☰ 1 Corintios 7
7
Problemas del matrimonio
1 Yya̱j ni̱ nanicā ga̱tā nuguanꞌ nachínj snanꞌanj ni é re̱ꞌ nga̱ yanj guiꞌyaj a ni é re̱ꞌ. Duguꞌna̱j huaj sisi̱ si̱ xacaj ꞌngo̱ tsínj ꞌngo̱ yunꞌunj xa̱na mánj. 2 Sani̱ ri̱an hua nico gaquinꞌ ꞌyaj ni tsínj nga̱ ni yunꞌunj xa̱na, ni̱ hua nia̱n gui̱nicaj ꞌngo̱ tsínj daj urin nica̱ sij. Ni̱ hué daj nga̱ ꞌngo̱ yunꞌunj xa̱na, ni̱ urin nica̱ unj gui̱nicaj unj. 3 Ni̱ hua nia̱n si ga̱ꞌmi ꞌngo̱ tsínj snoꞌo nga̱ nica̱ sij ngaa hué daj huin ruhua unj. Ni̱ hua nia̱n si ga̱ꞌmi unj nga̱ nica̱ unj ngaa hué daj huin ruhua sij. 4 Ni̱ sé nnee̱ cúj urin manꞌan yunꞌunj xa̱na daj huin si nicaj unj. Daj si nnee̱ cúj nica̱ unj huin unj. Ni̱ sé nnee̱ cúj urin manꞌan tsínj snoꞌo huin si nicaj sij. Daj si nnee̱ cúj nica̱ sij huin sij.
5 Ni̱ gui̱ꞌyaj nu̱ngüej nica̱ ꞌngo̱ tsínj daj si huin ruhua nu̱ngüej nica̱ sij. Sani̱ ga̱ꞌue ga̱huin ni̱ni nu̱ngüej nica̱ sij do̱j sisi̱ huin ruhua nu̱ngüej nica̱ sij ga̱chinj jniꞌyaj nu̱ngüej sij rian Yanꞌanj. Asíj ni̱ ga̱ꞌmi ru̱huaꞌ yún nu̱ngüej nica̱ sij nun sa̱ꞌ nun, ni̱ gui̱ꞌyaj gana gaquinꞌ rian nu̱ngüej sij, gui̱ꞌyaj sichre xiꞌí si si̱ gahuin nucuaj nu̱ngüej sij ga̱toj ni̱ni nu̱ngüej sij.
6 Daranꞌ ni nuguanꞌ nan aꞌmi sa̱ꞌāj rúnꞌ huin permiso huin. Sé sun aꞌnīj rian án re̱ꞌ nga̱ ni nuguanꞌ nan mánj. 7 Güendāj ni̱ huin ruhuāj sisi̱ daranꞌ ni tsínj snoꞌo ga̱huin da̱j rúnꞌ huin manꞌānj. Sani̱ ni̱ni huin chrej riqui Yanꞌanj rian da go̱ꞌngo néꞌ. Hua ꞌngo̱ chrej rian ango jnánj néꞌ. Ni̱ hua ango chrej rian ango jnánj néꞌ, guiꞌyaj Yanꞌanj.
8 Ngaa ni̱ ga̱tā gu̱nun ni tsínj nne urin sisi̱ duguꞌna̱j huaj sisi̱ ga̱ gue̱ ga̱ne urin ni sij da̱j rúnꞌ nnēj. Ni̱ hué daj ga̱tā gu̱nun ni yunꞌunj xa̱na nne urin nga̱ ni yunꞌunj xa̱na mmij nej. 9 Sani̱ sisi̱ naꞌue gu̱nucuaj ꞌngo̱ tsínj daj ga̱ne urin sij, ni̱ xa̱caj naj sij nica̱ sij. Daj si sa̱ꞌ huin si xa̱caj sij nica̱ sij. Ngaa ni̱ si̱ gahuin ruhua sij ni̱ꞌyaj sij ni yunꞌunj xa̱na mánj.
