19
1 Pagꞌubus ini awn na isab diyungug ku biyaꞌ tingug sin manga mahadjanaꞌ ha surgaꞌ, amu agi,
“Pudjihun taniyu in Tuhan!
Tunggal isa-isa niya in tagsukuꞌ sin kalagguan iban kawasa. Siya da in manglalappas kātuꞌniyu dayn ha manga dusa taniyu.
2 Maamu iban mabuntul in manga hukuman niya.
Biyutangan niya na hukuman in babai mangīꞌ,
amu in landuꞌ bantug nakarā-rā ha manga tau dunya himinang sin manga unu-unu mangīꞌ iban kalumuan.
Iban hangkan siya sīksaꞌ sin Tuhan pasal biyunuꞌ niya in manga daraakun sin Tuhan.”
3 Na, namung na isab sila magbalik. Matanug in suwara. Laung nila,
“Pudjihun natuꞌ in Tuhan!
In pagꞌasu sin sunug ha dāira yan diꞌ magkapūng kasaumulan.”
4 Pagꞌubus yadtu, in kawhaan tagꞌupat nagtatau-maas iban sin upat malāikat mahal-mahal in lupa, simujud sartaꞌ simumba na pa Tuhan, amu in naglilingkud duun ha kursi. Amu agi nila,
“Amin! Pudjihun natuꞌ in Tuhan!”
In Pagtiyaun sin Anak Bili-bili
5 Sakali awn na isab diyungug ku nagsuwara dayn ha lugal sin kursi. Amu agi,
“Pudjiha niyu in Tuhan natuꞌ,
kamu katān manga daraakun niya,
iban na sin katān tau, sibuꞌ da mataas iban bukun,
amu in sasukuꞌ sin nagmamabugaꞌ kaniya.
Pudjiha niyu siya.”
6 Pagꞌubus ampa na isab aku nakarungug suwara biyaꞌ sin tingug sin pagꞌulak sin manga tau mataud, biyaꞌ katingug sin lagublub sin busay malagguꞌ tuud, iban biyaꞌ katingug sin anduhud sin dawgdug amu in matanug tuud. Amu agi sin suwara,
“Pudjihun taniyu in Panghuꞌ!
Sabab in Tuhan natuꞌ sangat kawasa, mamarinta na.
7 Subay tuud kitaniyu magkūg-kuyag.
Pudjihun natuꞌ in Tuhan,
karnaꞌ bihaun dimatung na in waktu sin pagkawin sin amu in ngiyānan Anak Bili-bili iban sin manga tau sukuꞌ niya.
Amu in piyagbahasa pangantin babai asawahun niya, amu in nagsasakap na asal, namamakay sin badjuꞌ pangantin.
8 In piyagbahasa pangantin babai ini, dīhilan na siya badjuꞌ pangantin,
amu in maputiꞌ tuud masiꞌnag iban wayruun tuud lummiꞌ-lummiꞌ niya.”
(In hāti sin badjuꞌ pangantin ini maputiꞌ, amuna in manga hinang mabuntul sin manga tau sukuꞌ sin Tuhan.)
9 Sakali namung in hambuuk malāikat kākuꞌ. Laung niya, “Sulatan in hibichara ku ini. Makuyag in manga napīꞌ humadil sin piyagbahasa pagkawin sin Anak Bili-bili.” Iban siyugpatan niya pa in bichara niya. Laung niya, “In manga lapal kabtangan ini bunnal tuud dayn ha Tuhan.”
10 Na, pagꞌubus, magtūy aku simujud pa alupan niya, sagawaꞌ liyāng niya aku. Laung niya, “Ayaw kaw sumujud kākuꞌ. Subay hambuuk-buuk Tuhan in sumbahun mu. Sabab in aku ini hambuuk da isab daraakun sin Tuhan biyaꞌ kaymu iban sin manga kataymanghuran mu, amu hisiyu-siyu in mamawgbug sin kasabunnalan pasal hi Īsa. In kasabunnalan ini pasal hi Īsa, amu in asal piyalahil sin Tuhan ha manga kanabi-nabihan, amu in nagdarā sin Parman niya.”
