17
La transfiguración
1 Ni̱ ngaa gachin hua̱tanꞌ güi, ni̱ nicaj Jesús Pedro nga̱ Jacobo nga̱ Juan huin jnánj Jacobo ganꞌanj ni̱ni sij chra̱ ꞌngo̱ quij xa̱can.
2 Ni̱ ganahuin ꞌueé nnee̱ cúj Jesús ne̱ꞌ rian ni sij. Ni̱ xigui̱n rian Jesús rúnꞌ hua güi huaj. Ni̱ ganahuin gatsi̱ si-ganꞌ sij da̱j rúnꞌ hua si xigui̱n huaj.
3 Hué dan ni̱ gurugüiꞌ tsínj gu̱ꞌnaj Moisés nga̱ tsínj gu̱ꞌnaj Elías rian nne ni sij. Ni̱ gaꞌmi nu̱ngüej síꞌ nga̱ sij.
4 Ngaa ni̱ gataj Pedro gunun Jesús:
―Sa̱ꞌ mán néꞌ yuꞌuj nan Señor. Sisi̱ ga̱ranꞌ ruhuá re̱ꞌ, ni̱ gui̱ꞌyaj néꞌ hua̱ꞌnij hueꞌ recoj le aj. Ni̱ ngoj manꞌán re̱ꞌ. Ni̱ angoj Moisés. Ni̱ ángoj Elías. ―Daj gataj Pedro gunun Jesús.
5 Ni̱ ngaa hua gue̱ gaꞌmi Pedro, ni̱ nasíj ꞌngo̱ nga xigui̱n garan-ánꞌ rian ni sij. Ni̱ scanij nga daj gunun ni sij ꞌngo̱ nane̱ si gataj-áꞌ:
―Nan huin daꞌnī ꞌi̱ ruhuāj aj. Gu̱nun a ni é re̱ꞌ si ataj sij. ―Hué daj gataj Yanꞌanj gunun ni sij.
6 Ni̱ ngaa gunun ni tsínj nicoꞌ Jesús nuguanꞌ daj, ni̱ gaꞌ nitu ni sij rian yoꞌój. Daj si ducu guxuꞌuiꞌ ni sij.
7 Ngaa ni̱ gahuin ni̱chrunꞌ Jesús ganun raꞌa síꞌ ni sij. Ni̱ gataj síꞌ:
―Ga̱naxuman ni é re̱ꞌ. Ni̱ si̱ guxuꞌuiꞌ ni é re̱ꞌ mánj. ―Daj gataj Jesús gunun ni sij.
8 Ni̱ ngaa nachica ni sij rian ni sij, ni̱ guiniꞌi ni sij niquinꞌ urin Jesús yuꞌuj daj.
9 Ni̱ ngaa huaj ni sij nanij ni sij chra̱ quij, ni̱ gaꞌninꞌ Jesús sun rian ni sij. Ni̱ gataj síꞌ:
―Si̱ gununa ni é re̱ꞌ si guiniꞌi ni é re̱ꞌ rian ni ngüi̱ mánj. Ni̱ daꞌ síj ga̱naꞌnij daꞌníj ni ngüi̱ huin manꞌānj, asíj ni̱ ga̱ꞌue na̱taꞌ ni é re̱ꞌ aj. ―Daj gataj Jesús.
10 Ngaa ni̱ nachínj snanꞌanj ni tsínj nicoꞌ Jesús manꞌan síꞌ. Ni̱ gataj ni sij:
―Ni̱ u̱n sin huin ataj ni tsínj digyán ley sisi̱ hua sini ga̱ꞌnaꞌ Elías únj. ―Daj gataj ni sij.
11 Ngaa ni̱ gataj Jesús:
―Xa̱ngaꞌ ga̱ꞌnaꞌ sini Elías. Ni̱ hué síꞌ na̱guiꞌyaj sa̱ꞌ daranꞌanj.
