Si-nu̱guanꞌ Yanꞌanj Xa̱ngaꞌ San Lucas 3

Predicación de Juan el Bautista

1 Ni̱ ngaa guisíj xi̱nunꞌ yoꞌ gaꞌninꞌ rey gu̱ꞌnaj Tiberio César sun, ni̱ huin tsínj gu̱ꞌnaj Poncio Pilato gobernado estado Judea. Ni̱ tsínj gu̱ꞌnaj Herodes gaꞌninꞌ sun estado Galilea. Ni̱ jnánj sij Felipe gaꞌninꞌ sun estado Iturea nga̱ Traconite. Ni̱ gaꞌninꞌ tsínj gu̱ꞌnaj Lisanias sun estado Abilinia. 2 Ni̱ nu̱ngüej chrej aꞌninꞌ huin Anás nga̱ Caifás. Ni̱ hué ni güi daj, ni̱ riqui Yanꞌanj si-nu̱guanꞌanj rian tsínj gu̱ꞌnaj Juan ngaa gachéj síꞌ riqui quij quiꞌyanj na̱co huin síꞌ daꞌníj Zacarías.

3 Ni̱ gachéj Juan daranꞌ yuꞌuj ngaj ni̱chrunꞌ duꞌua xinéj nnee gu̱ꞌnaj Jordán. Ni̱ gataj sij gunun ni ngüi̱ sisi̱ ga̱nani ruhua ni sij xiꞌí si-ga̱quinꞌ ni sij. Ni̱ na̱nicoꞌ ni sij Yanꞌanj. Ni̱ ga̱taꞌ nnee ni sij. Ngaa ni̱ ga̱ꞌue gui̱nicaj Yanꞌanj niman nico xiꞌí si-ga̱quinꞌ ni sij nej. Daj gataj Juan.

4 Ni̱ daꞌngaꞌ daj gahuin da̱j rúnꞌ ataj nuguanꞌ garun tsínj gu̱ꞌnaj Isaías ꞌngo̱ tsínj gaꞌmi si-nu̱guanꞌ Yanꞌanj xa̱ngaꞌ asi̱j ná. Ni̱ hué nan huin si garun síꞌ:

Unun néꞌ si-na̱ne ꞌngo̱ tsínj aꞌmi nucuaj ꞌngo̱ yuꞌuj quiꞌyanj na̱co aj.

Ni̱ ataj síꞌ sisi̱ na̱guiꞌyaj xugüi néꞌ si-chrej Señor.

Ni̱ na̱guiꞌyaj ni̱ca néꞌ niman néꞌ xiꞌí si ga̱ꞌnaꞌ Señor rian néꞌ.

5 Ni̱ na̱guiꞌyaj ni̱ca néꞌ rian atúj gaꞌman.

Ni̱ ga̱ꞌne néꞌ dacan sisi̱ na̱huin ni̱ca chrej daj.

Ni̱ na̱guiꞌyaj ni̱ca néꞌ chrej cuyu̱ daj nej.

Ni̱ na̱guiꞌyaj ta néꞌ rian chrej quij hua ta nej aj.

6 Ni̱ gui̱niꞌi daranꞌ ni ngüi̱ ma̱n chruhua xungüi̱ da̱j na̱caj Yanꞌanj néꞌ.

Daj garun Isaías xiꞌí Juan asi̱j ná.

7 Ni̱ guisíj nico ni ngüi̱ rian Juan xiꞌí si huin ruhua ni sij ga̱taꞌ nnee ni sij, gui̱ꞌyaj Juan. Ni̱ gataj síꞌ gunun ni sij:

―Daꞌníj xucuáj huin a ni é re̱ꞌ aj. Ni̱ u̱n tsínj gataj chru̱n rian a ni é re̱ꞌ sisi̱ gu̱nánj a ni é re̱ꞌ, ni̱ ga̱nani a ni é re̱ꞌ rian castigo nico, gui̱ꞌyaj Yanꞌanj únj. 8 Sisi̱ hua yya gahuin sa̱ꞌ niman án re̱ꞌ, ngaa ni̱ ga̱nꞌanj gui̱ꞌyaj á re̱ꞌ da̱j rúnꞌ ꞌyaj ni ngüi̱ gahuin sa̱ꞌ niman anj. Ni̱ si̱ gani ruhua á re̱ꞌ sisi̱ xiꞌí si daꞌníj Abraham huin a ni é re̱ꞌ, ngaa ni̱ nitaj gaquinꞌ daꞌui a ni é re̱ꞌ mánj. Daj si atā gu̱nun a ni é re̱ꞌ sisi̱ yej ngaj nan, ni̱ ga̱ꞌue gui̱ꞌyaj Yanꞌanj daꞌníj Abraham. 9 Ni̱ a̱ hua chru̱n gagaꞌ hacha ga̱ꞌnij sij yaꞌa̱ siu̱ ni chrun. Ni̱ da̱j rúnꞌ ꞌyaj ꞌngo̱ tsínj nga̱ gagaꞌ hacha, ni̱ daꞌngaꞌ daj gui̱ꞌyaj Yanꞌanj nga̱ daranꞌ chrun nitaj si ayu chruj sa̱ꞌ chra̱. Ni̱ ga̱ꞌnij Yanꞌanj ni chrun daj ga̱ca-áꞌ rian yanꞌa̱n. ―Gataj Juan gunun ni ngüi̱.

10 Ngaa ni̱ nachínj snanꞌanj ni ngüi̱ Juan. Ni̱ gataj ni sij:

―Da̱j gui̱ꞌyaj únj, ruhuá re̱ꞌ únj. ―Daj gataj ni sij.

11 Ni̱ gataj Juan:

―Tsínj nu̱n hui̱j atsij, ni̱ ga̱ꞌuiꞌ sij gu̱nun tsínj nitaj si-ganꞌ. Ni̱ tsínj nicaj si xa sij, ni̱ ga̱ꞌuiꞌ sij xa̱ tsínj nitaj si nicaj xa̱ aj. ―Daj gataj Juan.

12 Ni̱ gahuin ni̱chrunꞌ go̱ꞌngo ni tsínj aꞌnej sanꞌanj pesto si ga̱taꞌ nnee ni sij. Ni̱ nachínj snanꞌanj ni sij Juan. Ni̱ gataj ni sij:

―Maestro, da̱j gui̱ꞌyaj ni únj, ruhua á re̱ꞌ únj. ―Gataj ni sij.

13 Ni̱ gataj Juan:

―Si̱ gaꞌnej xa̱can ni é re̱ꞌ sanꞌanj mánj. Da̱j rúnꞌ aꞌninꞌ ley sun daꞌngaꞌ daj ga̱ꞌnej a ni é re̱ꞌ sanꞌanj rian ni ngüi̱ aj. ―Gataj Juan gunun ni sij.

14 Ni̱ hué daj nachínj snanꞌanj ni snado Juan nej. Ni̱ gataj ni sij:

―Da̱j gui̱ꞌyaj ni únj, ruhuá re̱ꞌ únj. ―Gataj ni sij.

Ni̱ gataj Juan:

―Si̱ guiꞌyaj fuerza á re̱ꞌ sisi̱ ga̱ꞌuiꞌ ni ngüi̱ sanꞌanj rian án re̱ꞌ mánj. Ni̱ si̱ gaꞌuiꞌ yu̱n ni é re̱ꞌ gaquinꞌ ni ngüi̱ güenda si gui̱ri ni é re̱ꞌ siꞌyaj ni sij mánj. Ni̱ ga̱huin nia̱ꞌ ruhua á re̱ꞌ nga̱ duꞌue ni é re̱ꞌ nej. ―Daj gataj Juan gunun ni snado.

