2
Kucci vi ishina
(N.Gn 6:14-23)
1 <<Na̱ vuma ta̱wa̱a̱ A̱sulazuva na̱ kucci vi ishina, u ta̱ ta̱wa̱ na̱ yira i lashi. U ta̱ tsun yi mani'in ni ili i ma̱guru i na a̱ tsu ɗe furenkisen.
2 Reve u ta̱wa̱ na̱ a̱yi uba̱ta̱ wo olobo a Haruna nan ganu. Ganu to shiton ukere na̱ yira i lashi'i na̱ mani'in oɓolo na̱ furenkisen suru. Reve u kula̱to yi ili yu ucuwusan zuva masa'a'a, kucci na a yuwain na akina, ili i ma̱guru ma na A̱sulazuva aa uwwusa uyo'o wa̱ yi.
3 Akapi a̱ kucci vi ishina na buwai, u to o'wo za va Haruna no olobo a̱ yi, a̱yi ɗa u la'ai akiza u kucci na a cayi A̱sulazuva va akina.
4 <<A mantsa ma na i ta̱wa̱i na̱ kucci vi ishina i na a zatsuyi a wuwan, wo o'wo za yira i lashi, opopofu a na a̱ ri na̱ wolilo shi na a̱ ja̱mba̱ra̱i na̱ mani'in, ko emeshen a na a yuwain babu wolilo na a putalai na̱ mani'in ma ɗa.
5 Na̱ kucci yira vi ishina va̱ wu yi za na a kangalai a ataɗa a ɗa, a yuwan yi na̱ yira i lashi i na a̱ ja̱mba̱ra̱i na̱ mani'in babu wolilo.
6 Vu busa yi mubushi mubushi, reve vu tsun yi mani'in, kucci vi ishina ɗa.
7 Nna̱ kucci yira vi ishina va̱ wu vi ili i na a raluyi a ataɗa a ɗa, a yuwan yi na̱ yira i lashi na̱ mani'in.
8 I ta̱wa̱a̱ A̱sulazuva kucci vi ishina vi ili i na a yuwain ni ili i nda. I ca ganu ele, a̱yi ɗa wa̱a̱ ta̱wa̱ ne ele a masa'a.
9 U te kene pe ili yu ucuwusan a̱tsuma̱ a̱ kucci vi ishina'a, reve u kula̱to yi a masa'a'a. Kucci na a yuwain na akina, ili i ma̱guru ma na A̱sulazuva aa uwwusa uyo'o wa yi.
10 Akapi a̱ kucci vi ishina na buwai u to o'wo za va Haruna no olobo a̱ yi, a̱yi ɗa u la'ai akiza u kucci na a cayi A̱sulazuva va akina.
11 <<Babu kucci vi ishina na a̱a̱ ta̱wa̱a̱ A̱sulazuva i na aa yuwan na̱ wolilo, adama a na ya̱a̱ kula̱to wolilo ko ishiki a̱tsuma̱ a̱ kucci na a cayi A̱sulazuva na akina shi.
12 I ta gura ta̱wa̱ ne ele tsa̱ kucci vu umatsun wu ufaru ya̱ A̱sulazuva, agba aa yuwan kucci ne ele a masa'a kucci ma̱guru mo uyo'o shi.
13 I ta̱ tsun kucci vi ishina i ɗu suru akpaɗi. She i kuɗa̱ a̱ tsun akpaɗi a akucunu a̱ A̱sula̱ a̱ ɗu a̱ kucci vi ishina ɗu wan. I tsun akpaɗi a̱ kucci ɗu suru.
14 <<Nni i ta̱wa̱a̱ A̱sulazuva na̱ kucci vi ishina vu umatsun wu ufaru, i ca a̱ga̱za̱ e ishina i sa'avu o uzuwun i na a kparai.
15 Reve i tsun yi mani'in na̱ furenkisen, kucci vi ishina ɗa.
16 Ganu ta̱ kula̱to ili yu ucuwusan diga pe e ishina i na a kparai'i na̱ mani'in oɓolo ni ili i furenkise'en suru, kucci na a cayi A̱sulazuva va akina.