☰ Nan Ganu 15
15
Ma̱ɗa̱wa̱ ma na ma tsu ta̱wa̱ ni idaba
1 A̱sulazuva a yuwan ta̱ adanshi na̱ Musa na̱ Haruna u damma, 2 <<Yuwain adanshi na aza a Isra'ila i damma le, na̱ vali ri a̱ ɗa̱wusa̱ a̱ lipu tsali tsa̱ yi, wuɗa̱wusa̱'a̱ ili yi idaba i ɗa. 3 Ko na̱ ma̱ɗa̱wa̱'a̱ u lyuwa elime ko u gulu, u ta zuwa yi wo o'wo idaba. Apa nda cine ma̱ɗa̱wa̱ ma̱ yi maa zuwa idaba: 4 Uba̱ta̱ wu nven n na vuma na a̱a̱ ɗa̱wusa̱ voyin suru u to o'wo idaba. Waru e ili i na u da̱nuyi suru u to o'wo idaba. 5 Za na suru ju'wa̱in uba̱ta̱ wu nven wa̱ yi u ta̱ za̱'wa̱ a̱tugu a̱ yi, reve u sumba̱ na̱ mini, a̱vu wo o'wo idaba hali ulivu. 6 Waru za na suru da̱nuyi e ili i na za na a̱a̱ ɗa̱wusa̱ da̱nuyi, u ta̱ za̱'wa̱ a̱tugu a̱ yi. Reve u sumba̱ na̱ mini, reve u buwa idaba hali she ulivu. 7 Za na suru ju'wa̱in lipu vu za na a̱ ɗa̱wusa̱, u ta̱ za̱'wa̱ a̱tugu a̱ yi, reve u sumba̱ na̱ mini, reve wo o'wo idaba she ulivu.
8 <<Na̱ za na a̱a̱ ɗa̱wusa̱ tsuwa̱a̱n za na ri cece ma̱tsa̱n, za na a̱ tsuwa̱yin ma̱tsa̱'a̱n u ta̱ za̱'wa̱ a̱tugu a̱ yi, reve u sumba̱ na̱ mini, reve wo o'wo idaba she ulivu. 9 Urutsu u na za ma̱ɗa̱wa̱'a̱ u da̱nuyi suru u to o'wo idaba. 10 Waru za na suru ju'wa̱in ili i na biti i ri za̱la̱ vu urutsu'u u to o'wo idaba hali ulivu. Waru za na suru tanuyi ili i ndolo u ta̱ za̱'wa̱ a̱tugu a̱ yi, reve u sumba̱ na̱ mini. Reve wo o'wo idaba she ulivu. 11 Za na suru za ma̱ɗa̱wa̱ ju'wa̱in agba u sa'a ekere a̱ yi na̱ mini shi, u ta̱ za̱'wa̱ a̱tugu a̱ yi reve u sumba̱ na̱ mini, a̱vu wo o'wo idaba she ulivu. 12 Upondo u ci'in u na za ma̱ɗa̱wa̱ ndolo ju'wa̱in suru o to ɓoso yi, agba ili i na suru u ju'wa̱in i na a yuwain nu uɗanga a̱ ta̱ za̱'wa̱ yi na̱ mini.
13 <<Na̱ a̱ ka̱mba̱to vuma cece diga a̱ ma̱ɗa̱wa̱ ma̱ yi, reve u kecee aciya̱yi rana cindere vu uka̱mba̱tosu cece va̱ yi, reve wu za̱'wa̱ a̱tugu a̱ yi. A̱vu u sumba̱ aciya̱yi na̱ mini ma sa'ani a̱vu wo o'wo cece. 14 Reve o urana wa̱ kunla̱ u tara muɗa n re ko murukuku n re, a̱vu u ta̱wa̱ a̱ ma̱ka̱ka̱n ma̱ A̱sulazuva o una̱ntsu wo Oogodo o Uga'asusan, a̱vu u ca ganu ele. 15 Reve ganu ca kucci le, za ta̱ kucci adama o unusu za ta̱ kucci vu ukula̱tosu. Ne ɗa ganu aa yuwan kucci matara mo ume mo unusu o una̱ wa̱ yi a̱ ma̱ka̱ka̱n ma̱ A̱sulazuva adama a̱ ma̱ɗa̱wa̱ ma̱ yi.