12 Ni̱ atā gu̱nun ni é re̱ꞌ sisi̱ hua gaꞌna̱ꞌ Elías. Sani̱ nun na̱niꞌi ni ngüi̱ manꞌan síꞌ mánj. Ni̱ guiꞌyaj quij ni sij daranꞌ si garanꞌ ruhua ni sij guiꞌyaj ni sij nga̱ síꞌ. Ni̱ da̱j rúnꞌ guiranꞌ síꞌ, ni̱ daꞌngaꞌ daj gui̱ranꞌ manꞌānj huīnj daꞌníj ni ngüi̱, gui̱ꞌyaj ni sij aj. ―Daj gataj Jesús.
13 Hué dan ni̱ gara daꞌngaꞌ ruhua ni tsínj nicoꞌ Jesús sisi̱ aꞌmi síꞌ xiꞌí Juan tsínj duguataꞌ nnee.
Jesús sana a un muchacho lunático
14 Ni̱ ngaa guisíj ni sij rian ma̱n ni ngüi̱, ni̱ gaꞌna̱ꞌ ꞌngo̱ tsínj daj. Ni̱ ganiquinꞌ ráj da̱coj sij rian Jesús.
15 Ni̱ gataj sij:
―Señor, ga̱nani yaco ruhuá re̱ꞌ niꞌyáj re̱ꞌ do̱j daꞌnī si ahuiꞌ naꞌnij sij aj. Ni̱ ranꞌ ni̱nꞌ ruhua sij sayun. Ni̱ síj gaꞌi̱ natúj sij rian yanꞌa̱n an. Ni̱ síj gaꞌi̱ guinij sij chruhua nnee nej aj.
16 Ni̱ nicā gaꞌnāj rian ni tsínj nicoꞌ manꞌán re̱ꞌ aj. Sani̱ nun ga̱ꞌue ganahuin daꞌnī, guiꞌyaj ni sij mánj. ―Daj gataj tsínj daj gunun Jesús.
17 Ngaa ni̱ gataj Jesús:
―Naꞌue gu̱xuman ruhua ni é re̱ꞌ huin ni é re̱ꞌ ni tsínj ma̱n yya̱j. Ni̱ xiꞌi̱ niman án re̱ꞌ. Ngaa ni̱ naꞌue ga̱ne nigān nga̱ á re̱ꞌ. Ni̱ si̱ gu̱nucuā si-chrej ni é re̱ꞌ ni̱ganj mánj. Ni̱caj ni é re̱ꞌ sij ga̱ꞌnaꞌ ni é re̱ꞌ riānj anj. ―Daj gataj Jesús gunun ni tsínj nicoꞌ sij.
18 Ngaa ni̱ gaꞌmi huee Jesús rian nane̱ xi̱ꞌi daj. Ni gahui-íꞌ chruhua niman tsinꞌ daj. Ni̱ ꞌngo̱ hora ganahuin sij, guiꞌyaj Jesús.
19 Ngaa ni̱ gaꞌna̱ꞌ urin ni tsínj nicoꞌ Jesús rian síꞌ. Ni̱ gataj ni sij:
―Ni̱ u̱n sin huin ni̱ nun gu̱nucuaj únj gui̱ri únj nane̱ xi̱ꞌi niman tsinꞌ daj únj. ―Daj gataj ni sij.
20 Ngaa ni̱ gataj Jesús:
―Daj si naꞌue gu̱xuman sa̱ꞌ ruhua ni é re̱ꞌ ni̱ꞌyaj ni é re̱ꞌ manꞌānj. Ni̱ xa̱ngaꞌ atā gu̱nun ni é re̱ꞌ sisi̱ gu̱xuman ruhua ni é re̱ꞌ ꞌngo̱ ritsin da̱j rúnꞌ hua ca̱n cuej nasa, ngaa ni̱ ga̱ꞌue ga̱taj ni é re̱ꞌ gu̱nun quij da aj: “Gu̱xun re̱ꞌ manꞌán re̱ꞌ yuꞌuj nan ga̱nꞌanj re̱ꞌ ango yuꞌuj.” Ni̱ daꞌngaꞌ daj ga̱huin sisi̱ gu̱xuman xa̱ngaꞌ ruhua ni é re̱ꞌ nánj. Ni̱ ga̱ꞌue gui̱ꞌyaj ni é re̱ꞌ daranꞌanj.