15 Ni̱ gani ruhua ni ngüi̱ sisi̱ si ruhuaj, ni̱ Juan huin Cristo. Xiꞌí daj ni̱ anaꞌuij ni sij sisi̱ ga̱taj Juan u̱n tsínj huin manꞌan síꞌ. 16 Xiꞌí daj, ni̱ gataj Juan gunun daranꞌ ni ngüi̱ daj:

―Hua yya duguataꞌ nnee manꞌānj nga̱ nnee ni é re̱ꞌ. Sani̱ ga̱ꞌnaꞌ ango tsínj du̱guataꞌ nnee Espíritu Santo niman án re̱ꞌ, ni̱ nga̱ yanꞌa̱n nej. Hué tsínj daj nicaj sun nico daj nga̱ si nicaj sun manꞌānj. Ni̱ na̱ꞌaj yānj nachīj nnij correa ꞌni̱j dacánj sij xiꞌí si huin achij ni̱nꞌ sij. 17 Ni̱ hua daꞌa sij pala si na̱guiꞌyaj sa̱ꞌ sij riqui strigo. Ni̱ ga̱hui coj riqui-íꞌ. Ni̱ na̱ra sa̱ꞌ sij strigo chruhua guru̱. Sani̱ ga̱ri yanꞌa̱n sij coj ga̱ca-áꞌ ni̱ganj ni̱nꞌ. Ni̱ strigo daj huin ni ngüi̱ sa̱ꞌ rian Yanꞌanj. Ni̱ coj daj huin ni ngüi̱ nun aráj xina̱ si-nu̱guanꞌ Yanꞌanj nej aj. ―Daj gataj Juan gunun ni sij.

18 Ni̱ hué ducuánj nan huin si gaꞌmi sa̱ꞌ Juan ango ni nuguanꞌ sa̱ꞌ ꞌna̱ꞌ rian Yanꞌanj gunun ni ngüi̱.

19 Ni̱ chranꞌ Juan tsínj gu̱ꞌnaj Herodes huin síꞌ gobernado xiꞌí si xacaj síꞌ nica̱ jnánj síꞌ Felipe huin únꞌ Herodías. Ni̱ chranꞌ Juan Herodes xiꞌí ango rasu̱n quij guiꞌyaj síꞌ nej. 20 Hué dan ni̱ nataꞌ manꞌan Herodes ango gaquinꞌ rian ni gaquinꞌ guiꞌyaj sij daj. Daj si garij sij Juan ducuaga̱ꞌ nej aj.

El bautismo de Jesús

21 Ni̱ ngaa achin ga̱ri Herodes Juan ducuaga̱ꞌ, ni̱ gataꞌ nnee ni ngüi̱, guiꞌyaj Juan. Asíj ni̱ duguataꞌ nnee Juan manꞌan Jesús nej. Diaj hua gue̱ achínj jniꞌyaj Jesús rian Yanꞌanj, ni̱ naxiꞌníj xataꞌ. 22 Ni̱ ꞌna̱ꞌ guinij Espíritu Santo rian Jesús. Ni̱ rúnꞌ hua ꞌngo̱ xuꞌma̱n hua Espíritu Santo gaꞌna̱ꞌ rian sij. Ni̱ gunun ni sij gaꞌmi Yanꞌanj xataꞌ. Ni̱ gataj-áꞌ:

―Hué re̱ꞌ huin daꞌnī ꞌi̱ ruhuāj. Ni̱ hua nia̱ꞌ ruhuāj niꞌyā so̱ꞌ. ―Daj gataj Yanꞌanj gunun Jesús.

