta̱ kuru ukere wa̱ yi a aaci a̱ yi, reve u paɗa yi a̱ ma̱ka̱ka̱n ma̱ A̱sulazuva. 5 Reve ganu na a̱ tsuwa̱yin mani'i'in u kene mpasa m moggono'o reve u tara yi a uwa o Oogodo o Uga'asusan. 6 Waru u tsupu aakatsu a̱ yi a mpasa'a, reve wu kyo'onu yi toto ucindere a̱ ma̱ka̱ka̱n ma̱ A̱sulazuva elime o umuna wa̱ A̱a̱'isa̱. 7 Reve ganu putala mpasa n ro a avana a masa'a e ili i ma̱guru mo uyo'o ma na ma̱ ri a̱ ma̱ka̱ka̱n ma̱ A̱sulazuva o Oogodo o Uga'asusan. Reve u tsun akapi a mpasa m moggono'o e ikyun i masa'a ma̱ kucci vu ukula̱tosu o u'uwata wo Oogodo o Uga'asusan. 8 Reve u foɗo abaji a mani'in o moggono ma na a cayi kucci adama o unusu'u suru, na̱ mani'in ma na ma palai iliya̱tsuma̱ na̱ za na ri uɓoluloi ni iliya̱tsuma̱ suru, 9 na a'ilu e re na̱ mani'in ma na ma̱ ri uɓoluloi ne ele ma na ma̱ ri zuzu ne eetele e ikyun, nu upasu wa assuvu u na u la'ai ulobonu, za na woo foɗo oɓolo na a'ilu'u. 10 U to foɗo mani'i'in cine o tsu foɗo za vo ogono a na a cayi adama a muwwulai. Reve ganu kula̱to le a masa'a mo ukula̱tosu u kucci. 11 Amma ukwan u moggono'o ni inama ya̱ yi suru na aaci a̱ yi na ana a̱ yi ni iliya̱tsuma̱ ya̱ yi na̱ a̱ya̱n a̱ yi, 12 na akapi o moggono'o suru, u ta tara le o uta̱ o ucina̱ wu uva̱la̱ta̱ a̱ tyo uba̱ta̱ u na u ri cece, uba̱ta̱ u na oo ocosu okomo. Reve u kula̱to le ɗe na̱ ɗanga madala e edemu o okomo'o.

13 <<Nna ama a Isra'ila suru a yuwan unusu o ucigu u le shi a̱vu a yuwan ili i ta̱ e ili i na A̱sulazuva a zuwai she a yuwan wan, ko na̱ a̱ shi e reve ni ili'i shi, a̱ ta̱ nu unusu. 14 Nna̱ a̱ ta̱wa̱ e reve nu unusu u na a yuwain, a ta ca kucci moggono ma nan adama a̱ kucci vu unusu o una̱ntsu wo Oogodo o Uga'asusan. 15 Mbara ma ama a Isra'ila'a n ta̱ kuru ekere e le a aaci o moggono ma na'an a̱ ma̱ka̱ka̱n ma̱ A̱sulazuva, reve a paɗa yi lo. 16 Reve ganu na a̱ tsuwa̱yin mani'in u kene mpasa m moggono'o a uwa pe o Oogodo o Uga'asusa'an. 17 U ta̱ tsupu aakatsu a̱ yi a̱tsuma̱ a mpasa'a reve wu kyo'onu yi a̱ ma̱ka̱ka̱n ma̱ A̱sulazuva toto ucindere elime o umuna'a. 18 Reve ganu'u u putala mpasa n ro a avana a masa'a'a ma na ma̱ ri a̱ ma̱ka̱ka̱n ma̱ A̱sulazuva o Oogodo o Uga'asusan. Akapi a mpasa n na m buwai reve u tsun yi e ikyun i masa'a ma̱ kucci vu ukula̱tosu o u'uwata wo Oogodo o Uga'asusan. 19 U to foɗo abaji a mani'in ma̱ yi suru, reve u kula̱to yi a masa'a'a. 20 U ta yuwan na̱ moggono ma na'an cine u yuwain na̱ moggono ma na a cayi kucci adama o unusu. Ne tsunda tsa ɗa ganu a yuwaan le kucci matara mo ume mo unusu, reve gba a yuwaan le gafura. 21 Reve u tara na'an o uta̱ o ucina̱ wu uva̱la̱ta̱ a̱vu u kula̱to yi cine u kula̱toi nan vu ufaru. A̱yi nda a̱yi ɗa kucci vu unusu adama a ama a Isra'ila.