10 Sani̱ aꞌnīj sun rian án re̱ꞌ ni tsínj hua xacaj nica̱. Ni̱ sé si aꞌníj manꞌānj sun daj rian án re̱ꞌ. Sani̱ si-nu̱guanꞌ Señor huin aj. Ni̱ nuguanꞌ nan huin sisi̱ si̱ duna ni yunꞌunj xa̱na nica̱ unj. 11 Ni̱ sisi̱ du̱na ꞌngo̱ yunꞌunj xa̱na nica̱ unj, ngaa ni̱ hua nia̱n ga̱ne urin unj, asi̱ ga̱ꞌue na̱ꞌmi unj nga̱ nica̱ unj. Ni̱ si̱ gaꞌue du̱na ꞌngo̱ tsínj daj nica̱ sij mánj.
12 Ni̱ atā ꞌngo̱ nuguanꞌ rian ango ni é re̱ꞌ. Ni̱ si-nu̱guanꞌ manꞌānj huin nuguanꞌ nan. Sé rian Señor ꞌnaj mánj. Sisi̱ ꞌngo̱ tsínj nicoꞌ Jesús, ni nica̱ sij nun xu̱man ruhua ni̱ꞌyaj Yanꞌanj, ni̱ sisi̱ aꞌuej ruhua unj ga̱ne unj nga̱ sij, ni̱ si̱ rani sij na̱nꞌ unj ducuá unj mánj. 13 Ni̱ sisi̱ ꞌngo̱ yunꞌunj xa̱na nicoꞌ Jesús, ni̱ nica̱ unj nun xu̱man ruhua sij niꞌyaj sij Yanꞌanj, ni̱ sisi̱ aꞌuej ruhua sij ga̱ne sij nga̱ unj, ni̱ si̱ rani unj na̱nꞌ sij ducuá sij mánj. 14 Ni̱ xiꞌí si xuman ruhua nica̱ ꞌngo̱ tsínj nun xu̱man ruhua daj, ni̱ chra̱cuij Yanꞌanj síꞌ ga̱huin sa̱ꞌ síꞌ. Daj si xuman ruhua nica̱ síꞌ niꞌyaj únꞌ Yanꞌanj. Ni̱ xiꞌí si xuman ruhua nica̱ ꞌngo̱ yunꞌunj xa̱na nun xu̱man ruhua daj, ni̱ chra̱cuij Yanꞌanj yunꞌunj xa̱na daj ga̱huin sa̱ꞌ unj. Daj si xuman ruhua nica̱ unj niꞌyaj síꞌ Yanꞌanj. Ni̱ sisi̱ sé daj huin, ni̱ da̱ꞌui daꞌníj a ni é re̱ꞌ gaquinꞌ rian Yanꞌanj. Sani̱ gahuin sa̱ꞌ daꞌníj a ni é re̱ꞌ rian Yanꞌanj.
15 Sani̱ sisi̱ huin ruhua tsínj nun xu̱man ruhua daj ga̱huin ni̱ni sij rian nica̱ sij, ngaa ni̱ ga̱ꞌninꞌ dinꞌinj ruhua néꞌ si ga̱nꞌanj sij. Ni̱ hué ducuánj daj huin sisi̱ yunꞌunj xa̱na nun xu̱man ruhua daj, ni̱ huin ruhua unj ga̱huin ni̱ni unj rian nica̱ unj, ngaa ni̱ ga̱ꞌninꞌ dinꞌinj ruhua sij sisi̱ na̱nꞌ unj ducuá unj. Daj si nitaj xiꞌí si da fuerza ga̱ne nu̱ngüej nica̱ tsínj daj. Daj si huin ruhua Yanꞌanj sisi̱ ga̱ dinꞌinj rian néꞌ gui̱man néꞌ. 16 Ni̱ nun niꞌí re̱ꞌ huín re̱ꞌ yunꞌunj xa̱na sisi̱ ga̱ꞌue gu̱xuman ruhua nica̱ re̱ꞌ ni̱ꞌyaj sij Yanꞌanj, gui̱ꞌyáj re̱ꞌ níꞌ. Ni̱ manꞌán re̱ꞌ tsínj snoꞌo, ni̱ nun niꞌí re̱ꞌ sisi̱ ga̱ꞌue gu̱xuman ruhua nica̱ re̱ꞌ ni̱ꞌyaj únꞌ Yanꞌanj, gui̱ꞌyáj re̱ꞌ níꞌ.