In Nangunguraꞌ ha Kuraꞌ Putiꞌ
11 Manjari ini, kītaꞌ ku naukab in surgaꞌ, iban yaun awn kuraꞌ putiꞌ. In amu nangunguraꞌ ha taas niya, amuna in pagngānan Kapangandulan iban Puunan Sin Kasabunnalan. Mabuntul siya manghukum, iban ādil in pagpapanaw niya sin kawasa niya bang siya magꞌatu iban sin manga banta niya.
12 In mata niya masugit mangatud maūkꞌūk dakuman biyaꞌ sin sapantun kāyu nasusuliyab, iban mataud mahakuttaꞌ ha taas sin ū niya. Iban awn ngān siyusulat duun kaniya. Isa-isa niya da in makaingat sin maana niya yan.
13 In juba niya nahihipuꞌ sin duguꞌ. Iban in ngān hipagtawag kaniya, “Parman sin Tuhan.”
14 Nagꞌuurul ha ulihan niya in manga sundalu ha surgaꞌ. In manga sundalu ini nangunguraꞌ ha manga kuraꞌ putiꞌ, iban in juba nila maputiꞌ, iban wayruun tuud lummiꞌ-lummiꞌ niya.
15 Awn puddang mahayt gimuwaꞌ dayn ha simud niya. In ini amuna in hipangatu niya ha manga kabangsa-bangsahan amu in simusulang kaniya. Iban in pamarinta niya sangat makusug, biyaꞌ hantang basiꞌ diꞌ magkabaliꞌ. Lāgiꞌ in hisiyu-siyu umatu kaniya hinangun niya biyaꞌ sin sapantun bungang-kahuy anggul, amu in pugaun sin manga tau hinangun alak. Iban pananamun niya sila sin murkaꞌ sin Tuhan sangat kawasa.
16 In juba niya iban sin paa niya siyusulatan sin gulalan kaniya, amu in,
“Sultan sin Manga Kasultanan,
Panghuꞌ sin Manga Katān Panghuꞌ.”
17 Manjari nākitaꞌ na isab aku hambuuk malāikat duun ha taas langit timitindug ha siꞌnag sin suga. Nagsuwara siya matanug pa manga katān manuk-manuk naglulupad ha awan. Amu agi, “Kari kamu. Pagtipun kamu mari pa pagjamuhan sin Tuhan, pagjamuhan niya dakulaꞌ.
18 Kari kamu kaun sin unud sin manga patay tau, amu in unud sin baran sin manga kasultanan, sin manga jiniral iban sin manga kasundaluhan, iban da isab sin unud sin manga kuraꞌ iban sin amu in nangunguraꞌ ha taas niya. Kaun kamu sin unud sin patay tau indaginis, sibuꞌ da īpun iban bukun, tau mataas iban bukun.”
19 Pagꞌubus, kītaꞌ ku in sattuwa talun iban sin manga kasultanan ha dunya iban sin manga kasundaluhan nila nagtipun naghambuuk mamunuꞌ ha amu in nangunguraꞌ iban sin manga sundalu niya.
20 Manjari ini, nasaggaw in sattuwa talun iban sin nabi bukun bunnal, amu in nakahinang sin hinang makaajayb ha babaan sin sattuwa talun. (Dayn ha sabab sin manga nahinang niya makaajayb, narupang niya in manga tau, amu in siyāpan sin ngān sin sattuwa talun iban amu in simumba sin lupa sin sattuwa, amu in iyukkil hīnang barhalaꞌ.) In sattuwa talun iban sin nabi bukun bunnal, liyaruk sin buhiꞌ pa sila pa lawm kāyu nasusuliyab iban maylang, amu in biyaꞌ dagbus lanaw dakulaꞌ nalalaga.
21 Na, ampa in manga sundalu nila miyatay kaagi sin amu in piyagbahasa puddang gimuwaꞌ dayn ha simud sin amu in nangunguraꞌ. Iban in unud sin baran nila kiyaun sin manga kamanuk-manukan. Kiyansuban tuud in manga manuk-manuk sin kiyaun nila.