22 <<Nna̱ zagbain yuwan unusu o ucigu wa̱ yi shi, a̱vu u yuwan ili i ta̱ e ili i na A̱sulazuva A̱sula̱ a̱ yi a zuwai, u ta̱ nu unusu. 23 Nno o roco yi unusu u na u yuwain, u ta ca kucci ma̱ga̱ji ma na ma̱ ri usa̱du shi. 24 U ta̱ kuru ukere wa̱ yi a aaci a̱ ma̱ga̱ji'i, reve u paɗa yi uba̱ta̱ u na a tsu paɗasa kucci na a̱ kula̱tosu a̱ ma̱ka̱ka̱n ma̱ A̱sulazuva. Kucci adama o unusu u ɗa. 25 Reve ganu shepe mpasa n kucci adama o unusu'u na aakatsu a̱ yi, reve u putala a avana a masa'a ma̱ kucci vu ukula̱tosu, a̱vu u tsun akapi a mpasa'a e ikyun i masa'a'a. 26 U ta̱ kula̱to abaji a mani'i'in suru a masa'a cine u kula̱toi mani'in ma̱ kucci muwwulai. Ne ɗa ganu aa ca kucci adama a matara mo ume mo unusu adama a zagbai'in, reve a yuwaan yi gafura.

27 <<Na̱ vuma ro a̱tsuma̱ a ama yuwan unusu nu ucigu wa̱ yi shi, a̱vu u yuwan ili i ta̱ e ili i na A̱sulazuva a zuwai, u ta̱ nu unusu. 28 Nno o roco yi unusu u na u yuwain, u ta̱ ta̱wa̱a̱ na̱ a̱na̱wu e megbele a na a̱ ri usa̱du shi kucci o una̱ wu unusu u na u yuwain. 29 U ta̱ kuru ukere wa̱ yi a aaci a̱ kucci vu unusu'u reve u paɗa yi uba̱ta̱ u kucci vu ukula̱tosu. 30 Reve ganu shepe mpasa'a na aakatsu a̱ yi, reve u putala a avana a masa'a ma̱ kucci vu ukula̱tosu. Reve u tsun akapi a na a buwai e ikyun i masa'a'a. 31 U to foɗo abaji a mani'in suru cine o tsu foɗo mani'in ma̱ kucci muwwulai. Reve ganu kula̱to yi a masa'a ili i ma̱guru mo uyo'o e ekere a̱ A̱sulazuva. Ne ɗa ganu a yuwaan yi kucci matara mo ume mo unusu, a̱ ta̱ gba a yuwaan yi gafura.

32 <<Nna̱ mokyokyon ma ɗa wa̱a̱ ta̱wa̱a̱ kucci vu unusu va̱ yi, a̱na̱wu a ɗa wa̱a̱ ta̱wa̱a̱ za na ri usa̱du shi. 33 U ta̱ kuru ukere wa̱ yi a aaci a̱ yi, reve u paɗa yi adama a̱ kucci vu unusu uba̱ta̱ u na a tsu paɗasa kucci vu ukula̱tosu. 34 Ganu ta̱ shepe mpasa n kucci vu unusu'u na aakatsu a̱ yi reve u putala a avana a masa'a ma̱ kucci vu ukula̱tosu. Reve u tsun akapi a mpasa'a e ikyun i masa'a'a. 35 U to foɗo abaji a mani'in suru cine o tsu foɗo mani'in mo kyon kucci muwwulai. Reve ganu kula̱to yi a masa'a'a zuva kucci na a cayi A̱sulazuva va akina. Ne ɗa ganu aa yuwaan vuma'a kucci matara mo ume mo unusu u na u yuwain, a̱ ta̱ gba a yuwaan yi gafura.