17 Ni̱ da̱j rúnꞌ hua go̱ꞌngo néꞌ ngaa gaquínj Señor ga̱ꞌnaꞌ néꞌ, ni̱ daꞌngaꞌ daj ga̱ néꞌ aj. Ni̱ hué daj aꞌnīj sun rian daranꞌ ni ngüi̱ nicoꞌ Cristo ma̱n ni sij go̱ꞌngo xumanꞌ. 18 Ni̱ sisi̱ gaquínj Yanꞌanj ga̱ꞌnaꞌ ꞌngo̱ tsínj hua ta̱j daꞌngaꞌ nnee̱ cúj sij, ni̱ hué daj ga̱ sij. Ni̱ sisi̱ gaquínj Yanꞌanj ga̱ꞌnaꞌ ꞌngo̱ tsínj nitaj daꞌngaꞌ táj nnee̱ cúj sij, ni̱ si̱ gaꞌue gu̱taꞌ ni sij daꞌngaꞌ nnee̱ cúj sij mánj. 19 Hué dan ni̱ ga̱ꞌue si ta̱j daꞌngaꞌ nnee̱ cúj néꞌ. Ga̱ꞌue si nitaj daꞌngaꞌ táj néꞌ. Nitaj si ꞌyaj mánj. Sani̱ nuguanꞌ huin rian huin sisi̱ da̱gahuin néꞌ nuguanꞌ aꞌninꞌ Yanꞌanj sun rian néꞌ. 20 Ni̱ da̱j rúnꞌ hua gane da go̱ꞌngo néꞌ ngaa gaquínj Yanꞌanj ga̱ꞌnaꞌ néꞌ, ni̱ daꞌngaꞌ daj ga̱ ga̱ne néꞌ aj.
21 Sisi̱ tsínj guiꞌyaj sun yu̱n rian xuruꞌue gahuín re̱ꞌ ngaa gaquínj Yanꞌanj ga̱ꞌnaꞌ re̱ꞌ, ni̱ si̱ gahuin ruhuá re̱ꞌ mánj. Sani̱ sisi̱ ani ruhuá re̱ꞌ sisi̱ ga̱ꞌue ga̱huin ni̱ni re̱ꞌ rian xuruꞌue daj, ni̱ hué daj gui̱ꞌyáj re̱ꞌ aj. 22 Ni̱ ꞌngo̱ tsínj guiꞌyaj sun yu̱n rian ꞌngo̱ xuruꞌue ngaa gaquínj Señor ga̱ꞌnaꞌ sij, ni̱ gahuin níꞌnij niman sij, guiꞌyaj Señor. Ni̱ hué ducuánj daj huin, ni̱ ꞌngo̱ tsínj nitaj si ꞌyaj sun yu̱n rian ꞌngo̱ xuruꞌue ngaa gaquínj Señor ga̱ꞌnaꞌ sij, ni̱ huin sij ꞌngo̱ tsínj ꞌyaj sun yu̱n rian Cristo. 23 Naruꞌue nico Yanꞌanj guiran a ni é re̱ꞌ. Ngaa ni̱ si̱ duna á re̱ꞌ sisi̱ gui̱ꞌyaj sun yu̱n a ni é re̱ꞌ rian ni tsínj mánj. 24 Ngaa ni̱ da̱j rúnꞌ gane go̱ꞌngo néꞌ ngaa gaquínj Yanꞌanj ga̱ꞌnaꞌ néꞌ, ni̱ hué daj ga̱ne néꞌ rian Yanꞌanj huin ín re̱ꞌ jnánj néꞌ nga̱ xicaꞌuij néꞌ.