Genealogía de Jesús

23 Ni̱ ꞌngo̱ si yoꞌ ico̱ chiꞌ huaj Jesús ngaa gaxi̱ꞌi sij guiꞌyaj sun sij si-nu̱guanꞌ Yanꞌanj. Ni̱ Jesús huin daꞌníj José, ruhua ni ngüi̱. Ni̱ José huin daꞌníj Elí. 24 Ni̱ Elí huin daꞌníj Mataj. Ni̱ Mataj huin daꞌníj Leví. Ni̱ Leví huin daꞌníj Melqui. Ni̱ Melqui huin daꞌníj Jona. Ni̱ Jona huin daꞌníj José. 25 Ni̱ José huin daꞌníj Matías. Ni̱ Matías huin daꞌníj Amós. Ni̱ Amós huin daꞌníj Nahúm. Ni̱ Nahúm huin daꞌníj Esli. Ni̱ Esli huin daꞌníj Nagai. 26 Ni̱ Nagai huin daꞌníj Maat. Ni̱ Maat huin daꞌníj Matías. Ni̱ Matías huin daꞌníj Semei. Ni̱ Semei huin daꞌníj Josec. Ni̱ Josec huin daꞌníj Judá. 27 Ni̱ Judá huin daꞌníj Jonán. Ni̱ Jonán huin daꞌníj Resa. Ni̱ Resa huin daꞌníj Zorobabel. Ni̱ Zorobabel huin daꞌníj Salatiel. Ni̱ Salatiel huin daꞌníj Neri.

28 Ni̱ Neri huin daꞌníj Mequi. Ni̱ Mequi huin daꞌníj Adi. Ni̱ Adi huin daꞌníj Cosam. Ni̱ Cosam huin daꞌníj Elmadam. Ni̱ Elmadam huin daꞌníj Er. 29 Ni̱ Er huin daꞌníj Jesús. Ni̱ Jesús huin daꞌníj Eliezer. Ni̱ Eliezer huin daꞌníj Jorim. Ni̱ Jorim huin daꞌníj Matat. 30 Ni̱ Matat huin daꞌníj Leví. Ni̱ Leví huin daꞌníj Simeón. Ni̱ Simeón huin daꞌníj Judá. Ni̱ Judá huin daꞌníj José. Ni̱ José huin daꞌníj Jonam. Ni̱ Jonam huin daꞌníj Eliaquim. Ni̱ Eliaquim huin daꞌníj Melea. 31 Ni̱ Melea huin daꞌníj Mena. Ni̱ Mena huin daꞌníj Matata. Ni̱ Matata huin daꞌníj Natán. 32 Ni̱ Natán huin daꞌníj David. Ni̱ David huin daꞌníj Isaí. Ni̱ Isaí huin daꞌníj Obed. Ni̱ Obed huin daꞌníj Booz. Ni̱ Booz huin daꞌníj Sala. Ni̱ Sala huin daꞌníj Naasón.

33 Ni̱ Naasón huin daꞌníj Aminadad. Ni̱ Aminadad huin daꞌníj Amin. Ni̱ Amin huin daꞌníj Arni. Ni̱ Arni huin daꞌníj Esrom. Ni̱ Esrom huin daꞌníj Fares. Ni̱ Fares huin daꞌníj Judá. 34 Ni̱ Judá huin daꞌníj Jacob. Ni̱ Jacob huin daꞌníj Isaac. Ni̱ Isaac huin daꞌníj Abraham. Ni̱ Abraham huin daꞌníj Taré. Ni̱ Taré huin daꞌníj Nacor. 35 Ni̱ Nacor huin daꞌníj Serug. Ni̱ Serug huin daꞌníj Ragau. Ni̱ Ragau huin daꞌníj Peleg. Ni̱ Peleg huin daꞌníj Heber. Ni̱ Heber huin daꞌníj Sala. 36 Ni̱ Sala huin daꞌníj Cainán. Ni̱ Cainán huin daꞌníj Arfaxad. Ni̱ Arfaxad huin daꞌníj Sem. Ni̱ Sem huin daꞌníj Noé. Ni̱ Noé huin daꞌníj Lamec. 37 Ni̱ Lamec huin daꞌníj Matasalén. Ni̱ Matasalén huin daꞌníj Enoc. Ni̱ Enoc huin daꞌníj Jared. Ni̱ Jared huin daꞌníj Mahalaleel. Ni̱ Mahalaleel huin daꞌníj Cainán. Ni̱ Cainán huin daꞌníj Enós. 38 Ni̱ Enós huin daꞌníj Set. Ni̱ Set huin daꞌníj Adán. Ni̱ Adán huin daꞌníj Yanꞌanj xa̱ngaꞌ aj.