21 Sani̱ ga̱ꞌue gui̱ri néꞌ ni nane̱ xiꞌi̱ nan urin si ga̱chinj jniꞌyaj néꞌ rian Yanꞌanj, ni̱ gui̱ꞌyaj néꞌ ayuno nej. ―Daj gataj Jesús gunun ni sij.
Jesús anuncia otra vez su muerte
22 Ni̱ ngaa mán ni sij estado Galilea, ni̱ gataj Jesús gunun ni sij:
―Huēj huin daꞌníj ni ngüi̱. Ni̱ na̱gaꞌuiꞌ ꞌngo̱ tsínj daj manꞌānj raꞌa ni tsínj.
23 Ni̱ da̱gahuiꞌ ni sij manꞌānj. Sani̱ xiráj hua̱ꞌnij güi, ni̱ ga̱naꞌnī nánj. ―Daj gataj Jesús gunun ni sij.
Ni̱ ducu ganani ruhua ni sij, guiꞌyaj nuguanꞌ daj.
Pago del impuesto del templo
24 Ni̱ ngaa guisíj Jesús nga̱ ni tsínj nicoꞌ sij xumanꞌ Capernaum, ngaa ni̱ ganꞌanj ni̱ꞌyaj ni tsínj aꞌnej pesto güenda nuhui rian nne Pedro. Ngaa ni̱ nachínj snanꞌanj ni sij síꞌ. Ni̱ gataj ni sij:
―Si̱ gaꞌuiꞌ si-maestro ni é re̱ꞌ pesto xiꞌí nuhui nan ga̱ a̱ꞌ. ―Daj gataj ni sij.
25 Ngaa ni̱:
―Aꞌuiꞌ sij aj. ―Gataj Pedro gunun ni sij.
Ngaa ni̱ ngaa gatúj Pedro chruhua hueꞌ, ni̱ gaꞌmi sini Jesús. Ni̱ gataj síꞌ:
―Da̱j huaj ruhuá re̱ꞌ, Simón. Ni̱ ni rey ma̱n chruhua xungüi̱ nan, ni̱ u̱n ngüi̱ aꞌnej ni sij sanꞌanj ruhuá re̱ꞌ únj. Aꞌnej ni sij sanꞌanj rian manꞌan daꞌníj ni sij níꞌ. Asi̱ aꞌnej ni sij sanꞌanj rian ango ni ngüi̱ sa̱ꞌ. Daꞌ ꞌyaj ni sij, ruhuá re̱ꞌ únj. ―Gataj Jesús.
26 Ngaa ni̱:
―Rian ango ni ngüi̱. ―Gataj Pedro.
Ngaa ni̱ gataj Jesús:
―Hué dan ni̱ ni daꞌníj sij si̱ gaꞌuiꞌ ni sij pesto mánj.
27 ’Sani̱ güenda sisi̱ si̱ gaꞌman ruhua ni sij, ni̱ güi̱j re̱ꞌ laguna xa̱chij, ni̱ di̱nij re̱ꞌ suelo chruhua nnee. Ni̱ xucuaj gui̱daꞌa sini suelo daj gui̱ri re̱ꞌ. Ni̱ duꞌua xuj na̱riꞌ re̱ꞌ ꞌngo̱ moneda huin sanꞌanj. Ni̱ huej gui̱sij ga̱ꞌuiꞌ re̱ꞌ xiꞌīj nga̱ xiꞌí manꞌán re̱ꞌ nej aj. ―Gataj Jesús gunun Pedro.