25 Nitaj si gaꞌninꞌ Señor sun riānj sisi̱ ga̱tā gu̱nun a ni é re̱ꞌ da̱j gui̱ꞌyaj ni ngüi̱ nne urin. Maan si ga̱tā rian án re̱ꞌ da̱j rúnꞌ ani ruhuāj. Ni̱ ga̱ꞌue gu̱xuman ruhua á re̱ꞌ nga̱ si-nu̱guanꞌānj xiꞌí si gahuin ꞌi̱ ruhua Yanꞌanj niꞌya manꞌānj. Xiꞌí daj ni̱ nuguanꞌ xa̱ngaꞌ huin si-nu̱guanꞌānj. 26 Hué dan ni̱ xiꞌí ni sayun guimán néꞌ, ni̱ sa̱ꞌ doj sisi̱ gu̱na ꞌngo̱ tsínj da̱j rúnꞌ nne sij, ruhuāj aj.
27 Sisi̱ hua nica̱ re̱ꞌ, ni̱ si̱ duná re̱ꞌ nica̱ re̱ꞌ mánj. Sisi̱ nitaj nica̱ re̱ꞌ, ni̱ si̱ nanoꞌ re̱ꞌ xa̱caj re̱ꞌ yunꞌunj xa̱na mánj. 28 Ni̱ sisi̱ xa̱caj re̱ꞌ yunꞌunj xa̱na, ni̱ sé ꞌngo̱ gaquinꞌ huin mánj. Ni̱ sisi̱ xa̱caj ꞌngo̱ yunꞌunj xa̱na hua lij ꞌngo̱ tsínj snoꞌo, ni̱ sé ꞌngo̱ gaquinꞌ huin mánj. Sani̱ ni ngüi̱ hua nica̱, ni̱ gui̱ranꞌ ni sij sayun xungüi̱ nan. Ni̱ huin ruhuāj sisi̱ ga̱nani a ni é re̱ꞌ rian sayun da aj.
29 Huin ruhuāj ga̱ꞌmī ꞌngo̱ nuguanꞌ rian án re̱ꞌ huin ín re̱ꞌ jnánj néꞌ nga̱ xicaꞌuij néꞌ: Do̱j güi hua rian néꞌ. Ngaa ni̱ da̱j rúnꞌ hua ꞌngo̱ tsínj nitaj nica̱, ni̱ hué daj ga̱ ꞌngo̱ tsínj hua nica̱ ga̱ne sij. 30 Ni̱ tsínj aco, ni̱ si̱ gaco sij mánj. Ni̱ tsínj huin nia̱ꞌ ruhua, ni̱ si̱ gaꞌngaꞌ sij mánj. Ni̱ tsínj ránj ni rasu̱n daj, ni̱ ga̱ni ruhua sij sisi̱ sé siꞌyaj sij huin si ránj sij mánj. 31 Ni̱ tsínj nia̱ꞌ ruhua nga̱ ni rasu̱n ma̱n chruhua xungüi̱ nan, ni̱ si̱ gahuin ꞌi̱ ruhua sij ni̱ꞌyaj sij ni rasu̱n da mánj. Daj si xungüi̱ niꞌi néꞌ, ni̱ huaj ga̱nahuij.