16 <<Na̱ tsali tsa vuma tso oco, u ta̱ sumba̱ lipu va̱ yi suru na̱ mini a̱vu wo o'wo idaba hali she ulivu. 17 Utugu ko ukwan u na tsali'i tsa̱ ju'wa̱in biti a̱ ta̱ za̱'wa̱ yi na̱ mini reve wo o'wo idaba hali she ulivu. 18 Na̱ vuma von na̱ ka hali tsali tso uta̱, ele ra a̱ ta̱ sumba̱ na̱ mini, reve o o'wo idaba hali she ulivu.
19 <<Na̱ ka e eneshe a̱shinda̱ o usumbu a̱ yi, u ta̱ da̱na̱ a̱tsuma̱ e idaba yu usumbu wa̱ yi hali rana cindere. Za na suru ju'wa̱n niyi u to o'wo idaba hali she ulivu. 20 E ili i na ka'a u voyin suru a mantsa mo usumbu ma̱ yi u to o'wo idaba. Waru e ili i na u da̱nuyi suru u to o'wo idaba. 21 Za na suru ju'wa̱in ili yi nven ya̱ yi u ta̱ za̱'wa̱ a̱tugu a̱ yi a̱vu u sumba̱ na̱ mini, reve wo o'wo idaba hali she ulivu. 22 Za na waru ju'wa̱in ili i na wa̱a̱ da̱nusu, u ta̱ za̱'wa̱ a̱tugu a̱ yi reve u sumba̱ na̱ mini, reve wo o'wo idaba hali she ulivu. 23 Ko ili yi nven i ɗa ko ili i na u shi nden, na̱ vuma ro ju'wa̱n yi u to o'wo idaba hali she ulivu. 24 Waru na̱ vuma von na̱ a̱yi reve mpasa mu usumbu ma̱ yi n ju'wa̱n yi, u to o'wo idaba rana cindere. Ili yi nven i na suru vali'i u voyin u to o'wo idaba.
25 <<Na̱ ka ri ocosu mpasa hali rana a̱bunda̱ agba mpasa mu usumbu ma̱ yi n ɗa shi, ko gba moco ma mpasa'a ma̱ ka̱ra̱ mantsa mo usumbu ma̱ yi, rana moco ma mpasa'a suru u ta̱ da̱na̱ a̱tsuma̱ e idaba. U ta̱ da̱na̱ a̱tsuma̱ e idaba tsa rana vu usumbu va̱ yi. 26 Ili yi nven i na u voyin suru a rana moco ma mpasa ma̱ yi u to o'wo idaba tsa mantsa mo usumbu wa̱ yi. Waru e ili i na suru u da̱nuyi u to o'wo idaba, tsa rana vu usumbu va̱ yi. 27 Za na suru ju'wa̱in ili i nda u to o'wo idaba. U ta̱ za̱'wa̱ a̱tugu a̱ yi reve u sumba̱, reve wo o'wo idaba hali she ulivu. 28 Amma na̱ wo o'wo cece diga o moco ma mpasa'a, u te kecee aciya̱yi rana cindere, na a yuwan ne, u to o'wo cece. 29 O urana wa̱ kunla̱ reve u tara muɗa n re ko murukuku n re. Reve u ta̱wa̱ ne ele ya ganu o una̱ntsu wo Oogodo o Uga'asusan. 30 Reve ganu ca za ta̱ kucci adama o unusu za ve ire waru kucci vu ukula̱tosu. Ne tsunda tsa ɗa ganu a yuwan kucci ma matara mo ume mo unusu o una̱ wa̱ yi a̱ ma̱ka̱ka̱n ma̱ A̱sulazuva adama e idaba i wocosu wa̱ yi.
31 <<Ne ɗa vaa kasa aza a Isra'ila ni ili i na yoo o'woto le idaba, adama a̱ kuwa̱ a̱tsuma̱ e idaba i le wan na̱ a̱ lungusa̱ uba̱ta̱ wu nden n va̱ n na n ri e memere me le.>>
32 A̱yi nda a̱yi ɗa ili i na aa yuwan adama a za na o o'woi idaba adama a̱ ma̱ɗa̱wa̱ ko za na tsali tsa̱ yi tsoo ocusho. 33 Na adama a ka na ri na̱ a̱shinda̱ o usumbu wa̱ yi, adama a vali ko ka na suru ri o ocosu, waru na adama a vali na voyin na̱ ka na ri idaba.
☰