32 Huin ruhuāj sisi̱ si̱ guiriun ruhua á re̱ꞌ mánj. Tsínj nne urin, ni̱ nahuij ruhua sij nga̱ si-nu̱guanꞌ Señor. Daj si huin ruhua sij gui̱ꞌyaj sij si aranꞌ ruhua Señor. 33 Sani̱ tsínj hua nica̱, ni̱ nahuij ruhua sij nga̱ ni rasu̱n ma̱n chruhua xungüi̱. Ni̱ huin ruhua sij gui̱ꞌyaj sij da̱j rúnꞌ aranꞌ ruhua nica̱ sij. 34 Ni̱ da̱j rúnꞌ ꞌyaj tsínj, ni̱ daꞌngaꞌ daj ꞌyaj yunꞌunj xa̱na nej. Ni̱ yunꞌunj xa̱na nne urin, ni̱ nahuij ruhua unj xiꞌí si-nu̱guanꞌ Señor. Ni̱ huin ruhua unj sisi̱ ga̱huin sa̱ꞌ nnee̱ cúj unj, niman unj nej. Sani̱ yunꞌunj xa̱na hua nica̱, ni̱ nahuij ruhua unj nga̱ ni rasu̱n ma̱n chruhua xungüi̱ nan. Ni̱ huin ruhua unj gui̱ꞌyaj unj si aranꞌ ruhua nica̱ unj. 35 Aꞌmī ni nuguanꞌ nan rian án re̱ꞌ sisi̱ ga̱huin ꞌueé rian án re̱ꞌ. Ni̱ sé si huin ruhuāj ga̱ꞌnīj rian án re̱ꞌ mánj. Maan si huin ruhuāj sisi̱ ꞌueé gui̱ꞌyaj á re̱ꞌ gui̱nicoꞌ sa̱ꞌ á re̱ꞌ manꞌan Señor.
36 Ni̱ sisi̱ hua daꞌni̱ xa̱na ꞌngo̱ tsínj daj, ni̱ hua guisíj yoꞌ xa̱caj unj tsínj snoꞌo, ni̱ ani ruhua tsínj daj sisi̱ sa̱ꞌ huin xa̱caj daꞌníj sij tsínj snoꞌo, ngaa ni̱ ga̱ꞌue xa̱caj unj tsínj snoꞌo si sé ꞌngo̱ gaquinꞌ huin mánj. 37 Sani̱ sisi̱ hua ꞌngo̱ tsínj hua ni̱ca niman sisi̱ si̱ gaꞌue xa̱caj daꞌni̱ xa̱na tsínj snoꞌo, ni̱ hua sa̱ꞌ huin gui̱ꞌyaj sij sisi̱ si̱ xacaj unj tsínj snoꞌo ngaa nitaj xiꞌí xa̱caj unj tsínj snoꞌo aj. 38 Hué dan ni̱ tsínj aꞌuiꞌ daꞌníj rian tsínj snoꞌo, ni̱ sa̱ꞌ ꞌyaj sij. Ni̱ tsínj naꞌuej ruhua ga̱ꞌuiꞌ sij daꞌníj rian tsínj snoꞌo, ni̱ sa̱ꞌ doj ꞌyaj sij nánj.
39 Ni̱ yunꞌunj xa̱na hua nica̱, ni̱ hua nia̱n si ga̱ne unj nga̱ sij da ga̱huiꞌ sij, ataj si-ley Yanꞌanj. Sani̱ sisi̱ ga̱huiꞌ nica̱ unj, ni̱ ga̱ꞌue xa̱caj unj u̱n tsínj snoꞌo ga̱ranꞌ ruhua unj xa̱caj unj. Sani̱ hua nia̱n si xa̱caj unj ꞌngo̱ tsínj xuman ruhua niꞌyaj Yanꞌanj anj. 40 Sani̱ ga̱huin nia̱ꞌ ruhua unj doj sisi̱ si̱ xacaj unj ꞌngo̱ tsínj snoꞌo, ruhuāj aj. Ni̱ ani ruhuāj sisi̱ uyan ga̱taj Espíritu Santo nej.
☰